ជប៉ុននឹងផ្ដល់ឧបករណ៍តាមដានគុណភាពខ្យល់ឱ្យកម្ពុជាបន្ថែមទៀត ដើម្បីពិនិត្យខ្យល់ពុល បន្ថែមពីឧបករណ៍៍មានស្រាប់

ក្រុមហ៊ុនជប៉ុន នឹងផ្ដល់ឧបករណ៍ត្រួតពិនិត្យគុណភាពខ្យល់មកឱ្យកម្ពុជា ដើម្បីពិនិត្យគុណភាពខ្យល់ពុល។ ការផ្ដល់ឱ្យឧបករណ៍ត្រួតពិនិត្យគុណភាពខ្យល់នេះ គឺតាមរយៈការចុះហត្ថលេខារវាងក្រសួងបរិស្ថានកម្ពុជា ជាមួយក្រសួងបរិស្ថានជប៉ុន លើអនុស្សរណៈនៃកិច្ចសហប្រតិបត្តិការផ្តោតលើសសរស្តម្ភយុទ្ធសាស្ត្រចំនួន៤ដូចជា ការកាត់បន្ថយ និងការសម្របខ្លួនទៅនឹងការប្រែប្រួលអាកាសធាតុ សេដ្ឋកិច្ចចម្រុះ ការការពារការបំពុលទឹក ដី និងខ្យល់ និងការអភិរក្សជីវៈចម្រុះ។

ក្នុងសន្និសីទសារព័ត៌មានស្ដីទីលទ្ធផលនៃទស្សនកិច្ចទៅកាន់ប្រទេសជប៉ុន ដែលធ្វើឡើងនៅអាកាសយានដ្ឋានអន្តរជាតិតេជោ  រដ្ឋមន្ត្រីក្រសួងបរិស្ថាន លោក​ អ៊ាង សុផល្លែត នាព្រឹកថ្ងៃទី១៩ ខែកុម្ភៈ បានឆ្លើយនឹងសំណួរអ្នកសារព័ត៌មានដូច្នេះ៖«ក្រុមហ៊ុនជប៉ុន នឹងនាំមកនូវប្រព័ន្ធត្រួតពិនិត្យគុណភាពខ្យល់ ដើម្បីពិនិត្យគុណភាពខ្យល់យើង ថាតើមានលម្អងប្លាស្ទិកកម្រិតណា។»។

បើតាមរដ្ឋមន្ត្រី អ៊ាង សុផល្លែត ក្រសួងបរិស្ថាន នាពេលឆាប់ៗនេះ នឹងមាននូវឧបករណ៍ត្រួតពិនិត្យគុណភាពខ្យល់ទំនើបមួយ ដែលផ្ដល់ភាពងាយស្រួលក្នុងការតាមដានគុណភាពខ្យល់ ដោយគ្រាន់តែបើកដំណើរភ្លាម មន្ត្រីជំនាញនឹងអាចដឹងភ្លាមថា​នៅក្នុងខ្យល់មានសារធាតុពុល និងសារធាតុវិទ្យុសកម្ម សារធាតុគីមីអ្វីខ្លះនៅក្នុងខ្យល់។

រដ្ឋមន្ត្រីក្រសួងបរិស្ថាន បានឱ្យដឹងទៀតថា ក្រសួងក៏មានគម្រោងបំពាក់បន្ថែមទៀតនូវឧបករណ៍តាមដាន ពិនិត្យគុណភាពខ្យល់នៅតាមបណ្ដាខេត្តបន្ថែមពីលើឧបករណ៍តាមដានគុណភាពខ្យល់ដែលបានបំពាក់រួចហើយ ឱ្យបានយ៉ាងហោចណាស់ចំនួន ២ ឬ៣ឧបករណ៍តាមដានគុណភាពខ្យល់នៅតាមបណ្ដាខេត្តនីមួយៗ ។  

លោក ថ្លែងដូច្នេះ៖«ក្រសួងបរិស្ថាន នឹងរៀបចំបំពាក់បន្ថែមនូវឧបករណ៍តាមដានគុណភាពខ្យល់នៅតាមខេត្ត ក្រុងទាំងអស់ថែមទៀត។ ឥឡូវហ្នឹងនៅតាមខេត្តក្រុងខ្លះ មានឧករណ៍តាមដានគុណភាពខ្យល់មានចំនួន១ ឬមានចំនួន២។  អ៊ីចឹងទេ យើងនឹងបំពាក់បន្ថែមឧបករណ៍តាមដានគុណភាពខ្យល់ឱ្យមានយ៉ាងហោចណាស់ចំនួន២ ឬ៣ ក្នុងមួយខេត្ត។»។​

គួរឱ្យដឹងថា គិតត្រឹមបច្ចុប្បន្ន ក្រសួងបរិស្ថានដាក់ពង្រាយឧបករណ៍ប្រព័ន្ធត្រួតពិនិត្យគុណភាពខ្យល់កម្រិតខ្ពស់ ចំនួន៥៩កន្លែងនៅទូទាំងប្រទេសកម្ពុជា រួមជាមួយស្ថានីយផ្កាយរណប ចំនួន១គ្រឿង និងរថយន្តចល័តចំនួន៣គ្រឿង ដើម្បីតាមដានគុណភាពខ្យល់ (កំហាប់ភាគល្អិត PM2.5) ឱ្យបានត្រឹមត្រូវ និងផ្សព្វផ្សាយផ្ទាល់ជូនសាធារណជន បានជ្រាបអំពីទិន្នន័យគុណភាពខ្យល់ និងវិធានការការពារសុខភាព៕