ព័ត៌មានជាតិ

បើកយុទ្ធនាការចាក់វ៉ាក់សាំងជំងឺកូវីដ ៣គោលដៅ ជូនប្រជាពលរដ្ឋក្នុងក្រុងស្ទឹងត្រែង

បានផុស

៥ years មុន

នៅ

ថ្ងៃអង្គារ ១៣ កក្កដា ២០២១

ដោយ

មន្ត្រីមន្ទីរសុខាភិបាល ខេត្តស្ទឹងត្រែង នៅព្រឹកថ្ងៃទី១៣ ខែកក្កដា ឆ្នាំ២០២១នេះ បានបើកយុទ្ធនាការចាក់ថ្នាំវ៉ាក់សាំងបង្ការជំងឺកូវីដ១៩ ចំនួន៣គោលដៅ ជូនប្រជាពលរដ្ឋនៅក្នុងក្រុងស្ទឹងត្រែង ចាប់ពីថ្ងៃទី១៣កក្កដានេះ ទៅមានរយៈពេល១៤ថ្ងៃ។

លោក អ៊ុង សូវៀត ប្រធានមន្ទីរសុខាភិបាលខេត្តបានបញ្ជាក់ថា គោលដៅចំនួន៣កន្លែងនោះ ទី១. នៅសាលាវិទ្យាល័យព្រះបូជនីយកិច្ច ទី២. នៅសាលាវិទ្យាល័យស្រែពោធិសង្កាត់ស្រះឬស្សី និងទី៣.នៅបរិវេណមណ្ឌលកីឡាដ្ឋានខេត្ត។

លោកវេជ្ជបណ្ឌិតប្រធានមន្ទីរមានប្រសាសន៍ទៀតថា ក្នុងយុទ្ធនាការចាក់វ៉ាក់សាំង(ស៊ីណូហ្វាម-ស៊ីណូវ៉ាក់)បង្ការជំងឺកូវីដ១៩នេះ មានរយៈពេល១៤ថ្ងៃចាប់ពីថ្ងៃ១៣ ខែកក្កដានេះ រហូតដល់ថ្ងៃទី ២៦កក្កដា ដើម្បីឲ្យប្រជាពលរដ្ឋទទួលបានវ៉ាក់សាំងបង្ការជំងឺកូវីដ១៩។ លោកវេជ្ជបណ្ឌិតបន្តថា នេះជាវិធានការ ( បង្ការប្រសើរជាងព្យាបាល) ហើយក្រុមគ្រូពេទ្យប្រឹងប្រែងឱ្យអស់លទ្ធភាពក្នុងយុទ្ធនាការណ៍ចាក់វ៉ាក់សាំង ដើម្បីបម្រើប្រជាពលរដ្ឋឈានទៅពង្រឹងការអនុវត្តវិធានការសុខាភិបាលឱ្យមានប្រសិទ្ធភាព។

លោក ប៊ុន ចាន់ថន ប្រជាពលរដ្ឋនៅក្រុងស្ទឹងត្រែងបានបញ្ជាក់ថា ថ្ងៃនេះដើម្បីចូលរួមអនុវត្តវិធានការណ៍ដឹកនាំដ៏ខ្ពង់ខ្ពស់របស់រាជរដ្ឋាភិបាល និងតាមការណែនាំរបស់ក្រសួងសុខាភិបាល ប្រជាពលរដ្ឋយើងបាននាំគ្នា មកចាក់ថ្នាំវ៉ាក់សាំងបង្ការជំងឺឆ្លងកូវីដ១៩ ដើម្បីធ្វើឱ្យស្ថានភាពរស់នៅក្នុងគ្រួសារមានភាពប្រសើរឡើង។

លោកបានកត់សម្គាល់ថា ការចាក់ថ្នាំវ៉ាក់សាំងបង្ការជំងឺកូវីដ១៩នេះ និងមានប្រសិទ្ធភាព ព្រោះបច្ចុប្បន្ននៅតាមបណ្តាខេត្តមួយចំនួន និងរាជធានីភ្នំពេញ ប្រជាពលរដ្ឋយើងក៏បានចាក់ច្រើនហើយដែរ។ លោកចង់ឱ្យក្រសួងសុខាភិបាលរៀបចំឱ្យប្រជាពលរដ្ឋទទួលបានការចាក់វ៉ាក់សាំងនេះ ឱ្យបានគ្រប់ៗគ្នាចាប់ពីវ័យកុមារឡើងទៅ ដើម្បីធានាការបង្ការជំងឺកូវីដ១៩នេះ ឱ្យមានប្រសិទ្ធភាព៕

អត្ថបទ៖ ងិនលីម