សម្ដេចតេជោ ហ៊ុន សែន ទទួល​ជួបឯកអគ្គរដ្ឋទូតវៀត ណាម ក្រោយបញ្ចប់ការធ្វើចត្តាឡីស័ក

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី៣ ខែកក្កដា ឆ្នាំ ២០២១ នេះ បានអនុញ្ញាតឱ្យលោក វូ ក្វាង មិញ (Vu Quang Minh) ឯកអគ្គរដ្ឋទូត នៃសាធារណរដ្ឋសង្គមនិយម វៀត​ណាម ប្រចាំនៅព្រះរាជាណាចក្រកម្ពុជា ចូលជួបសម្តែងការគួសម និងជម្រាបលា ក្នុងឱកាសដែលលោកឯកអគ្គរដ្ឋទូតបានបញ្ចប់អាណត្តិបេសកកម្មការទូតប្រកបដោយជោគជ័យនៅកម្ពុជា។

សូមបញ្ជាក់ថា សម្ដេចអគ្គមហាសេនាបតីតេជោ ហ៊ុន សែន បានបញ្ចប់ការធ្វើចត្តាឡីស័ក រយៈ១៤ ថ្ងៃ កាលពីម្សិល បន្ទាប់ពីសម្តេចបានប៉ះពាល់ដោយប្រយោលជាមួយអ្នកវិជ្ជមាន។

ជាមួយគ្នានោះ សម្ដេចក៏ត្រូវធ្វើតេស្តជាលើកចុងក្រោយផងដែរ ហើយលទ្ធផលបង្ហាញថា អវិជ្ជមាន។ សម្តេចបានបញ្ជាក់ថា ក្នុងចំណោមមេដឹកនាំ នៃបណ្តាប្រទេសអាស៊ាន ប្រហែលជា មានតែសម្តេចទេ ដែលធ្វើចត្តាឡីស័កច្រើនជាងគេ រហូតដល់ទៅ៣ដង ក្នុងរយៈពេល៨ខែ។ ហើយសង្ឃឹមថា នឹងពុំមានលើកទី៤ទៀតទេ។

សម្តេចតេជោ ហ៊ុន សែន បញ្ជាក់ដែរថា ដើម្បីធានាថា ពុំមានលើកទី៤ មនុស្សដែលត្រូវជួបសម្តេច នឹងត្រូវធ្វើតេស្តជា​មុន ឬយ៉ាងហោចណាស់ត្រូវធ្វើតេស្តរហ័ស ហើយដើម្បីកាន់តែធានាសម្រាប់ទាំងអស់គ្នាទៀតនោះ គឺការមិនជួបគ្នាដោយផ្ទាល់ ដែលជំនួសដោយការជួបគ្នាតាមប្រព័ន្ធបច្ចេកវិទ្យាព័ត៌មានវិញ៕

អត្ថបទ៖ បាន វិបុល