ព័ត៌មានជាតិ

គោយន្តមួយគ្រឿងសង្ស័យជ្រុលចង្កូតបុកតាកូម៉ា សំណាងល្អមិនមានអ្នកស្លាប់

បានផុស

៥ years មុន

នៅ

ថ្ងៃសុក្រ ១៣ វិច្ឆិកា ២០២០

ដោយ

ករណីគ្រោះថ្នាក់ចរាចរណ៍មួយ បានកើតឡើងរវាងគោយន្តកែច្នៃ បើកបរលឿនជ្រុលចង្កូតបុករថយន្តតាកូម៉ា បណ្តាលឲ្យភាគីទាំងសងខាងរងរបួសស្រាល ក្នុងទិសដៅបញ្ច្រាសគ្នា។

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១និង៣០នាទីរសៀល កាលពីថ្ងៃទី១២ ខែវិច្ឆិកា ឆ្នាំ២០២០ តាមបណ្តោយផ្លូវជាតិលេខ៧៨ ស្ថិតនៅក្នុងភូមិអ៊ុន ឃុំលំជ័រ ស្រុកអូរយ៉ាដាវ ខេត្តរតនគិរី។

មន្ត្រីនគរបាលស្រុកអូរយ៉ាដាវបានឲ្យដឹងថា អ្នកបើកគោយន្តមានឈ្មោះ អេង ង៉ុយ ភេទប្រុស អាយុ៣០ឆ្នាំ ជនជាតិខ្មែរ ដែលគោយន្តពាក់ស្លាកលេខ រតនគិរី 6A-0024 រស់នៅភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី រងរបួសស្រាល និងមានអ្នករួមដំណើរម្នាក់ឈ្មោះ ព្រហ្ម សុភី ភេទប្រុស អាយុ២២ឆ្នាំ ជនជាតិខ្មែរ បច្ចុប្បន្នរស់នៅភូមិ-ឃុំជាមួយគ្នា រងរបួសស្រាល ដោយបើកបរក្នុងទិសដៅពីលិចទៅកើត។ រីឯជនរងគ្រោះបើកបររថយន្តតូយូតា(តាកូម៉ា)ពណ៌ទឹកប្រាក់ ពាក់ស្លាកលេខ ភ្នំពេញ 2T-4057 មានឈ្មោះ កែវ វិមាន ភេទប្រុស អាយុ២៤ឆ្នាំ ជនជាតិខ្មែរ បច្ចុប្បន្នរស់នៅភូមិ២ សង្កាត់ទឹកល្អក់២ ខណ្ឌទួលគោក រាជធានីភ្នំពេញ រងរបួសស្រាល បើកបរក្នុងទិសដៅពីកើតទៅលិច។

មន្ត្រីនគរបាលបានបន្តថា គោយន្តបង្កបានបើកលើសល្បឿនកំណត់ក្នុងទីប្រជុំជន ទើបបណ្ដាលឲ្យជ្រុលចង្កូតទៅបុកជាមួយនិងរថយន្តតាកូម៉ា ប៉ុន្តែសំណាងល្អហើយមិនមាននរណាម្នាក់គ្រោះថ្នាក់ដល់អាយុជីវិតឡើយ។ ដោយឡែកវត្ថុតាងទាំង២គ្រឿង ត្រូវបានកម្លាំងសមត្ថកិច្ចជំនាញនិងប៉ុស្តិ៍រដ្ឋបាលឃុំលំជ័រ រឹបអូសយកមករក្សាទុក នៅកន្លែងអធិការដ្ឋាននគរបាលស្រុកអូរយ៉ាដាវ ដើម្បីរង់ចាំធ្វើការដោះស្រាយគ្នានៅពេលក្រោយ។

សូមបញ្ជាក់ថា គោយន្តកែច្នៃបង្កខាងលើនេះ បុកជាមួយនិងរថយន្តតាកូម៉ានោះ គឺបានដឹកបារីពេញប្រៀប ចេញពីក្រុងបានលុងឆ្ពោះទៅព្រំដែនវៀតណាមតាមច្រករបៀងភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី៕

អត្ថបទ៖ អ៊ុច សាវុទ្ធ

សូមចុចអាន៖ មន្ត្រីជំនាញអះអាងថា បញ្ហាសត្វគោងាប់ជាង៣០ក្បាលនៅក្នុងស្រុកស្រីស្នំគឺសង្ស័យដោយសារជំងឺអុតក្ដាម

Related Topics:គ្រោះថ្នាក់ចរាចរណ៍