លោកជំទាវបណ្ឌិត ពេជ ចន្ទមុន្នី៖ កុមារកម្ពុជាកំពុងប្រឈមជំងឺបេះដូងពីកំណើតទាមទារឱ្យមានការយកចិត្តដាក់ខ្ពស់

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត គូសបញ្ជាក់ថា ក្នុងចំណោមបញ្ហាសុខភាពជាច្រើន ដែលកុមារកម្ពុជាកំពុងប្រឈម គឺជំងឺបេះដូងពីកំណើតជាបញ្ហាដ៏ធំ ដែលទាមទារឱ្យមានការយកចិត្តទុកដាក់ខ្ពស់ ពិសេស ទាំងផ្នែកបច្ចេកទេសវិជ្ជសាស្ត្រ និងការគាំទ្រពីសង្គម។

លោកជំទាវបានលើកឡើងបែបនេះ នាឱកាសអញ្ជើញចូលរួមក្នុងពិធីដាក់ឲ្យដំណើរការ គម្រោងវះកាត់បេះដូងកុមារ ដោយឥតគិតថ្លៃ នៅក្នុងមន្ទីរពេទ្យកុមារជាតិ កាលពីថ្ងៃទី ៨ ខែកុម្ភៈ ដែលរួមគ្នារវាងគ្រូពេទ្យកម្ពុជា និងក្រុមគ្រូពេទ្យស្ម័គ្រចិត្តមកពីសហរដ្ឋអាមេរិក ដែលដំណាក់កាលទី១ ចាប់ពីថ្ងៃ ទី៩ ដល់ទី១៣ ខែកុម្ភៈ ឆ្នាំ២០២៦។ លោកជំទាវបណ្ឌិត ពេជ ចន្ទមុន្នី មានប្រសាសន៍ថា ការដាក់ឱ្យដំណើរគម្រោងវះកាត់បេះដូងកុមារនាពេលនេះ គឺមានប្រយោជន៍ដ៏សំខាន់បំផុត ក្នុងការផ្ដល់ឱកាសរស់រានមានជីវិត និងអនាគតដល់កុមារដទៃទៀត ហើយសូមអរគុណដល់ក្រុមគ្រូពេទ្យស្ម័គ្រចិត្តសហរដ្ឋអាមេរិក និងសមាគមសុខាភិបាលខ្មែរ-អាមេរិក ដែលមកធ្វើការវះកាត់បេះដូងកុមារកម្ពុជា។

បើតាមលោកជំទាវ រាជរដ្ឋាភិបាលកម្ពុជាបានសម្រេចនូវសមិទ្ធផលជាច្រើន ក្នុងការលើកកម្ពស់ជីវភាពកុមារ នារយៈពេលមួយទសវត្សកន្លងមកហើយសម្រេចនូវចំណុចគោលដៅប្រមាណជាង ៣០ភាគរយ នៃគោលដៅអភិវឌ្ឍន៍ប្រកបដោយចីរភាព ផ្នែកសុខភាពកុមារ។ លោកជំទាវបណ្ឌិត បន្តថា ស្របទៅនឹងវឌ្ឍនភាពដ៏ប្រសើរនេះ កម្ពុជាក៏មានកាតព្វកិច្ចធានាថា កុមារទាំងអស់ទទួលបាននូវការថែទាំសុខភាព អាហារូបត្ថម្ភ កិច្ចការពារ និងការអប់រំ សមទៅនឹងតម្រូវការ ពីព្រោះកុមារ គឺជាអនាគតដ៏ភ្លឺស្វាងរបស់ប្រទេសជាតិ។ នៅពេលកុមារ មានសុខភាពល្អ ធនធានមនុស្សរបស់ជាតិនឹងរឹងមាំប្រកបដោយថាមពល និងបញ្ញាញាណ ផងដែរ ។

ក្នុងឱកាសនោះ លោកជំទាវទីមួយកម្ពុជា ក៏បានផ្ដាំផ្ញើនូវការងារមួយចំនួនដល់ក្រុមគ្រូពេទ្យ គឺទី១. ការប្រកាន់ខ្ជាប់នូវក្រមសីលធម៌វិជ្ជាជីវៈ មានឥរិយាបថល្អចំពោះអ្នកជំងឺ និង គ្រួសារអ្នកជំងឺ ហើយត្រូវខិតខំរៀនសូត្រជំនាញវះកាត់បេះដូងនេះ ពីក្រុមគ្រូពេទ្យមកពីសហរដ្ឋអាមេរិក, ទី២. ការថែទាំអ្នកជំងឺឲ្យបានល្អ និងទី៣. កិច្ចសហការឲ្យបានល្អជាមួយក្រុមគ្រូ ពេទ្យដៃគូ និងការផ្សព្វផ្សាយបន្ថែមដល់ប្រជាពលរដ្ឋ អំពីការវះកាត់បេះដូងកុមារនេះឲ្យបានទូលំទូលាយ ។

លោក ញឹប អង្គាបុស្ស នាយកមន្ទីរពេទ្យកុមារជាតិ បានថ្លែងថា មន្ទីរពេទ្យកុមារជាតិបានត្រៀមខ្លួនរួចជាស្រេច និងសហការជាមួយសមាគមសុខាភិបាលខ្មែរនៅអាមេរិក ដើម្បីផ្ដល់ការវះកាត់ជូនកុមារ និងពិនិត្យឡើងវិញ ក្នុងបេសកកម្មរបស់សមាគមសុខាភិបាលខ្មែរនៅអាមេរិកដើម្បីដាក់កម្មវិធីវះកាត់បន្ត។ លោកបានបន្ថែមថា បន្ទាប់ពីកម្មវិធីវះកាត់នេះ មន្ទីរពេទ្យកុមារជាតិ និងសមាគមសុខាភិបាលខ្មែរនៅអាមេរិក បានរៀបចំផែនការ ៣ឆ្នាំខាងមុខ ដើម្បីឲ្យមន្ទីរពេទ្យកុមារជាតិ មានសមត្ថភាពវះកាត់ដោយក្រុមវេជ្ជបណ្ឌិតឯកទេសរបស់មន្ទីរេពេទ្យតែម្ដង តាមរយៈការគាំទ្រលើការបណ្ដុះបណ្ដាលធនធានមនុស្ស និងសម្ភារបរិក្ខារដែលចាំបាច់ក្នុងការវះកាត់នេះ៕