អភិបាលខេត្តកំពត ណែនាំឲ្យមន្ទីរជំនាញពាក់ព័ន្ធត្រៀមម្ហូបជាង៦០មុខសម្រាប់ទទួលភ្ញៀវទេសចរក្នុងឱកាសបុណ្យចូលឆ្នាំខ្មែរនៅ «វិថីអាហារ»

លោក ម៉ៅ ធនិន អភិបាលនៃគណៈអភិបាលខេត្តកំពត បានណែនាំឲ្យមន្ទីរជំនាញពាក់ព័ន្ធត្រៀមលក្ខណៈក្នុងឱ្យសិក្សារៀបចំបញ្ជីមុខម្ហូបអាហារជាបឋមឱ្យបានចំនួនជាង ៦០មុខ សម្រាប់ដាក់ឱ្យអាជីវករលក់ដូរនៅក្នុង«វិថីអាហារ» ដើម្បីទទួលស្វាគមន៍ភ្ញៀវទេសចរជាតិ និងអន្តជាតិក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ។

មានប្រសាសន៍ក្នុងកិច្ចប្រជុំពិភាក្សាលើការងារបើកដំណើការ វិថីម្ហូបអាហារ រសៀលថ្ងៃទី១៩ ខែមីនា ឆ្នាំ២០២៦ លោក ម៉ៅ ធនិន បានលើកឡើងថា អ្វីដែលកាន់តែពិសេសបំផុតនោះ នៅក្នុងចំណោមមុខម្ហូបអាហារទាំងនោះ ក៏មានការដាក់បញ្ចូលនូវប្រភេទនំខ្មែរដែលមានលក្ខណៈបែបប្រពៃណីជាតិ នំដែលជាអត្តសញ្ញាណប្រចាំខេត្តកំពត ព្រមទាំងអាហារដែលមានប្រវត្តិយូរលង់ និងមានទំនៀមទម្លាប់ទាក់ទងនឹងការរស់នៅរបស់ប្រជាពលរដ្ឋក្នុងមូលដ្ឋាន ដើម្បីបង្ហាញដល់ភ្ញៀវទេសចរឱ្យបានស្គាល់កាន់តែច្បាស់ពីមរតកម្ហូបអាហារខ្មែរ។

សូមបញ្ជាក់ថា «វិថីម្ហូបអាហារ» ត្រូវបានអាជ្ញាធរខេត្តកំពតបង្កើតឡើងមិនត្រឹមតែជាការបង្កើតតំបន់កម្សាន្តថ្មីមួយបន្ថែមទៀតនៅក្នុងក្រុងកំពតប៉ុណ្ណោះទេ ប៉ុន្តែថែមទាំងមានការចូលរួមជួយលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋបានមួយកំរិតបន្ថែមទៀត និងមានការអភិរក្សនូវម្ហូបអាហារដែលជាទំនៀមទម្លាប់របស់ជាតិ តាមរយៈការរៀបចំឱ្យមានរបៀបរៀបរយ និងមានសោភ័ណភាព និងធានាបាននូវអនាម័យឱ្យបានស្អាតល្អបំផុតថែមទៀតផងដែ។

រដ្ឋបាលខេត្តកំពត ក៏បានអំពាវនាវ និងគោរពអញ្ជើញភ្ញៀវទេសចរជាតិ និងអន្តរជាតិទាំងអស់ មេត្តាមកចូលរួមគាំទ្រ និងទស្សនាកម្សាន្តឱ្យបានច្រើនកុះករ ដើម្បីរួមគ្នាលើកកម្ពស់មរតកម្ហូបអាហារដែលពាក់ព័ន្ធនឹងទំនៀមទម្លាប់ប្រពៃណីខ្មែរ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ខាងមុខនេះ នៅលើទឹកដីខេត្តកំពត ដែលជាក្រុងបេតិកភណ្ឌរស់រវើកជាមួយម្ហូបអាហារដ៏ឆ្ងុយឆ្ងាញ់ពិសារនៅកន្លែង វិថីអាហារ និងបដិសណ្ឋារកិច្ចដ៏កក់ក្ដៅបំផុតនៅក្នុងក្រុងកំពតខេត្តកំពត៕

អត្ថបទ៖ សឹង រ៉ាត់