ព័ត៌មានជាតិ

ទីដំណាក់ដំរីរបស់អតីតព្រះមហាក្សត្រខ្មែរ នឹងត្រូវបានរៀបចំអភិរក្សទុកជាតំបន់ទេសចរណ៍

បានផុស

៣ ខែ មុន

នៅ

ថ្ងៃព្រហស្បតិ៍ ៩ មេសា ២០២៦

ដោយ

ទីដំណាក់ដំរីរបស់អតីតព្រះមហាក្សត្រ នឹងត្រូវបានរៀបចំនិងអភិរក្សទុកជាតំបន់ទេសចរណ៍ ក្រោយមានការពិនិត្យនិងឯកភាពពីខាងព្រះបរមរាជវាំង។ នេះបើតាមលោក ញ៉ែម សំអឿន អភិបាលខេត្តរតនគិរី។

ផ្តល់បទសម្ភាសន៍ដល់ក្រុមអ្នកសារព័ត៌មាន ក្នុងដំណើរទស្សនកិច្ចចុះផ្សព្វផ្សាយពីសក្តានុពលនៅខេត្តភាគឦសាន លោក ញ៉ែម សំអឿន អភិបាលនៃគណៈអភិបាលខេត្តរតនគិរីបានឲ្យដឹងថា ទីតាំងប្រវត្តិសាស្ត្រនេះនឹងត្រូវបានអភិរក្សជាគោលដៅទេសចរណ៍ ហើយព្រៃឈើនៅទីនោះត្រូវបានថែរក្សាការពារមិនឲ្យមានការកាប់បំផ្លាញជាដាច់ខាត ខណៈស្ពានឬជណ្ដើរសម្រាប់ឡើងជិះដំរីក៏នឹងត្រូវរក្សាទុកឲ្យនៅដដែលមិនឲ្យមានការប៉ះពាល់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ ពាក់ព័ន្ធភូមិឋានក៏ដូចជាសំណង់ផ្ទះជនជាតិដើមភាគតិច ដែលឃើញមានការសាងសង់សំណង់ថ្មីៗបាត់បង់អត្តសញ្ញាណដើម លោកអភិបាលខេត្តបានលើកឡើងពីការដាក់ចេញវិធានការ ដោយអាជ្ញាធរបានចុះទៅណែនាំដល់ចាស់ទុំ និងមេកន្ទ្រាញក្នុងភូមិឲ្យរក្សារចនាបថសំណង់ផ្ទះបែបប្រពៃណីឲ្យនៅដដែល ទោះបីជាមានការសាងសង់ផ្ទះថ្មីក៏ដោយ ដើម្បីរក្សាភាពទាក់ទាញសម្រាប់ភ្ញៀវទេសចរ ខណៈអាជ្ញាធរខេត្តក៏មានគម្រោងរៀបចំធ្វើខ្លោងទ្វារតាមដងផ្លូវតាមរបៀបប្រពៃណីរបស់ជនជាតិផងដែរ។

យ៉ាងណាមិញ បើតាមលោកអភិបាលខេត្ត ការផ្សារភ្ជាប់ការអភិរក្សទៅនឹងសេដ្ឋកិច្ចមូលដ្ឋាន ត្រូវតែដើរទន្ទឹមគ្នា។

«បើសិនជាតម្រូវឲ្យពួកគាត់ត្រឹមតែអភិរក្ស ដោយមិនទទួលបានផលប្រយោជន៍សេដ្ឋកិច្ច នោះប្រពៃណីទាំងនេះអាចនឹងប្រឈមនឹងការបាត់បង់នៅថ្ងៃណាមួយ»។ លោក ញ៉ែម សំអឿនបញ្ជាក់ មុនលោកបន្ថែមថា «ការចូលរួមថែរក្សាមរតកប្រពៃណីត្រូវការលើកទឹកចិត្តខ្លាំង»។

លោកអភិបាលខេត្តលើកឡើងជាក់ស្តែងផលិតផលស្រាពាង ដែលជាស្រាប្រពៃណីរបស់ជនជាតិភាគតិច បើសិនមានការគាំទ្រជាវយកទៅប្រើប្រាស់ក្នុងកម្មវិធីផ្សេងៗ ក៏ជួយផ្តល់ប្រភពចំណូលដល់សហគមន៍ជនជាតិភាគតិច អាចបន្តផលិតនិងថែរក្សាមុខរបរប្រពៃណីមិនឲ្យមានការបាត់បង់។

ពាក់ព័ន្ធស្រាបឺតប្រពៃណីដែលបងប្អូនជនជាតិដើមភាគតិចផលិតនិងដាក់លក់ លោក ញ៉ែម សំអឿន បានអះអាងថា គឺមានសុវត្ថិភាពនិងអនាម័យ ដោយសារត្រូវបានចុះបញ្ជីក្នុងគម្រោង “ភូមិ១ផលិតផល១” ដែលមានបិទផ្លាកសញ្ញាត្រឹមត្រូវ និងមានការចុះត្រួតពិនិត្យពីក្រសួងជំនាញ»៕