ព័ត៌មានជាតិ

រដ្ឋមន្ត្រីអប់រំបង្កើតមូលនិធិសាមគ្គីភាពជួយដល់គ្រូដែលបាត់បង់ផ្ទះក្នុងសង្គ្រាមឈ្លានពានពីថៃ

បានផុស

៥ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

រដ្ឋមន្ត្រីអប់រំ ឧបនាយករដ្ឋមន្ត្រី ហង់ជួន ណារ៉ុន បានប្រកាសបង្កើតមូលនិធិសាមគ្គីភាពដើម្បីជួយដល់គ្រូបង្រៀននៅតាមព្រំដែនដែលបានបាត់បង់ផ្ទះសំបែង និងទ្រព្យសម្បត្តិដោយសារការឈ្លានពានពីប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទសន្និបាតអប់រំ ព្រឹកថ្ងៃទី១៣ ខែកុម្ភៈ ឆ្នាំ២០២៦នេះ នៅវិទ្យាស្ថានបច្ចេកវិទ្យាកម្ពុជា ឧបនាយករដ្ឋមន្ត្រី ហង់ជួន ណារ៉ុន មានប្រសាសន៍ថាក្រសួងនឹងផ្ទេរមូលនិធិមួយចំនួនពីមូលនិធិសមធម៌ចូលមូលនិធិសាមគ្គីភាពនេះជាមួយនឹងការកៀរគរមូលនិធិបន្ថែមផងដែរ។ លោកបន្ថែមថាមូលនិធិនេះនឹងយកទៅជួយដល់គ្រូបង្រៀនចំនួន ៣៨រូបពិសេសនៅភូមិព្រៃចាន់ និងភូមិជោគជ័យដែលបានបាត់បង់ផ្ទះសំបែង និងទ្រព្យសម្បត្តិក្នុងសង្គ្រាមឈ្លានពានពីថៃកន្លងទៅ។

លោកថា៖«មូលនិធិសាមគ្គីភាពនេះគឺដើម្បីសម្ដែងនូវសាមគ្គីភាពជាមួយនឹងលោកគ្រូអ្នកគ្រូដែលរងគ្រោះដោយសារតែសង្គ្រាមឈ្លានពានរបស់ប្រទេសថៃមកលើកម្ពុជា»។

ក្រៅពីមូលនិធិជួយដល់គ្រូបង្រៀននេះលោកឧបនាយករដ្ឋមន្ត្រីក៏បង្កើតនូវការចងសម្ព័ន្ធមេត្រីភាពរវាងសាលាចំនួន១០១ ជាមួយអង្គភាពថ្នាក់កណ្ដាល និងមន្ទីរជាមួយសាលា២៧ដែលត្រូវបានទាហានថៃបាញ់កម្ទេចក្នុងសង្គ្រាមឈ្លានពាននោះដើម្បីជួយកសាងនិងអភិវឌ្ឍន៍ឡើងវិញ។

គួរឱ្យដឹងផងដែរថា ក្នុងសង្គ្រាមឈ្លានពានពីថៃកាលពីខែធ្នូ ឆ្នាំ២០២៥ បានធ្វើឱ្យសាលាជាប់ព្រំដែនចំនួនជាង១០០០សាលាត្រូវបិទទ្វារ ប៉ះពាល់ការសិក្សាដល់សិស្សជាង២០ម៉ឺននាក់ និងគ្រួបង្រៀនជាង៧០០០នាក់៕