យុវតី​ពីរ​នាក់ អាយុ ១៨ និង ១៦ ឆ្នាំ ជួប​គ្រោះថ្នាក់​ចរាចរណ៍​រង​របួស​ធ្ងន់

(ខេត្តកំពត)៖ យុវតីពីរនាក់បានរងរបួសយ៉ាងដំណំក្នុងហេតុការគ្រោះថ្នាក់ចរាចរណ៍ ខណៈជនរងគ្រោះជិះម៉ូតូឌុបគ្នានៅលើដងផ្លូវ ហើយបានប៉ះទង្គិចជាមួយរថយន្តប្រភេទសណ្តោងក្នុងទិសដៅបញ្រ្ចាសគ្នា។

ឧប្បត្តិហេតុនេះបានកើតឡើងនៅវេលាម៉ោង៩និង៣៥នាទីព្រឹក ថ្ងៃទី១៥ ខែវិច្ឆិកា ឆ្នាំ២០២០ ត្រង់ចំណុចមុខទួលបញ្ចុះសពសមាគមចិន ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត លើកំណាត់ផ្លូវជាតិលេខ៣១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានពីសមត្ថកិច្ច ដែលចុះមកអន្តរាគមន៍នៅចំណុចកើតហេតុបាននិយាយថា ករណីគ្រោះថ្នាក់ចរាចរណ៍នេះ ផ្តើមឡើងដោយសារអ្នកបើកបរទាំងសងខាង មានការធ្វេសប្រហែសទើបបណ្តាលឲ្យជួបហេតុការណ៍អាក្រក់បែបនេះ។

ប្រភពដដែលបានបញ្ជាក់ថា មុនពេលជួបគ្រោះថ្នាក់ ម៉ូតូជនរងគ្រោះជិះគ្នាពីរនាក់ធ្វើដំណើរមកពីកើតទៅលិច អ្នកបើកបរម៉ូតូឈ្មោះ ព្រំ សុខលីដា ភេទស្រី អាយុ១៨ឆ្នាំ(របួសធ្ងន់) និងអ្នករួមដំណើរ ឈ្មោះ ហ៊ុយ ច័ន្ទបុប្ផា ភេទស្រី អាយុ១៦ឆ្នាំ (របួសធ្ងន់)។ អ្នកទាំង២​ រស់នៅភូមិដើមពោធិ៍ ឃុំអង្គសុរភី ស្រុកកំពង់ត្រាច ខេត្តកំពត។ដោយឡែករថយន្តបង្កម៉ាកសណ្តោង ធ្វើដំណើរមកពីលិចទៅកើត(បញ្រ្ចាសគ្នា) អ្នកបើកបរ ឈ្មោះ សេន ពិសិដ្ឋ ភេទប្រុស អាយុ៣៦ឆ្នាំ មានទីលំនៅភូមិព្រៃសៀម ឃុំជីរ៉ូ ស្រុកត្បូងឃ្មុំ ខេត្តត្បូងឃ្មុំ។

ក្រោយពីវាស់វែង មធ្យោបាយពាក់ព័ន្ធត្រូវបានសមត្ថកិច្ចនាំយកទៅរក្សាទុកនៅអធិការដ្ឋាននគរបាលស្រុកកំពង់ត្រាច។ចំណែកយុវតីរងគ្រោះទាំងពីរនាក់ ដោយសារស្ថានភាពរបួសធ្ងន់ធ្ងរពេក ក្រុមគ្រួសារបានបញ្ជូនទៅសង្គ្រោះនៅឯមន្ទីរពេទ្យខេត្តតាកែវ៕

អត្ថបទ៖ សេង ណារិទ្ធ