ព័ត៌មានជាតិ

ក្រសួងអប់រំ ប្រកាសទទួលស្គាល់សាលារៀនចំនួន ៤២៧ ជាប់ស្តង់ដារសាលារៀនគំរូ

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

ក្រសួងអប់រំ យុវជន និងកីឡា បានប្រកាសទទួលស្គាល់សាលារៀនចំនួន ៤២៧ សាលា ជាប់ស្តង់ដារសាលារៀនគំរូ និងជំរុញ និងលើកទឹកចិត្តដល់សាលារៀនដទៃទៀត បន្តធ្វើការកែលម្អ និងអនុវត្ត ឱ្យបានពេញលេញនូវស្តង់ដារ សាលារៀនគំរូ នៅឆ្នាំបន្តបន្ទាប់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា គិតចាប់តាំងពីឆ្នាំ ២០២៣ មកទល់បច្ចុប្បន្ន ចំនួនសាលារៀនត្រូវបានទទួលស្គាល់ជាសាលារៀនគំរូបានកើនដល់ ៤២៧ សាលា ក្នុងនោះ កម្រិតមត្តេយ្យសិក្សាមានចំនួន ៤៩ សាលា បឋមសិក្សាមាន ១៧៣ សាលា (សាលារៀនគោលដៅចំនួន ៤១) និងមធ្យមសិក្សាមានចំនួន ២០៥ សាលា។

លោកឧបនាយករដ្ឋមន្ត្រី បានបន្តថា ចាប់ពីឆ្នាំ ២០២៣ ក្រសួងអប់រំ បានដាក់ឱ្យអនុវត្តស្តង់ដារសាលារៀនគំរូ ដើម្បីធ្វើកំណែទម្រង់សាលារៀនគ្រប់ជ្រុងជ្រោយ និងមានសង្គតិភាព ដោយផ្តោតលើស្តង់ដារចំនួន ៥ រួមមាន លទ្ធផលសិក្សារបស់សិស្ស , ការរៀន និងបង្រៀន , ការចូលរួមរបស់សហគមន៍, ដំណើរប្រតិបត្តិការ និងរដ្ឋបាលរបស់សាលារៀន , និងគណនេយ្យភាពរបស់សាលារៀន។

លោកឧបនាយករដ្ឋមន្ត្រី បានបញ្ជាក់ថា ក្នុងគោលដៅគាំទ្រការអនុវត្តស្តង់ដារសាលាគំរូទាំងបីកម្រិតក្រសួងអប់រំបានចេញសេចក្តីណែនាំស្តីពីការអនុវត្តស្តង់ដារសាលារៀនគំរូ , ប្រកាសស្តីពីការដាក់ឱ្យអនុវត្តស្តង់ដារសាលារៀនគំរូ , បង្កើតគណៈកម្មការដឹកនាំ និងគណៈកម្មការបច្ចេកទេសអនុវត្តស្តង់ដារសាលារៀនគំរូទាំងបីកម្រិត , ក្រុមការងារចុះជួយគាំទ្រតាមតំបន់ទាំង ៥ ដែលមានសមាសភាពចម្រុះពីថ្នាក់ជាតិ ថ្នាក់រាជធានី-ខេត្ត គ្រូប្រឹក្សាគរុកោសល្យ គ្រូឧទ្ទេស នាយកល្អ គ្រូបង្រៀនល្អ ព្រមទាំងអ្នកឯកទេសនានា។ ក្រសួង ក៏បានអភិវឌ្ឍន៍ឯកសារ និងឧបករណ៍គាំទ្រនានាក្នុងការអនុវត្តសាលាគំរូ ដើម្បីផ្តល់ជូនសាលារៀន និងអ្នកពាក់ព័ន្ធតាមគ្រប់ទិដ្ឋភាព។

លោកឧបនាយករដ្ឋមន្ត្រី បានលើកចិត្តឱ្យសាលារៀនទាំង ៤២៧ សាលា និងសាលារៀនដទៃទៀត បន្តធ្វើការកែលម្អ និងអនុវត្តឱ្យបានពេញលេញនូវស្តង់ដារ សាលារៀនគំរូ នៅឆ្នាំបន្តបន្ទាប់ទៀត៕

អត្ថបទ ៖ សំអឿន