ព័ត៌មានជាតិ

ជំរុញពលរដ្ឋដើមកំណើតឡាវក្នុងខេត្តស្ទឹងត្រែងនិយាយភាសាខ្មែរទូលំទូលាយ រដ្ឋាភិបាលប្រឹងកសាងសាលារៀន និងបញ្ជូនគ្រូទៅតំបន់ជនបទ

បានផុស

៤ ខែ មុន

នៅ

ថ្ងៃព្រហស្បតិ៍ ១៩ មីនា ២០២៦

ដោយ

រាជរដ្ឋាភិបាលមានគោលការណ៍ជំរុញឱ្យមានការនិយាយ និងអានភាសាខ្មែរឱ្យបានទូលំទូលាយជាពិសេសប្រជាពលរដ្ឋដែលរស់នៅតាមតំបន់ព្រំដែន គឺត្រូវតែរៀនភាសាខ្មែរទាំងអស់គ្នា។

ឆ្លើយតបសំនួររបស់កម្ពុជាថ្មី ក្នុងដំណើរទស្សនកិច្ចផ្សព្វផ្សាយសក្តានុពលតំបន់ភូមិភាគឦសាននៃខេត្តស្ទឹងត្រែង ក្រោមការសម្របសម្រួលពីក្លិបអ្នកកាសែតកម្ពុជា លោក សរ សុពុត្រា អភិបាលខេត្តស្ទឹងត្រែងបានឲ្យដឹងថា ខេត្តស្ទឹងត្រែងមានព្រំដែនជាប់ជាមួយប្រទេសឡាវ និងមានប្រវត្តិទំនាក់ទំនងគ្នាយ៉ាងជិតស្និទ្ធជាមួយជនជាតិឡាវ ខណៈពលរដ្ឋមួយចំនួននៅតាមបណ្តាស្រុកជាប់ព្រំដែនក៏និយមប្រើប្រាស់ភាសាឡាវជាងភាសាខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធការទំនោរការប្រើប្រាស់ភាសាឡាវក្នុងខេត្តស្ទឹងត្រែង លោក សរ សុពុត្រា បានបញ្ជាក់ថា ទោះបីជាភាសាខ្មែរជាភាសាផ្លូវការសម្រាប់ការអាន និងការសរសេរក៏ដោយ ក៏រដ្ឋាភិបាលមិនកែប្រែភាសាគ្រាមភាសា ឬទម្លាប់និយាយប្រចាំថ្ងៃរបស់បងប្អូនប្រជាពលរដ្ឋជាមួយក្រុមគ្រួសារ និងអ្នកជិតខាងឡើយ ដែលនេះបង្ហាញពីសុខដុមនីយកម្មជាតិសាសន៍ និងសាសនា។

«ចំណុចនេះបង្ហាញពីសុខដុមនីយកម្ម និងការរក្សាបាននូវសន្តិភាពខាងជំនឿសាសនា និងជាតិសាសន៍ ដែលកម្ពុជាសម្រេចបានតាំងពីជំនាន់សម្ដេចតេជោរហូតមកដល់សម្ដេចធិបតី ដោយមិនមានសង្គ្រាមសាសនា ឬសង្គ្រាមជនជាតិឡើយ»។ លោកអភិបាលខេត្តបញ្ជាក់។

ដើម្បីពង្រីកវិសាលភាពភាសាខ្មែរ រដ្ឋាភិបាលបានកំពុងជំរុញការសាងសង់អគារសិក្សា និងបញ្ជូនលោកគ្រូអ្នកគ្រូទៅកាន់តំបន់ដាច់ស្រយាល ជាពិសេសក្នុងសហគមន៍ជនជាតិភាគតិច ដើម្បីបង្កើនការប្រើប្រាស់ភាសាជាតិឱ្យកាន់តែខ្លាំងក្លានៅក្នុងស្រទាប់ប្រជាពលរដ្ឋ។

បើតាមលោកអភិបាលខេត្ត ការអប់រំមានសារសំខាន់ណាស់ជាពិសេសការបង្កើតមូលដ្ឋានថ្នាក់សិក្សាភាសាជាតិនៅតំបន់ដាច់ស្រយាល។ គោលការណ៍របស់រដ្ឋាភិបាល និងក្រសួងអប់រំជំរុញឱ្យកូនចៅប្រជាពលរដ្ឋរៀនយ៉ាងហោចណាស់ឱ្យបានត្រឹមថ្នាក់ទី ៩ តាមរយៈការពង្រីកការសាងសង់សាលារៀននៅតាមតំបន់ជនបទដាច់ស្រយាល។

អ្នកស្រី ណា អូសា ជំទប់ទី ១ ឃុំកោះស្នែង ស្រុកបុរីអូរស្វាយសែនជ័យ ខេត្តស្ទឹងត្រែងបានប្រាប់កម្ពុជាថ្មីថា ការនិយមនិយាយភាសាឡាវក្នុងចំណោមពលរដ្ឋក្នុងខេត្តស្ទឹងត្រែង កើតមានច្រើនជំនាន់មកហើយ។

ការនិយាយភាសាឡាវនេះក៏មិនសម្តៅពលរដ្ឋដែលមានខ្សែស្រលាយដើមកំណើតឡាវនោះដែរ គឺក៏មាននៅក្នុងចំណោមពលរដ្ឋខ្មែរទូទៅផងដែរ។

អ្នកស្រី ណា អូសា លើកឡើងយ៉ាងដូច្នេះថា «ការប្រើប្រាស់ភាសាឡាវគឺមានទាំងក្នុងចំណោមពលរដ្ឋខ្មែរនិងពលរដ្ឋឡាវ ខណៈនៅខេត្តស្ទឹងត្រែងសំបូរជនជាតិឡាវរស់នៅចម្រុះជាមួយជនជាតិខ្មែរ ហើយការប្រើប្រាស់ភាសាឡាវគឺការនិយមនិយាយតៗគ្នា ជាពិសេសពលរដ្ឋរស់នៅតំបន់ដាច់ស្រយាលជាប់ជាមួយប្រទេសឡាវ»៕