ព័ត៌មានជាតិ

ក្រសួងនឹងអនុវត្តតាមច្បាប់យ៉ាងតឹងរ៉ឹងបំផុត ចំពោះរថយន្តដឹកជញ្ជូនលើសទម្ងន់កំណត់

បានផុស

៥ years មុន

នៅ

ថ្ងៃសៅរ៍ ១០ កក្កដា ២០២១

ដោយ

រថយន្តដឹកលើសទម្ងន់កម្រិតកំណត់៦គ្រឿងត្រូវបានពិន័យតាមច្បាប់ ស្តីពីផ្លូវថ្នល់ មាត្រា៦០ និងតាមសេចក្ដីជូនដំណឹងលេខ០៤៩ ស ជ ណ សក. គ ត ល ទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រ ១៥រោច ខែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៩ ខែកក្កដា ឆ្នាំ២០២១ ក្រុមការងារចល័តចម្រុះសម្រាប់ឆ្មក់ត្រួតពិនិត្យយានយន្តលើសទម្ងន់ នៃគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនយានយន្ដលើសទម្ងន់កម្រិតកំណត់បានឃាត់រថយន្តលើសទម្ងន់កម្រិតកំណត់ចំនួន៦គ្រឿង ដែលដឹកលើសទម្ងន់ចាប់ពី៥តោន រហូតដល់ ២១តោន។

ក្នុងនោះរថយន្ត២គ្រឿងដែលជារថយន្តដឹកជញ្ជូនលើសទម្ងន់ លើសពី២០% នៃទម្ងន់អនុញ្ញាត ត្រូវបានរក្សាទុកចំនួន ១ឆ្នាំដោយអនុលោមតាមច្បាប់ស្តីពីផ្លូវថ្នល់ មាត្រាទី៦០ និងតាមសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់។

ប្រតិបត្តការនេះបានធ្វើឡើងចាប់ពីវេលាម៉ោង ១២ថ្ងៃត្រង់ ដល់ម៉ោង ៣រសៀលនៅលើចំណុចផ្លូវព្រែកហូរ ភូមិសាស្ត្រព្រំប្រទល់រវាងរាជធានីភ្នំពេញ-ខេត្តកណ្តាល។

ជាមួយគ្នានេះក្រសួងសាធារណការ និងដឹកជញ្ជូន សូមក្រើនរំលឹកជូនដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ជាថ្មីម្តងទៀតថា៖ ក្រសួងនឹងបន្តអនុវត្តតាមច្បាប់ និងសេចក្ដីជូនដំណឹងខាងលើយ៉ាងតឹងបំផុតដោយគ្មានការលើកលែងឡើយ៕

អត្ថបទ ៖ រ៉ាវុទ្ធ