ព័ត៌មានជាតិ

មិនដល់មួយថ្ងៃផង ចាប់បានមុខសញ្ញាជួញដូរ៣នាក់ រួមទាំងថ្នាំញៀនជាង ១គីឡូក្រាម

បានផុស

៥ years មុន

នៅ

ថ្ងៃសុក្រ ១១ មិថុនា ២០២១

ដោយ

ជនសង្ស័យចំនួន៣នាក់ ដែលជាមុខសញ្ញាជួញដូរថ្នាំញៀន រួមនិងថ្នាំញៀនជាង១គីឡូក្រាម ត្រូវបានចាប់ខ្លួនជាបន្តបន្ទាប់ក្នុងថ្ងៃតែមួយ។

លោកវរសេនីយ៍ឯក សុខ និមល នាយការិយាល័យនគរបាលប្រឆាំងគ្រឿងញៀន បានបញ្ជាក់ថា កិច្ចប្រតិបត្តិការនេះ បានធ្វើឡើងកាលពីវេលាម៉ោង ៣ ទៀបភ្លឺ កាលពីថ្ងៃទី១០ ខែមិថុនា ឆ្នាំ២០២១ ដោយកម្លាំងអធិការស្រុកសំពៅលូន សហការជាមួយកម្លាំងអធិការស្រុកកំរៀង បានធ្វើឡើងត្រង់ចំណុចភូមិអូរស្ងាត់ ឃុំសន្តិភាព ស្រុកសំពៅលូន ខេត្តបាត់ដំបង។

លោកនាយការិយាល័យបានបន្តថា នៅក្នុងកិច្ចប្រតិបត្តិការកម្លាំងបានឃាត់ខ្លួនមុខសញ្ញាបានចំនួន២នាក់ មានឈ្មោះ ជួន ណារីន ភេទប្រុស អាយុ២២ឆ្នាំ និងឈ្មោះ ស៊ុយ ពិសិទ្ធ ភេទប្រុស អាយុ២២ឆ្នាំ ជនទាំង២រស់នៅឃុំបឹងរាំង ស្រុកកំរៀង ដោយសមត្ថកិច្ចដកហូតបានថ្នាំញៀនប្រភេទម៉ាទឹកកក១ថង់ មានទម្ងន់ ១០០,២៥ក្រាម ថ្នាំញៀនប្រភេទយ៉ាម៉ាចំនួន ២៨គ្រាប់។

តាមការសារភាព និងដោយមានការឯកភាពបីលោកព្រះរាជអាជ្ញា កែវ សុជាតិ កម្លាំងបានបន្តកិច្ចប្រតិបត្តិការទៅកាន់ចំណុចភូមិដូង ឃុំបឹងរាំង ស្រុកកំរៀង នៅវេលាម៉ោង១២ថ្ងៃត្រង់ ដោយមានឃាត់ខ្លួនមេខ្លោងម្នាក់ឈ្មោះ សែម សុខមាន ភេទប្រុស អាយុ៣៥ឆ្នាំ និងដកហូតបានថ្នាំងញៀនប្រភេទម៉ាទឹកកក៧ ថង់ មានទម្ងន់ ១០៣៨,៧២ ក្រាម កាំភ្លើងខ្យល់១ដើម។ បច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញរៀបចំបញ្ជូនទៅតុលាការហើយ៕