ព័ត៌មានជាតិ

ក្នុងបរិវេណរមណីយដ្ឋានអង្គរ ទេសចរលើកទឹកចិត្តឲ្យជិះកង់ ដើរថ្មើរជើង ជំនួសប្រើប្រាស់ម៉ូតូ ឡាន ដើម្បីទទួលបទពិសោធន៍ជិតស្និទ្ធធម្មជាតិ

បានផុស

១ ខែ មុន

នៅ

ថ្ងៃពុធ ១៣ ឧសភា ២០២៦

ដោយ

លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរាលើកទឹកចិត្តឱ្យភ្ញៀវទេសចរដើរថ្មើរជើង ឬជិះកង់ឱ្យបានច្រើននៅក្នុងបរិវេណតំបន់រមណីយដ្ឋានអង្គរ ជាជាងការប្រើប្រាស់មធ្យោបាយធ្វើដំណើរផ្សេងទៀត ដើម្បីឱ្យភ្ញៀវទេសចរអាចទទួលបានបទពិសោធន៍កាន់តែជិតស្និទ្ធជាមួយធម្មជាតិ។

លោក យិត ចាន់ដារដ្ឋ បានអះអាងថា នៅពេលដើរឬជិះកង់ ភ្ញៀវទេសចរអាចមានឱកាសឃើញសត្វព្រៃផ្សេងៗដូចជា សត្វឈ្លូស ក្ងោក សត្វស្វា សត្វទោច ដែលចុះមកលេងជាមួយមនុស្សក្នុងបរិយាកាសដ៏ស្រស់បំព្រង និងស្ងប់ស្ងាត់។

លោក យិត ចាន់ដារដ្ឋ បានលើកឡើងដូច្នេះថា «តាមរយៈការដើរថ្មើរជើងនេះ ទេសចរមានឱកាសបានមើលឃើញសត្វព្រៃ និងធម្មជាតិបានកាន់តែជិតស្និទ្ធ ដែលវានឹងផ្តល់នូវបទពិសោធន៍ល្អដូចទៅនឹងតំបន់អភិរក្សនៅបរទេសដែរ»។

លោក យិត ចាន់ដារដ្ឋ មើលឃើញថា ការងាកមកប្រើប្រាស់មធ្យោបាយធ្វើដំណើរដែលស្និទ្ធស្នាលនឹងបរិស្ថានផ្តល់ភាពវិជ្ជមានច្រើន ខណៈការប្រើប្រាស់យានយន្តដូចជាឡាន និងម៉ូតូ ចំនួនច្រើន បង្កផលប៉ះពាល់ទៅដល់មនុស្ស ដើមឈើ ធម្មជាតិជុំវិញ និងតួប្រាសាទផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា

ដោយឡែកពាក់ព័ន្ធកិច្ចការអភិរក្សនៅតំបន់រមណីយដ្ឋានអង្គរ លោក យិត ចាន់ដារដ្ឋ បានអះអាងថា ជួបការលំបាកច្រើន ដោយសារសកម្មភាពរបស់មនុស្ស។

បញ្ហាទាំងនោះមានដូចជា ការលួចដាក់អន្ទាក់ចាប់សត្វ ឬបរបាញ់សត្វព្រៃ និងបញ្ហាអនាម័យបរិស្ថាន ដូចជាការបន្ទោរបង់ពាសវាលពាសកាលនៅតាមព្រៃជាដើម ដែលទាមទារឱ្យមានការចូលរួមទាំងអស់គ្នា។

បើតាមមន្រ្តីអាជ្ញាធរជាតិអប្សរា វត្តមាននៃសត្វព្រៃ និងព្រៃឈើមិនត្រឹមតែជួយដល់បរិស្ថានប៉ុណ្ណោះទេ ប៉ុន្តែក៏ជួយកាត់បន្ថយកម្ដៅ និងបង្កើតជាបរិយាកាសដ៏ទាក់ទាញសម្រាប់ភ្ញៀវទេសចរមកកម្សាន្តផងដែរ៕