ព័ត៌មានជាតិ

ស្ថានទូតកម្ពុជាប្រចាំរដ្ឋកូវ៉ែតអំពាវនាវឱ្យពលរដ្ឋខ្មែរបង្កើនការប្រុងប្រយ័ត្នខ្ពស់ ខណៈភាពតានតឹងយោធាក្នុងតំបន់មជ្ឈឹមបូព៌ាកំពុងកើនកម្ដៅ

បានផុស

២ ខែ មុន

នៅ

ថ្ងៃអាទិត្យ ១ មីនា ២០២៦

ដោយ

ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំរដ្ឋកូវ៉ែត សហភាពអារ៉ាប់អេមីរ៉ាត រដ្ឋកាតា និងព្រះរាជាណាចក្របារ៉ែន បានចេញសេចក្តីអំពាវនាវជាបន្ទាន់មួយ កាលពីថ្ងៃទី២៨ ខែកុម្ភៈ ឆ្នាំ២០២៦ ជូនដល់ប្រជាពលរដ្ឋខ្មែរទាំងអស់ដែលកំពុងរស់នៅ ធ្វើការ និងសិក្សានៅក្នុងតំបន់មជ្ឈិមបូព៌ា ឱ្យមានការប្រុងប្រយ័ត្នខ្ពស់បំផុតចំពោះសុវត្ថិភាពផ្ទាល់ខ្លួន។ការប្រកាសអាសន្ននេះ ធ្វើឡើងបន្ទាប់ពីប្រតិបត្តិការយោធារវាងប្រទេសអ៊ីស្រាអែល សហរដ្ឋអាមេរិក និងប្រទេសអ៊ីរ៉ង់ កំពុងតែមានការកើនឡើងគួរឱ្យព្រួយបារម្ភ ដែលអាចបង្កជាហានិភ័យដល់សន្តិសុខក្នុងតំបន់ទាំងមូល។

ភាពតានតឹងនេះកើតឡើងបន្ទាប់ពីអ៊ីស្រាអ៊ែល រួមទាំងអាមេរិកបានបើកការវាយប្រហារលើប្រទេសអេរ៉ង់នៅថ្ងៃទី២៨ ខែកុម្ភៈម្សិលមិញ បណ្ដាលឱ្យមានការតបតពីអេរ៉ង់វិញយ៉ាងខ្លាំងផងដែរលើមូលដ្ឋានយោធាអាមេរិកនៅកូវ៉ែត អារ៉ាប់អេមីរ៉ាត កាតា និងបារ៉ែន ស្ថិតក្នុងភូមិសាស្ត្រក្បែរតំបន់ជម្លោះ។

ស្ថានទូតកម្ពុជាបានជំរុញឱ្យប្រជាពលរដ្ឋខ្មែរទាំងអស់ ត្រូវតាមដានព័ត៌មានជុំវិញខ្លួន និងអនុវត្តតាមរាល់ការណែនាំរបស់អាជ្ញាធរមូលដ្ឋានឱ្យបានដាច់ខាត ដើម្បីធានាសុវត្ថិភាព។ ក្នុងករណីត្រូវការជំនួយផ្នែកកិច្ចការកុងស៊ុល ឬស្ថិតក្នុងស្ថានភាពអាសន្នណាមួយ សូមមេត្តាទាក់ទងមកស្ថានឯកអគ្គរាជទូតកម្ពុជាប្រចាំរដ្ឋកូវ៉ែតជាបន្ទាន់ តាមរយៈលេខទូរស័ព្ទ (+៩៦៥) ២៥៣១ ០០២៩ ឬតាមរយៈសារអេឡិចត្រូនិច [email protected] ដើម្បីទទួលបានការជួយសង្គ្រោះ និងអន្តរាគមន៍ទាន់ពេលវេលា៕