អភិបាលខេត្តកំពតដឹកនាំមន្ត្រីជំនាញចុះពិនិត្យវឌ្ឍនភាព វិថីម្ហូបអាហារ ដើម្បីត្រៀមដាក់ឲ្យដំណើរការមុនបុណ្យចូលឆ្នាំថ្មី

នៅព្រឹកថ្ងៃទី២៤ ខែមីនា ឆ្នាំ២០២៦ លោក ម៉ៅ ធនិន អភិបាលខេត្តកំពត បានដឹកនាំមន្ទីរជំនាញ និងអាជ្ញាធរក្រុងកំពត ចុះពិនិត្យវឌ្ឍនភាពដោយផ្ទាល់នៃការរៀបចំទីតាំង វិថីម្ហូបអាហារ ដើម្បីធានាឱ្យទាន់ពេលវេលានៃការបើកឱ្យដំណើរការ ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិ ក្នុងការហូបនំចំណីអាហារនៅលើ វិថីអាហារ ក្នុងក្រុងកំពត ខេត្តកំពត នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរនាពេលឆាប់ៗខាងមុខ។

ក្នុងដំណើរចុះពិនិត្យនេះលោក ម៉ៅ ធនិន អភិបាលខេត្តកំពត បានយកចិត្តទុកដាក់ខ្ពស់លើការរៀបចំហេដ្ឋារចនាសម្ព័ន្ធ រួមទាំងកន្លែងបណ្តាញទឹក និងបណ្ដាញអគ្គិសនី រួមទាំងការរៀបចំស្តង់ដារលក់ដូរឱ្យមានសណ្តាប់ធ្នាប់ ធ្វើយ៉ាងណាឱ្យមានសោភ័ណភាពកាន់តែមានភាពទាក់ទាញ និងមានកន្លែងទីតាំងផាសុខភាពសម្រាប់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ។

លោកអភិបាលខេត្ត ក៏បានជំរុញមន្ទីរជំនាញ និងអាជ្ញាធរក្រុងកំពត ត្រូវរៀបចំកន្លែង វិថីម្ហូបអាហារនេះ មិនត្រឹមតែជាកន្លែងសម្រាប់លក់ដូរ ម្ហូបអាហារចម្រុះជាង ៦០មុខ ប៉ុណ្ណោះនោះទេ ប៉ុន្តែវាក៏ជាទីតាំងកន្លែងផ្នែកមួយដ៏សំខាន់ក្នុងការលើកកម្ពស់សេដ្ឋកិច្ចមូលដ្ឋាន និងមានសោភ័ណភាពទីក្រុងកំពតឱ្យកាន់តែស្រស់បំព្រង និងមានភាពទាក់ទាញភ្ញៀវទេសចរជាតិ និងអន្តរជាតិ មកលេងលម្ហែកម្សាន្ត បានឃើញកន្លែងវឌ្ឍនភាពនៃការរៀបចំដាក់ឱ្យដំណើរការលក់ដូ វិថីអាហារ មុនបុណ្យចូលឆ្នាំថ្មីប្រពៃណីជាតិខ្មែរនៅក្នុងខេត្តកំពតនាពេលឆាបៗខាងមុខនេះ៕

អត្ថបទ៖ សឹង រ៉ាត់