បឹងប្រវត្តិបុរាណមួយ រងការលួចទន្ទ្រានយកធ្វើជាកម្មសិទ្ធិបុគ្គល ដោយសារហាងឆេងដីមានតម្លៃ

ខេត្តកណ្តាល៖ បឹងធម្មជាតិដ៏ធំវែងមួយកន្លែងដែលមានជាប់ពាក់ព័ន្ឋជាមួយប្រវត្តិសាស្រ្តខ្មែរបុរាណផង មានអាយុជិត១ពាន់ឆ្នាំមកហើយនោះ បានរងការលួចទន្ទ្រានរំលោភយកពីឧកញ៉ា និងក្រុមឈ្មួញអ្នកមានលុយកាក់ ក្នុងរយៈពេលប៉ុន្មានឆ្នាំចុងក្រោយថ្មីៗនេះ ដោយសារតែហាងឆេងដីមានតម្លៃខ្ពស់។

បឹងនោះ មានឈ្មោះថា “បឹងរោងទូក” មានទីតាំងនៅខាងកើតរមណីយដ្ឋានភ្នំព្រះរាជទ្រព្យប្រហែលជាង១គីឡូម៉ែត្រ ស្ថិតក្នុងឃុំផ្សារដែក ឃុំភ្នំបាត និងឃុំពញាឮ ស្រុកពញាឮខេត្តកណ្តាល។

វិសាលភាពនៃបឹងរោងទូកកាលពីក្រោយឆ្នាំ១៩៧៩ធំណាស់ និងមានប្រវែងរាប់គីឡូម៉ែត្រលាតសន្ធឹងពីជើងទៅត្បូង ខាងកើតនៅជាប់ឃុំពញាឮ ខាងលិចជាប់ឃុំផ្សារដែក និងឃុំភ្នំបាត ស្រុកពញាឮ ខេត្តកណ្តាល។

បច្ចុប្បន្ន “បឹងរោងទូក” បានរងការរំលោភបំពានទន្ទ្រានយកពីសំណាក់ឧកញ៉ា និងក្រុមឈ្មួញអ្នកមានលុយមួយចំនួនទៀត ដោយមានការត្រូវរ៉ូវគ្នាពីមន្ត្រីថ្នាក់ដឹកនាំមូលដ្ឋាន កាលពីរយៈពេលកន្លងមកនេះ។

ដោយសារតែលួចទន្ទ្រានយកបែបនេះបានធ្វើឱ្យផ្ទៃ បឹងរោងទូក នេះនៅរួមតូច ហើយចំណុចខ្លះសូម្បីតែប្រជាទៅនេសាទត្រី នៅទីនោះក៏មិនបានផង មានការហាមឃាត់ពីអ្នកការពារដីឱ្យយឈ្មួញ ជាហេតុធ្វើឱ្យប្រជាជនមានការរិះគន់ថា មានការបើកដៃឱ្យឈ្មួញលួចទន្ទ្រានយកដីបឹងតាមចិត្ត។

ថ្មីៗនេះក៏មានការលួចទន្ទ្រានចាក់ដីលប់យកផ្នែកខ្លះនៃ បឹងរោងទូក នេះជាច្រើនកន្លែងដែរ ប៉ុន្តែកន្លែងខ្លះត្រូវបានបង្ក្រាប ឯកន្លែងខ្លះទៀតមិនបានបង្ក្រាប។

លោក ថន សុវណ្ណា អភិបាលស្រុកពញាឮ ដែលទើបឡើងមកកាន់តំណែងបានជាង៣ឆ្នាំកន្លងមកនេះ បានមានប្រសាសន៍តបប្រាប់ភ្នាក់ងារ “កម្ពុជាថ្មី” ថា លោកបានបញ្ជាឱ្យបង្ក្រាបការលួចទន្ទ្រានយកដីបឹងនេះបាន ១ករណី នៅក្នុងឃុំពញាឮ។

បើតាមចាស់ៗនៅតំបន់នោះបាននិយាយប្រាប់កូនចៅតៗគ្នាថា បឹងរោងទូក នេះមានប្រវត្តិសាស្ត្រជាប់ពាក់ព័ន្ឋនឹងស្តេចជំនាន់មុនជាច្រើនតំណ និងមានអាយុកាលជាង១ពាន់ឆ្នាំមកហើយ គឺបឹងនេះមានតាំងពីមុនស្តេចជំនាន់មុនបានបង្កើតរាជវាំងនៅក្រុងឧដុង្គ និងក្រោយមកបង្កើតរាជវាំងនៅលង្វែកដែលកាលនោះដែនដីខ្មែរសម្បូរទឹកធំជាងដែនដីគោក ហើយបានប្រើទូក ឬសំពៅធ្វើជាយានជំនិះសំរាប់ដឹកជញ្ជូនកងទ័ពទៅធ្វើសង្គ្រាមច្បាំងការពារទឹកដី ដោយបានយកបឹងនេះធ្វើជាចំណតចតទូក ចតសំពៅផ្សេងៗ នៅទីនោះព្រោះនៅក្បែរវាំង ឬបន្ទាយដោយមានធ្វើជំរក ឬរោងការពារ ទូកនោះផង ទើបប្រជាជនសម័យនោះបានហៅបឹងនេះ ថា “បឹងរោងទូក” តៗគ្នារហូតមកដល់សព្វថ្ងៃនេះ។

“បឹងរោងទូក” ជាបឹងដ៏មានសារៈសំខាន់មួយផ្តល់ផលប្រយោជន៍ប្រជាជនរាប់ម៉ឺនគ្រួសារយកទឹកបឹងនេះសម្រាប់ស្រោចស្រពដំណាំស្រូវ និងបន្លែបង្ការផ្សេងៗ និងជាអាងសម្រាប់នេសាទត្រីរបស់ពួកគាត់ផងដែរ៕

អត្ថបទ៖ ប៊ុនសឿន