ដឹងច្បាស់ហើយករណីភ្លើង​ឆាបឆេះរោងម៉ាស៊ីនកិនស្រូវមួយកន្លែងនៅខណ្ឌដង្កោ

រោងម៉ាស៊ីនកិនស្រូវ មួយកន្លែងនៅក្នុងមូលដ្ឋានខណ្ឌដង្កោ ត្រូវបានភ្លើងឆាបឆេះ បង្កការភ្ញាក់ផ្អើលដល់សមត្ថកិច្ចមូលដ្ឋានបញ្ចេញរថយន្តពន្លត់អគ្គីភ័យជាង១០គ្រឿង ដើម្បីជួយអន្តរាគមន៍ នាវេលាម៉ោង ៩ និង៣៥នាទី ថ្ងៃទី២៦ ខែវិច្ឆិកា ឆ្នាំ២០២០ នៅតាមបណ្តោយផ្លូវជាតិលេខ២ ភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចខណ្ឌដង្កោ ប្រាប់ឲ្យដឹងថា ទីតាំងដែលកើតហេតុគ្រោះអគ្គីភ័យ នេះ គឺជាឃ្លាំងសម្ងួតស្រូវ ដែលមានម្ចាស់ឈ្មោះ ប៊ុន សុធី ភេទប្រុស អាយុ ៤៣ឆ្នាំ ហើយមូលហេតុនៃការឆាបឆេះ គឺបណ្តាល មកពីភ្លើងចង្ក្រានសម្ងួតខ្ទាតចំសំបកបាវចាស់ៗ នៅក្បែរនោះ ទើបបង្កជាគ្រោះអគ្គីភ័យតែម្តង ។

សូមបញ្ជាក់ថា ទីតាំងដែលឆេះនេះ ជាប្រភេទសំណង់ ឃ្លាំងថ្មប្រក់ស័ង្កសី ទំហំ ៤០ម៉ែត្រ x ៧០ម៉ែត្រ។ សម្ភារៈខូចខាត រោងដាក់សំបកបាវទំហំ ៣ម៉ែត្រ x ២០ម៉ែត្រ (ពុំមានមនុស្សរងរបួស) ។

ក្នុងប្រតិបត្តិការជួយអន្តរាគមន៍ សមត្ថកិច្ចប្រើរថយន្ដពន្លត់អគ្គីភ័យ ពីការិល័យអគ្គីភ័យ ចំនួន៨គ្រឿង និងរថយន្តស្នងការដ្ឋាននគរបាលខេត្ដកណ្ដាល ចំនួន៣គ្រឿង ព្រមទាំងរថយន្តអគ្គីភ័យ ក្រុមហ៊ុនស្រាបៀរកម្ពុជា ចំនួន១គ្រឿង ៕

អត្ថបទ ៖ រ៉ាវុទ្ធ