ព័ត៌មានជាតិ

លោកជំទាវ ឱ វណ្ណឌីន ៖ ក្រសួងនៅតែរក្សាអនុវត្តរយៈពេលការធ្វើចត្តាឡីស័ក១៤ថ្ងៃដដែល

បានផុស

៣ years មុន

នៅ

ថ្ងៃពុធ ១៤ កក្កដា ២០២១

ដោយ

លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានមានប្រសាសន៍នៅថ្ងៃទី១៤ ខែកក្កដានេះថា រហូតមកដល់ពេលនេះ ក្រសួងសុខាភិបាលនៅមិនទាន់មានការផ្តាស់ប្តូរថ្ងៃធ្វើចត្តាឡីស័កនៅឡើយទេ ពោលគឺនៅតែរក្សាការអនុវត្តការធ្វើចត្តាឡីស័ករយៈពេលចំនួន១៤ថ្ងៃដដែល ។

ការលើកឡើងរបស់លោកជំទាវនេះ គឺជាការឆ្លើយតបទៅនឹងសំណើររបស់សមាគមរោងចក្រកាត់ដេរនៅកម្ពុជា ដែលដាក់សំណើរទៅរដ្ឋាភិបាលសុំកាត់បន្ថយចំនួនថ្ងៃនៃការធ្វើចត្តាឡីស័កពី១៤ថ្ងៃ មកនៅត្រឹម៧ថ្ងៃវិញ ដោយសារកម្មករនិយោជិតបានចាក់វ៉ាក់សាំងបាន២ដូសហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសំណើររបស់សមាគមរោងចក្រកាត់ដេរនោះបានលើកឡើងថា វិស័យឯកជនបានចាក់វ៉ាក់សាំងការពារជំងឺកូវីដ-១៩ចំនួន២ដូសហើយ គួរកាត់បន្ថយពីការធ្វើចត្តាឡីស័កពី១៤ថ្ងៃ មកនៅ៧ថ្ងៃវិញ ហើយវិស័យឯកជនពេលនេះ ក៏មានឧបករណ៍សម្រាប់ធ្វើតេស្តរហ័សរកកូវិដ-១៩ ចំនួន៧០ម៉ឺនតេស្តហើយដែរ ដែលការចំណាយ ជាបន្ទុករបស់រោងចក្រ ឬក្រុមហ៊ុន។

សមាគមរោងចក្រកាត់ដេរបានបន្តថា ការចាក់វ៉ាក់សាំងការពារជំងឺកូវីដ-១៩បានចំនួន២ដូសហើយ បើឆ្លងកូវីដ-១៩ ក៏វាមានលក្ខណៈស្រាលដែរ មិនធ្ងន់ធ្ងរពិបាកក្នុងការព្យាបាលនោះទេ។

សំណើរសុំរបស់សមាគមនេះ ត្រូវបានលើកយកមកពិភាក្សានៅក្នុងកិច្ចប្រជុំមួយតាមប្រព័ន្ធVideo Conference ដោយមានការចូលរួមពីលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ។ ប៉ុន្តែនៅក្នុងកិច្ចប្រជុំនោះ នៅមិនទាន់មានដំណោះស្រាយនៅឡើយទេ។

លោកជំទាវ ឱ វណ្ណឌីនបានបន្តថា«រឿងរយៈពេលធ្វើចត្តាឡីស័កត្រូវរង់ចាំ ប៉ុន្តែក្នុងកំឡុងពេលដែលមិនទាន់មានការសម្រេច គឺត្រូវអនុវត្តដូចធម្មតាសិន។ មានន័យថា១៤ថ្ងៃដដែល»។

លោកស្រីបានបន្ថែមថា ប្រសិនបើមានការប្រែប្រួលចំនួនថ្ងៃនៃការធ្វើចត្តាឡីស័កនោះ ក្រសួងនឹងជម្រាបជួនដល់សាធារណជនជាបន្តបន្ទាប់ទៀត៕

អត្ថបទ ៖ សំអឿន