ព័ត៌មានជាតិ

មេព្រៃខេត្តសៀមរាបចាប់រថយន្តរបស់ក្រុមហ៊ុនវីរៈប៊ុនថាំ ដែលបង្កប់ដឹកសត្វតុកែ ល្មើសច្បាប់

បានផុស

៥ years មុន

នៅ

ថ្ងៃអង្គារ ១៧ សីហា ២០២១

ដោយ

សៀមរាប ៖ កម្លាំងផ្នែករដ្ឋបាលព្រៃឈើបន្ទាយស្រី បានធ្វើការឃាត់រថយន្តដឹកឥវ៉ាន់ ១គ្រឿងរបស់ក្រុមហ៊ុនវីរៈប៊ុនថាំ ដែលបង្កប់ដឹកសត្វតុកែ ល្មើសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ឃាត់នេះ ធ្វើឡើងនៅថ្ងៃទី១៧ ខែសីហា ឆ្នាំ២០២១នេះ ស្ថិតនៅតាមបណ្តោយផ្លូវលេខ៦៧ត្រង់ ចំណុច ឃុំបល័ង្គ ស្រុកប្រាសាទបាគង ខេត្តសៀមរាប។

លោកម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប បានឲ្យដឹងតាមទូរសព្ទថា រថយន្តដែលកម្លាំងជំនាញ រដ្ឋបាលព្រៃឈើ ធ្វើការឃាត់នេះ បានដឹកឥវ៉ាន់មកពីខេត្តមណ្ឌលគីរី ហើយបាន មកដល់ខេត្តព្រះវិហារក៏បានចូលដាក់ កេសឥវ៉ាន់ ដែលមានសត្វតុកែដាក់ក្លាស់សេទឹកកក ដឹកមកកាន់ខេត្តសៀមរាប ឆ្ពោះទៅកាន់ខេត្តព្រះសីហនុ។

លោកបន្តថា សត្វតុកែនេះ មានចំនួន៩៨៤ក្បាល បច្ចុប្បន្នកម្លាំងរដ្ឋបាលព្រៃឈើខេត្តសៀមរាប ក៏បានធ្វើការផាកពិន័យនៅតាមច្បាប់ព្រៃឈើឆ្នាំ២០០២ផងដែរ។ បច្ចុប្បន្ននេះ វត្ថុតាងនិងរថយន្តត្រូវបានរក្សាទុកនៅផ្នែករដ្ឋបាលស្រុកបន្ទាយស្រី ខេត្តសៀមរាប ដើម្បីរង់ចាំម្ចាស់ក្រុមហ៊ុនចូលខ្លួនមកដោះស្រាយតាមផ្លូវច្បាប់។

ពាក់ព័ន្ធនឹងករណីនេះដែរ គេបានកោតសរសើរចំពោះកម្លាំងសមត្ថកិច្ចខណ្ឌរដ្ឋបាលព្រៃឈើខេត្តសៀមរាប ដែលបានបង្ក្រាបករណីជួញដូរសត្វព្រៃទាំងនេះបាន គឺជារថយន្តដឹកទំនិញដែលគេសន្និដ្ឋានថា អាចដឹកមកច្រើនដងរួចមកហើយ៕

ដោយ ៖ កុសល