ពលរដ្ឋលបលួចសាងសង់រោងស្នាក់នៅលើដីរដ្ឋ ត្រូវអាជ្ញាធរចុះរុះរើ

ភ្នំពេញ៖ ប្រជាពលរដ្ឋមួយចំនួនតូចដែលតែងតែនាំគ្នាបំពានច្បាប់ លបលួចសាងសង់រោងស្នាក់នៅលើដីរដ្ឋ នៅពេលនេះត្រូវអាជ្ញាធរមូលដ្ឋានចុះរុះរើភ្លាមៗ។

ជាក់ស្តែងនៅព្រឹកថ្ងៃទី៥ ខែសីហានេះ កម្លាំងគណៈបញ្ជាការឯកភាពខណ្ឌច្បារអំពៅ ដឹកនាំដោយលោក ហ៊ត គឺមនី អភិបាលរងខណ្ឌ បានចុះទៅធ្វើការរុះរើសំណង់មិនរៀបរយលើដីរបស់រដ្ឋក្នុងភូមិដើមចាន់១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

យោងតាមប្រភពពីលោក យុិន វុធ ចៅសង្កាត់ច្បារអំពៅទី២ បានឱ្យ “កម្ពុជាថ្មី” ដឹងថា សំណង់មិនរៀបរយដែលកម្លាំងគណៈបញ្ជាការឯកភាពខណ្ឌច្បារអំពៅចុះរុះរើនៅព្រឹកនេះ គឺចំនួន៥ខ្នងដែលសុទ្ធសឹងជាសំណង់មិនរៀបរយ ធ្វើពីឈើប្រកស័ង្កសី និងប្រកក្រណាត់កៅស៊ូ។

លោកចៅសង្កាត់បញ្ជាក់ទៀតថា ដំបូងឡើងគឺពួកគេសាងសង់ជារោងរស់នៅបណ្តោះអាសន្ន លុះយូរៗទៅទើបពួកគេចាប់ផ្តើមសាងសង់រឹងមាំតែម្តង។ ប៉ុន្តែអាជ្ញាធរមិនបណ្តោយឱ្យមានសំណង់មិនរៀបរយលើដីហាមឃាត់ដែលជាដីរបស់រដ្ឋឡើយ។

ប្រជាពលរដ្ឋរស់នៅក្នុងភូមិដើមចាន់១ គាំទ្រនូវចំណាត់ការរបស់អាជ្ញាធរដែលប្រើប្រាស់កម្លាំងទប់ស្កាត់ទាន់ពេល ដែលក្រុមនេះពីមុនទៅសង់សំណង់លើផ្ទៃទឹកបន្លំជាមួយផ្ទះទឹក ហៅបែចិញ្ចឹមត្រី។ លុះដល់ពេលអាជ្ញាធររុះរើអស់ បែជាមកសង់លើដីច្រាំងទន្លេដែលជាតំបន់ហាមឃាត់ទៅវិញ៕

អត្ថបទ៖ នរា