ព័ត៌មានជាតិ

ខេត្តតាកែវបន្សល់ទុកប្រាសាទបុរាណ ២៧ កន្លែង ខ្លះសល់តែឈ្មោះ ខ្លះសង់លើភ្នំ

បានផុស

៤ years មុន

នៅ

ថ្ងៃអង្គារ ១០ សីហា ២០២១

ដោយ

លោកស្រី វ៉ែន វណ្ណា ប្រធានការិយាល័យបេតិកភណ្ឌនៃមន្ទីរវប្បធម៌ខេត្តតាកែវបានប្រាប់កម្ពុជាថ្មីនៅព្រឹកនេះថា នៅទូទាំងខេត្តតាកែវមានប្រាសាទបុរាណទាំងអស់សរុបចំនួន ២៧ ប្រាសាទ តែនៅសល់រូបរាងតែ ១៤ ក្រៅពីនោះបាក់បែក ខ្លះសល់តែគ្រឹះនិងឈ្មោះប៉ុណ្ណោះ។

មន្រ្តីគ្រប់គ្រងផ្នែកបេតិកភណ្ឌជាតិនៅខេត្តតាកែវ លោកស្រី វ៉ែន វណ្ណាបានបន្តថា ក្នុងចំណោមប្រាសាទទាំងអស់មានប្រាសាទចំនួន ៤ ដែលបុព្វបុរសខ្មែរសាងសង់នៅលើភ្នំ មានប្រាសាទភ្នំដា ប្រាសាទភ្នំជីសូរ ប្រាសាទបាយ៉ង់ និងប្រាសាទភ្នំតាម៉ៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបន្តថា ប្រាសាទដែលមានរូបរាងត្រូវបានមន្ទីរយកចិត្តទុកដាក់អភិវឌ្ឍជួសជុលតាមដំណាក់កាល ហើយប្រាសាទដែលបាក់បែកសល់គ្រឹះនិងឈ្មោះ មន្ទីរក៏បានរៀបចំដាក់ស្លាកសម្គាល់ដើម្បីភ្ញៀវទេសចរពេលទស្សនាអាចស្វែងយល់ និងការពារប្រជាពលរដ្ឋក្នុងការទន្រ្ទានប៉ះពាល់ដល់រតនសម្បត្តិកេរ្តិ៍ដំណែលទាំងនោះ។

គួរបញ្ជាក់ថា ប្រាសាទទាំង ២៧ នៅខេត្តតាកែវ មានស្រុកគីរីវង់ចំនួន ៧ ប្រាសាទ ស្រុកទ្រាំងចំនួន ៧ ប្រាសាទ ស្រុកអង្គរបុរី ចំនួន ២ ប្រាសាទ ស្រុកសំរោងចំនួន ៥ ប្រាសាទ ស្រុកបាទីចំនួន ៥ ប្រាសាទ និងក្រុងដូនកែវ ១ ប្រាសាទ។ ក្នុងចំណោមប្រាសាទទាំងអស់នោះ ប្រាសាទមានភ្ញៀវទេសចរណ៍ទៅលេងច្រើនមានប្រាសាទភ្នំដា និងប្រាសាទភ្នំជីសូរ។

នៅអត្ថបទក្រោយ កម្ពុជាថ្មីនឹងលម្អិតឈ្មោះប្រាសាទទាំង ២៧ រួមទាំងទីតាំងប្រាសាទទាំងអស់នោះដើម្បីមិត្តអ្នកអាន សិស្សនិស្សិតអាចសិក្សាស្វែងយល់ពីកេរមរតតិដូនតានេះ ជាពិសេសអ្នកតាកែវបានស្គាល់សម្បត្តិដូនតាក្នុងខេត្តរបស់ខ្លួនផងដែរ៕

អត្ថបទ៖ ប៊ុណ្ណារ៉ា