ព័ត៌មានជាតិ

ក្រសួងប្រៃសណីយ៍ សម្រេចលុប និងព្យួរអាជ្ញាប័ណ្ណប្រតិបត្តិករទូរគមនាគមន៍១៧ក្រុមហ៊ុន

បានផុស

៦ years មុន

នៅ

ថ្ងៃព្រហស្បតិ៍ ២២ តុលា ២០២០

ដោយ

ក្រសួងប្រៃសណីយ៍ និងទូរគមនាគមន៍ បានសម្រេចលុប និងព្យួរអាជ្ញាប័ណ្ណប្រតិបត្តិករទូរគមនាគមន៍ចំនួន១៧ មិនឲ្យធ្វើអាជីវកម្ម ជាបន្តទៀត។

យោងតាមសេចក្ដីប្រកាសព័ត៌មានរបស់ក្រសួងប្រៃសណីយ៍ និងទូរគមនាគមន៍ដែលទើបទទួលបាននៅថ្ងៃនេះ បានឲ្យដឹងថា ការសម្រេចចិត្តលុប និងព្យួរអាជ្ញាប័ណ្ណក្រុមហ៊ុនទាំង១៧នោះ ដោយពិនិត្យឃើញថាមានប្រតិបត្តិករទូរគមនាគមន៍មួយចំនួន គេចវេះ មិនបង់ចំណូលចូលរដ្ឋជាច្រើនឆ្នាំ មិនមានប្រតិបត្តិការ ឯខ្លះទៀត លាក់ចំណូលរបស់ខ្លួន។

បើតាមក្រសួងប្រៃសណីយ៍ បានបញ្ជាក់ថា «មុននឹងសម្រេចលុប និងព្យួរអាជ្ញាប័ណ្ណ ក្រសួង បានចាត់ក្រុមការងារអធិការកិច្ចចុះពិនិត្យលើប្រតិបត្តិការរបស់ក្រុមហ៊ុន។

ក្នុងនោះ ដោយប្រមូលព័ត៌មាន អំពីស្ថានភាពដំណើរការអាជីវកម្ម ស្ថានភាពបច្ចេកទេស និងស្ថានភាពហិរញ្ញវត្ថុរបស់ក្រុមហ៊ុននីមួយៗ ទើបក្រសួង បានសម្រេចលុប និងព្យួរអាជ្ញាប័ណ្ណរបស់ប្រតិបត្តិករទូរគមនាគមន៍១៧ក្រុមហ៊ុន ដោយសារភាពអសកម្មដូចជា មិនមានសកម្មភាពអាជីវកម្ម គ្មានបុគ្គលិកបម្រើការងារ មិនបានធ្វើស្វ័យប្រកាសបង់ចំណូល និងកាតព្វកិច្ចផ្សេងតាមលក្ខខណ្ឌ នៃអាជ្ញាប័ណ្ណ និងពុំបានផ្ដល់ឯកសារបច្ចេកទេសជាដើម»។

យ៉ាងណាក៏ដោយ ក្រសួង បានណែនាំឲ្យប្រតិបត្តិករដែលត្រូវបានលុបអាជ្ញាប័ណ្ណ ត្រូវមកទូទាត់បំណុលដែលជំពាក់ក្រសួង និយ័តករទូរគមនាគមន៍កម្ពុជា និងបំណុលរដ្ឋឯកជន កាតព្វកិច្ចពន្ធដារ។ បន្ថែមពីនោះ ត្រូវមានកាតព្វកិច្ចទទួលខុសត្រូវចំពោះបុគ្គលិក អតិថិជន តតិយជន ស្របតាមច្បាប់ និងបទប្បញ្ញត្តិជាធរមាន ក្នុងករណីមានការតវ៉ាកើតឡើងជាយថាហេតុ ពាក់ព័ន្ធនឹងការលុបអាជ្ញាប័ណ្ណនេះ។

ក្រសួង បានក្រើនរំលឹកថា កន្លងមក ក្រសួង បានចេញជាសេចក្ដីជូនដំណឹងជាបន្តបន្ទាប់ដល់ប្រតិបត្តិករទូរគមនាគមន៍ទាំងអស់ ឲ្យគោរពតាមច្បាប់ ស្ដីពីទូរគមនាគមន៍ និងបទប្បញ្ញត្តិ ពាក់ព័ន្ធជាធរមាន។ ប៉ុន្តែ ក្រសួង ឃើញថា មានប្រតិបត្តិករមួយចំនួន នៅតែមិនអនុវត្ត ឬមិនទាន់បានអនុវត្តពេញលេញតាមច្បាប់ ឬលក្ខខណ្ឌ នៃអាជ្ញាប័ណ្ណ។ ដូច្នេះ ក្នុងករណីប្រតិបត្តិករណានៅតែបន្តគេចវេះ មិនអនុវត្តតាមច្បាប់ និងមិនគោរពលក្ខខណ្ឌ នៃអាជ្ញាប័ណ្ណ ប្រតិបត្តិករទាំងនោះ នឹងប្រឈមការព្យួរអាជ្ញាប័ណ្ណជាបណ្ដោះអាសន្ន ឬលុបអាជ្ញាប័ណ្ណលែងឲ្យធ្វើអាជីវកម្មជាបន្តទៀត។

គួរបញ្ជាក់ថា ក្នុងចំណោមប្រតិបត្តិករទូរគមនាគមន៍ចំនួន១៧ក្រុមហ៊ុននោះ មាន១៦ក្រុមហ៊ុន ត្រូវបានលុបអាជ្ញាប័ណ្ណ និងក្រុមហ៊ុន១ទៀត ព្យួរអាជ្ញាប័ណ្ណសម្រាប់សេវាអ៊ីនធឺណិត៕

អត្ថបទ ៖ សំអឿន

Related Topics:ក្រសួងប្រៃសណីយ៍ និងទូរគមនាគមន៍