ជិតដល់ថ្ងៃបុណ្យចូលឆ្នាំចិន ផ្កាអង្គាសិល្ប៍ចាប់ផ្ដើមមានលក់នាថ្ងៃដំបូងនៅផ្សារច្បារអំពៅ

នៅព្រឹកថ្ងៃទី១១ ខែកុម្ភៈ នេះ គេសង្កេតឃើញពលរដ្ឋរស់នៅខេត្តកំពង់ឆ្នាំងនាំយកដើមផ្កាអង្គាសិល្ប៍សម្រាប់សែនទទួលទេវតាឆ្នាំថ្មីប្រពៃណីចិន វៀតណាម មកលក់នៅផ្សារច្បារអំពៅ រាជធានីភ្នំពេញមុនគេ។

អ្នកស្រី លឹម ផល្លា ដែលនាំយកដើមផ្កាអង្គាសិល្ប៍មកលក់នៅផ្សារច្បារអំពៅបានឲ្យដឹងថា ដើមអង្គាសិល្ប៍នេះពួកគាត់បានឡើងទៅកាប់នៅលើភ្នំកញ្ជើក្នុងស្រុកទឹកផុស ខេត្តកំពង់ឆ្នាំង។ ចំពេលដើមអង្គាសិល្ប៍ឆ្នាំនេះមិនសូវសម្បូរប៉ុន្មានទេមិនដូចរាល់ឆ្នាំកន្លងទៅ។ អ្នកស្រីបញ្ជាក់ថា ចំពោះតម្លៃវិញគឺដើមធំតម្លៃ ៥០០០០រៀល និង ៣០០០០រៀល ២០០០០រៀល ទៅតាមតាមដើមតូចធំ។

ដោយឡែកលោក វ៉ាន ធា ដែលកន្លងមកតែងនាំយកដើមផ្កាអង្គាសិល្ប៍ពីខេត្តកំពង់ស្ពឺមកលក់នៅផ្សារច្បារអំពៅ​ បានឲ្យដឹងថា ឆ្នាំនេះពលរដ្ឋរស់នៅខេត្តកំពង់ស្ពឺដូចពុំទាន់ឃើញយកមកផ្កាអង្គាសិល្ប៍មកដាក់លក់ដូចរាល់ឆ្នាំបានមុនគេនោះទេ។ ដូច្នេះឆ្នាំនេះអ្នកខេត្តកំពង់ឆ្នាំងមានផ្កាអង្គាសិល្ប៍មកលក់បានមុន ប៉ុន្តែមានតម្លៃធូថ្លៃជាងឆ្នាំមុនៗ។

គួរបញ្ជាក់ថា បុណ្យចូលឆ្នាំប្រពៃណីជនជាតិចិន និងវៀតណាម នឹងប្រព្រឹត្តធ្វើឡើងរយៈ៣ថ្ងៃ គឹតចាប់ពីទី១៦ ខែកុម្ភៈទៅ៕

អត្ថបទ៖ នរា