ព័ត៌មានជាតិ

ផ្សារទាំងអស់ត្រូវរៀបចំឱ្យបានស្អាត និងយកសំណាកអាជីវករឱ្យបានរួចរាល់ទើបឱ្យបើកឡើងវិញ

បានផុស

៥ years មុន

នៅ

ថ្ងៃពុធ ២៥ សីហា ២០២១

ដោយ

លោក គួច ចំរើន អភិបាលនៃគណៈអភិបាលខេត្តព្រះសីហនុ បានមានប្រសាសន៍ថា គ្រប់ផ្សារទាំងអស់ដែលបានបិទកន្លងមក គឺត្រូវតែរៀបចំសណ្តាប់ធ្នាប់ អនាម័យឱ្យបានស្អាតត្រឹមត្រូវ ហើយចំពោះបងប្អូនអាជីវករត្រូវយកសំណាកឱ្យបានរួចរាល់ និងអនុវត្តតាមលក្ខខណ្ឌដែលបានរដ្ឋបាលខេត្តបានចេញ ទើបអនុញ្ញាតឱ្យបើកដំណើរការឡើងវិញ។

ក្នុងឱកាសចុះត្រួតពិនិត្យមើលតាមផ្សារកាលពីថ្ងៃទី២៤ ខែសីហា លោកអភិបាលខេត្ត បានស្នើឱ្យបងប្អូនអាជីវករទាំងអស់ត្រូវរួមសហការជាមួយអាជ្ញាធរមានសមត្ថកិច្ចឱ្យបានល្អប្រសើរដោយអនុវត្តឱ្យបានខ្ជាប់ខ្ជួនតាមវិធានការណែនាំដើម្បីទប់ស្កាត់ការឆ្លងរាលដាលជំងឺកូវីដ-១៩ និងធានាបាននូវសុវត្ថិភាពទាំងអស់គ្នា។

គិតត្រឹមថ្ងៃទី២៤ ខែសីហា ឆ្នាំ២០២១ នេះ រដ្ឋបាលខេត្តព្រះសីហនុ បានចេញសេចក្តីសម្រេចបើកឱ្យដំណើរការផ្សារចំនួន០៣ មានដូចជា ផ្សារលើ ផ្សារដារ៉ាសំណាង និងមជ្ឈមណ្ឌលពាណិជ្ជកម្ម ក្រុងព្រះសីហនុ(ហៅផ្សារចិន) នៅក្នុងក្រុងព្រះសីហនុ ដោយសារផ្សារទាំងនេះបានបំពេញគ្រប់លក្ខខណ្ឌ និងបានឆ្លងកាត់ការត្រួតពិនិត្យនិងវាយតម្លៃពីអនុគណៈកម្មការទី៦(អនុគណៈកម្មការរៀបចំគ្រប់គ្រងផ្សារ ភោជនីយដ្ឋាន អាហារដ្ឋាន និងអាជីវកម្មលក់ដូររបស់ប្រជាពលរដ្ឋ)។

ដោយឡែកចំពោះផ្សារនៅក្នុងស្រុកព្រៃនប់ កាលពីថ្ងៃទី១៣ ខែសីហា ឆ្នាំ២០២១ ក្រុមការងារអនុគណៈកម្មការទី៦ បានចុះបានពិនិត្យ និងផ្សព្វផ្សាយដល់អ្នកគ្រប់គ្រងផ្សារចំនួន០៣ គឺផ្សារវាលរេញ ផ្សារអូរចំណារ និងផ្សារកោះខ្យង អំពីលក្ខខណ្ឌនៅក្នុងការបើកដំណើរការផ្សារឡើងវិញជាពិសេសការអនុវត្តតាមវិធានរដ្ឋបាល និងសុខាភិបាល ក្នុងការចូលរួមទប់ស្កាត់ការឆ្លងរាលដាលជំងឺកូវីដ-១៩។

មកដល់ពេលនេះក្រុមការងារអនុគណៈកម្មការទី៦ បានទទួលពាក្យស្នើសុំបើកដំណើរការផ្សារឡើងវិញ មានចំនួន០២ផ្សារ គឺផ្សារវាលរេញ និងផ្សារអូរចំណារ។ ក្នុងនោះក្រុមការងារអនុគណៈកម្មការទី៦ នឹងចុះទៅត្រួតពិនិត្យតាមពាក្យស្នើសុំ នៅព្រឹកថ្ងៃទី២៦ ខែសីហា ឆ្នាំ២០២១ខាងមុខនេះ។

គួរបញ្ជាក់ថា លក្ខខណ្ឌមួយចំនួនចំពោះបងប្អូនអាជីវករដើម្បីអាចចូលទៅបើកលក់ដូរវិញបានមានដូចខាងក្រោម៖

-អាជីវករដែលអនុញ្ញាតឱ្យចូលលក់ដូរបានលុះណាតែមានប័ណ្ណចាក់វ៉ាក់សាំងរួចពីរដង។

-អាជីវករទាំងអស់អស់ត្រូវយកសំណាករកមេរោគកូវីដ-១៩ តាមការចាំបាច់ស្របតាមការជូនដំណឹងរបស់អ្នកគ្រប់គ្រង ផ្សារឬអាជ្ញាធរមូលដ្ឋាន។

-ក្នុងផ្សារត្រូវបាញ់ថ្នាំ/អាកុល សម្លាប់មេរោគរាល់សប្តាហ៍។

-ករណីមានបុគ្គលណាមានអាការៈសង្ស័យត្រូវសហការជាមួយក្រុមគ្រូពេទ្យដើម្បីយកសំណាកភ្លាម។

-អាជីវករទាំងអស់ត្រូវរៀបចំតូបរបស់ខ្លួនឱ្យមានលក្ខណៈស្រឡះទូលាយមានខ្យល់ចេញចូលគ្រប់គ្រាន់ និងរៀបចំដាក់អោយរបៀបរៀបរយ មានអាកុល ពាក់ម៉ាស់និងមិនអនុញ្ញាតឱ្យប្រមូលផ្ដុំគ្នាឡើយ។

-អ្នកមកទិញឥវ៉ាន់ឬអតិថិជនត្រូវតែតម្រង់ជួរដោយរក្សាគម្លាតឱ្យបាន១,៥ ម៉ែត្រពីគ្នា។ ប្រសិនបើម្ចាស់តូបមិនអនុវត្តតាមការណែនាំនេះឬមិនធ្វើតាមការណែនាំរបស់គណៈគ្រប់គ្រងផ្សារម្ចាស់ផ្សារឬមន្ត្រីមានសមត្ថកិច្ចហើយត្រូវបានរកឃើញថា មានហានិភ័យខ្ពស់ក្នុងការចម្លងមេរោគកូវីដ-១៩ នឹងត្រូវផ្អាកមិនឱ្យប្រកបអាជីវកម្មនៅក្នុងផ្សារឡើយ។ ម្ចាស់ផ្សារត្រូវទទួលខុសត្រូវនិងធានាបាននូវការអនុវត្តការណែនាំនេះឱ្យមានប្រសិទ្ធភាព៕

អត្ថបទ ៖ សំអឿន

Related Topics:រដ្ឋបាលខេត្តព្រះសីហនុ