អាជ្ញាធរខេត្តតាកែវ អំពាវនាវឲ្យប្រជាពលរដ្ឋចូលរួមកម្សាន្ដព្រឹត្តិការណ៍«សង្ក្រាន្តតាកែវ» ឲ្យបានច្រើន

នៅព្រឹកថ្ងៃទី០៨ ខែមេសា ឆ្នាំ២០២៦ លោក ម៉ម កាយ អភិបាលរងនៃគណៈអភិបាលខេត្តតាកែវ បានអញ្ជើញចុះពិនិត្យផ្ទាល់សកម្មភាពរៀបចំ និងតុបតែងលម្អសោភ័ណភាព នៅទីតាំងប្រារព្ធពិធី «សង្ក្រាន្តតាកែវ» ស្ថិតនៅតំបន់មាត់បឹងតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនោះ លោកអភិបាលរងខេត្តបានពិនិត្យលម្អិតលើការរៀបចំទាំងផ្នែកហេដ្ឋារចនាសម្ព័ន្ធ ការរៀបចំទីធ្លា ការតុបតែងភ្លើងពណ៌ និងបរិស្ថានជុំវិញ ដើម្បីធានាឱ្យមានសណ្តាប់ធ្នាប់របៀបរៀបរយ សុវត្ថិភាព និងភាពស្រស់ស្អាត សមស្របសម្រាប់ព្រឹត្តិការណ៍ធំមួយនេះ។

ការចុះពិនិត្យនេះ មានគោលបំណងត្រៀមលក្ខណៈឱ្យបានរួចរាល់ជាមុនសម្រាប់ទទួលស្វាគមន៍ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ដែលនឹងអញ្ជើញមកលេងកម្សាន្តក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល អដ្ឋស័ក ព.ស.២៥៧០ ដែលនឹងមកដល់ក្នុងពេលឆាប់ៗខាងមុខនេះ។

ជាមួយគ្នានេះ រដ្ឋបាលខេត្តតាកែវ ក៏បានអំពាវនាវដល់ជនរួមជាតិទាំងអស់ ឱ្យអញ្ជើញមកចូលរួមលេងកម្សាន្ត និងទស្សនាកម្មវិធីសប្បាយៗជាច្រើន ដែលនឹងត្រូវរៀបចំឡើងយ៉ាងសម្បូរបែប ក្នុងព្រឹត្តិការណ៍ «សង្ក្រាន្តតាកែវ» ឆ្នាំនេះ ៕

​អត្ថបទ៖ វីរៈ