ក្រុមសិល្បករ ជាជនពិការ សិល្បករបុរាណសម័យជាង២០០នាក់ ទទួលព្រះរាជអំណោយពីព្រះមហាក្សត្រ

ភ្នំពេញ៖ ក្រុមសិល្បករ ជាជនពិការ សិល្បករបុរាណ និងប្រពៃណីផ្នែកភ្លេង ចម្រៀង របាំ ល្ខោន ចាប៉ីដងវែង ចំនួន២០២នាក់ បានទទួលព្រះរាជអំណោយរបស់សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាតាមរយៈសម្តេចចៅហ្វាវាំង វរវៀងជ័យ អធិបតីស្រឹង្គា គង់ សំអុល។

ព្រះរាជអំណោយត្រូវបានប្រគល់ជួននៅថ្ងៃទី៣ ខែកក្កដា ឆ្នាំ២០២១នៅទីស្តីការក្រសួងវប្បធម៌ និងវិចិត្រសិល្បៈ។ 

ក្នុងឱកាសដ៏ឧត្តុង្គឧត្តមវិសេសថ្លៃថ្លានេះ លោក ស្រី បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានសម្តែងនូវអំណរព្រះគុណយ៉ាងជ្រាលជ្រៅ ថ្វាយព្រះករុណា ជាអម្ចាស់ជីវិតតម្កល់លើត្បូង ដែលព្រះអង្គសព្វព្រះរាជហឫទ័យ ប្រោសប្រទាន ព្រះរាជអំណោយដ៏ថ្លៃថ្លាចំពោះក្រុមសិល្បករជាជនពិការ សិល្បករបុរាណ និងប្រពៃណីផ្នែកភ្លេង ចម្រៀង របាំ ល្ខោន ចាប៉ីដងវែង ចំនួន២០២នាក់ ។ 

ក្នុងនាមថ្នាក់នាំក្រសួង លោកស្រីបានមានប្រសាសន៍ថា« ខ្ញុំសូមលំអោនកាយក្រាបថ្វាយព្រះរាជសព្ទសាធុការពរ បវរមហាប្រសើរថ្វាយ ព្រះករុណា ជាអម្ចាស់ ជីវិតតម្កល់លើត្បូង ជាទីគោរពសក្ការ:ដ៏ខ្ពង់ខ្ពស់បំផុត សូមព្រះអង្គប្រកបដោយព្រះបរមសុខ ព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា និងមានព្រះជន្មយឺនយូរជាងរយព្រះវស្សា ដើម្បីគង់ប្រថាប់ក្នុងព្រះបរមសិរីរាជសម្បត្តិ និងជាម្លប់ដ៏ត្រជាក់ត្រជុំសម្រាប់កូនចៅទូទាំងប្រទេស តរៀងទៅ»។ 

គួរបញ្ជាក់ថា ព្រះរាជអំណោយក្នុងឱកាសនោះរួមមាន អង្ករ ៥០គីឡូក្រាម ឃីត ១កញ្ចប់ (មុង ១ ក្រមា ១ ភួយ១ សារ៉ុង១) ម៉ាស ១ដុំ មី ១កេស ត្រីខ ១០កំប៉ុង និងអាវយឺត មានស្លាកព្រះរាជអំណោយ ព្រមទាំងថវិកា ៥០០,០០០៛៕

អត្ថបទ៖ សំអឿន