កម្ពុជាតវ៉ាជំទាស់នឹងសកម្មភាពរបស់យោធាថៃ ដែលបានដាក់របាំង កុងតឺន័រ និងសាងសង់ផ្លូវ

ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី ០៨ ខែកុម្ភៈ ឆ្នាំ ២០២៥ បានប្រកាសតវ៉ាជាផ្លូវការ ប្រឆាំងនឹងសកម្មភាព​ខុសច្បាប់របស់កងកម្លាំងប្រដាប់អាវុធថៃ នៅក្នុងទឹកដីកម្ពុជាដែលថៃកំពុងកាន់កាប់។

កម្ពុជាបានជំទាស់យ៉ាងដាច់អហង្ការចំពោះការរាំងផ្លូវ តាមរយៈការដាក់របាំងកុងតឺន័រ និងការ​សាង​សង់ផ្លូវ​ចូលទៅតំបន់មួយចំនួន ក្នុងខេត្តឧត្តរមានជ័យ និងខេត្តពោធិ៍សាត់។

កាលពីថ្ងៃទី ០៥ ខែកុម្ភៈ ឆ្នាំ២០២៦ កងកម្លាំងប្រដាប់អាវុធថៃ បានដាក់កុងតឺន័របិទផ្លូវនៅទីតាំងចំនួនពីរ ក្នុងខេត្តឧត្តរមានជ័យ រួមមាន ភូមិរួតចំប៉ី និងភូមិអូរខ្លាឃ្មុំ ស្ថិតក្នុងស្រុកអូរស្មាច់។ បន្ទាប់មក នៅថ្ងៃទី៧ ខែកុម្ភៈ ឆ្នាំ២០២៦ កងកម្លាំងថៃបានចាប់ផ្តើមសាងសង់ផ្លូវមួយខ្សែ ដែលលាតសន្ធឹងចេញពីទីតាំងបិទផ្លូវដោយកុងតឺន័រ នៅក្នុងភូមិអូរខ្លាឃ្មុំ។

ដោយឡែក នៅខេត្តពោធិ៍សាត់ កងកម្លាំងប្រដាប់អាវុធថៃ ក៏បានដាក់កុងតឺន័របន្ថែម នៅក្នុងឃុំថ្មដា ស្រុកវាលវែង នៅថ្ងៃទី៧ ខែកុម្ភៈ ឆ្នាំ២០២៦ ផងដែរ។

ក្រសួងការបរទេសកម្ពុជា បានបញ្ជាក់ថា ទីតាំងទាំងអស់ខាងលើស្ថិតនៅក្នុងទឹកដីកម្ពុជាទាំងស្រុង ដូចដែលបានកំណត់ក្នុងអនុសញ្ញាបារាំង-សៀម ឆ្នាំ ១៩០៤ និង សន្ធិសញ្ញា ឆ្នាំ១៩០៧។

កម្ពុជាចាត់ទុកថា ការដាក់របាំង និងការសាងសង់ផ្លូវនៅក្នុងតំបន់ទាំងនេះ ផ្ទុយស្រឡះនឹងវិធានការកាត់បន្ថយភាពតាន​តឹង ដែលបានព្រមព្រៀងគ្នាក្នុងចំណុចទី១ នៃសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មា​ធិការព្រំដែនទូទៅ (GBC) ដែលបានធ្វើឡើងនៅថ្ងៃទី ២៧ ខែធ្នូ ឆ្នាំ២០២៥។

ក្រសួងការបរទេសកម្ពុជា អះអាងថា សកម្មភាពរបស់កងកម្លាំងថៃ បានបង្កឧបសគ្គបន្ថែមដល់ការវិលត្រឡប់ដោយសុវត្ថិភាព និងថ្លៃថ្នូររបស់ពលរដ្ឋភៀសសឹកកម្ពុជា ទៅកាន់ផ្ទះសម្បែង និងទ្រព្យសម្បត្តិរបស់ពួកគេ។

កម្ពុជាមើលឃើញថា វាជាការប៉ុនប៉ងដោយចេតនា ដើម្បីបង្កើតស្ថានភាពថ្មី និងកំណត់ឡើងវិញនូវបរិយាកាសសន្តិសុខនៅលើទីតាំងជាក់ស្តែង ក្នុងតំបន់ដែលស្ថិតក្រោមការកាន់កាប់ដោយខុសច្បាប់របស់ប្រទេសថៃ។

ក្រសួងការបរទេសកម្ពុជា បានបញ្ជាក់ថា សកម្មភាពទាំងនេះ ជាការរំលោភលើគោលការណ៍មូលដ្ឋាននៃធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។

កម្ពុជានៅតែប្តេជ្ញាចិត្តយ៉ាងមុតមាំ ក្នុងការដោះស្រាយបញ្ហាព្រំដែនទាំងអស់តាមមធ្យោបាយសន្តិភាព និងស្របតាមច្បាប់អន្តរជាតិ ព្រមទាំងប្រកាន់ខ្ជាប់យ៉ាងម៉ឺងម៉ាត់នូវសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ២០២៥ និងកិច្ចព្រមព្រៀងទ្វេភាគីពាក់ព័ន្ធផ្សេងៗទៀត៕