ដុតកម្ទេចគ្រឿងញៀនបានពីបទល្មើសជាង ១ពាន់ សំណុំរឿង នៅ៦ខេត្ត

ខេត្តបាត់ដំបង៖​ នៅព្រឹកថ្ងៃទី២៩ ខែកក្កដា ឆ្នាំ២០២១នេះ នៅលើទីលានបាល់ទាត់ ស្ថិតក្នុងសង្កាត់រតន: ក្រុងបាត់ដំបង ខេត្តបាត់ដំបង មានការរៀបចំពិធីដុតកម្ទេចគ្រឿងញៀនរួមគ្នាដែលតុលាការនៃខេត្តចំនួន៦ បានដកហូតពីបទល្មើសព្រហ្មទណ្ឌ ចំនួនជាង ១,០០០ សំណុំរឿង។

ពិធីដុតកម្ទេចគ្រឿងញៀននេះគឺធ្វើឡើងដើម្បីប្រារព្ធពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ឆ្នាំ២០២១ ក្រោមអធិបតីភាពនាយឧត្តមសេនីយ៍ មាស វីរិទ្ធ អគ្គលេខាធិការ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន អាជ្ញាធរខេត្ត ព្រះរាជអាជ្ញា និងមន្ត្រីរាជការ លើខេត្តចំនួន៦បានអញ្ជើញចូលរួម ក្នុងនោះមានខេត្ត បាត់ដំបង សៀមរាប បន្ទាយមានជ័យ ពោធិ៍សាត់ បៃ៉លិន និងខេត្ត ឧត្តមានជ័យ។

សំណុំរឿងព្រហ្មទណ្ឌ និងគ្រឿងញៀនដែលបានដកហូតតាមអំណាចសាលក្រមស្ថាពររបស់តុលាការទាំង៦ខេត្ត សរុបមានចំនួន ១,០៩១ សំណុំរឿង ដោយឡែកគ្រឿងញៀនសរុបមានទម្ងន់ ៦២,៥០៧.៦៨ ក្រាម ក្នុងនោះប្រភេទម៉ាទឹកកកទម្ងន់ ៦០,១៤១.៧៩ ក្រាម ប្រភេទយ៉ាម៉ាចំនួន ២២,៩៩៤.៥ គ្រាប់ ថ្នាំគ្រវីទម្ងន់ ២៧៩ ក្រាម និងថ្នាំគ្រវីប្រភេទទឹកចំនួន ៤៤៥ ដប៕

អត្ថបទ៖ សោ និយមរ័ត្ន