អ្នកឧកញ៉ា ម៉ម វណ្ណឌី ជំរុញអតីតយុទ្ធជនបង្កើនផលិតកម្មកសិកម្ម ទោះជានៅរដូវប្រាំង

ព្រឹកថ្ងៃទី១ ខែមេសា ឆ្នាំ២០២៦ លោកអ្នកឧកញ៉ា ម៉ម វណ្ណឌី អនុប្រធានសមាគមអតីតយុទ្ធជន និងនិវត្តជនកម្ពុជា តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី គន់ គីម បានដឹកនាំក្រុមការងារសមាគមចុះពិនិត្យវឌ្ឍនភាពការប្រមូលម្ទេស  និងការជ្រូកកណ្តុររបស់អតីតយុទ្ធជន និងនិវត្តជនរស់នៅភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។

ក្នុងពេលចុះពិនិត្យវឌ្ឍនភាពដំណាំ និងការប្រមូលផលម្ទេស ការចិញ្ចឹមជ្រូកកណ្តុររបស់អតីតយុទ្ធជន និងនិវត្តជន លោក អ្នកឧកញ៉ា ម៉ម វណ្ណឌី មានប្រសាសន៍កោតសរសើរចំពោះគ្រួសារអតីតយុទ្ធជន និងនិវត្តជន ទាំងអស់ ដែលបានខិតខំប្រឹងប្រែងដាំម្ទេស និងចិញ្ចឹមថែទាំជ្រូកកណ្តុរ បើទោះជារដូវនេះជារដូវប្រាំងមានអាកាសធាតុក្តៅយ៉ាងណាក្តី តែបងប្អូននៅតែអាចថែទាំដំណាំម្ទេសបានល្អទទួលបានទិន្នផលច្រើន និងជ្រូកមានការរីកធំធាត់គួរឱ្យកត់សម្គាល់។

លោក អ្នកឧកញ៉ា ម៉ម វណ្ណឌី បានជំរុញ និងលើកទឹកចិត្តទៅអតីតយុទ្ធជន និងនិវត្តជន ដែលកំពុងដាំ និងប្រមូលផលម្ទេស ចិញ្ចឹមជ្រូកកណ្តុរ ត្រូវតែខិតខំបន្តក្នុងការថែទាំដំណាំ សត្វចិញ្ចឹមឱ្យកាន់តែល្អប្រសើរ និងជាពិសេសត្រូវតាមដានឱ្យជាប់នៃការវិវត្តនានានៃបញ្ហាដែលរំខាន និងប៉ះពាល់ដល់ដំណាំម្ទេស និងជ្រូកដែលខ្លួនចិញ្ចឹម ហើយត្រូវសហការ និងឆាប់រាយការណ៍ពីបញ្ហានានាដែលជួបប្រទះទៅមេភូមិ មន្ត្រីកសិកម្មប្រចាំភូមិ និងប្រធានសហគមន៍ដើម្បីដោះស្រាយឱ្យទាន់ពេលវេលា៕