សមត្ថកិច្ច​កាត់ទ្រុងរថយន្តខុសលក្ខណះបច្ចេកទេសចំនួន៦ គ្រឿង

ក្រោយពីសមត្ថកិច្ចចុះពង្រឹងសុវត្ថិភាពចរាចរណ៍ផ្លូវគោក រកឃើញរថយន្តធុនធំតទ្រុងខុសពីលក្ខណះបច្ចេកទេសចំនួន៦គ្រឿង ដែលកំពុងស្ថិត​ក្រោមចំណាត់ការរបស់សមត្ថកិច្ចក្នុងការកាត់ទ្រុងអោយត្រឹមត្រូវតាមលក្ខណះបច្ចេកទេសឡើងវិញ។ លោកវរសេនីយ៍ឯកចាន់.សុធីនាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបងបានឲ្យដឹងថា ការចុះអនុវត្តច្បាប់ចរាចរណ៍ផ្លូវគោកនេះបានធ្វើឡើងនៅព្រឹកថ្ងៃទី២៦ខែវិច្ឆកាឆ្នាំ២០២០នេះ។

លោកថា ការចុះពង្រឹងសុវត្ថិភាពចរាចរណ៍ផ្លូវគោកនេះ ដោយមានការចូលរួមសហការរវាងអនុគណះកម្មការសុវត្ថិភាពចរាចរណ៍ផ្លូវគោកខេត្តដឹកនាំ ដោយរូបលោកផ្ទាល់ជាមួយ និងមន្ត្រីសាធារណការនិងដឹកជញ្ជូនខេត្តបានចុះអនុវត្តនៅត្រង់ចំណុចផ្លូវវាងក្រុងតាមបណ្តោយផ្លូវជាតិលេខ៥៧ជាលទ្ធផលបានឃាត់រថយន្តដឹកលើសទម្ងន់ផ្ទុកនិងតទ្រុងខុសលក្ខណ:បច្ចេកទេសចំនួន៦គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈដែលកំពុងប្រតិបត្តិការត្រួតពិនិត្យសមត្ថកិច្ចបានអនុវត្តវិធានការកាត់ទ្រុងរថយន្តចំនួន១គ្រឿងជាក់ស្តែងនៅនឹងកន្លែងដែលរថយន្តនេះបានផ្គើនតទ្រុងឡើងលើរហូតដល់កន្លះម៉ែត្រ និងតតួបណ្តោយទ្រុងលយចេញមកក្រោយលើសចំនួន១,៨០ម៉ែត្រចំណែករថយន្តល្មើសចំនួន៥គ្រឿងផ្សេងទៀតសមត្ថកិច្ចតម្រូវឱ្យផ្ទេរទំនិញចេញជាមុនសិនទើបអនុវត្តកាត់ទ្រុងនៅពេលក្រោយ។

លោកវរសេនីយ៍ឯកចាន់.សុធីបានបន្តថា ក្នុងចំណោមរថយន្តដែលក្រុមជំនាញពិនិត្យនិងឃាត់ទាំង៦គ្រឿងក៏មានរថយន្តមួយចំនួនធ្លាប់បានរកឃើញ និងពិន័យកាត់ទ្រុងចោលម្តងរួចមកហើយដែរប៉ុន្តែម្ចាស់មិនរាងចាលបានផ្គើនតទ្រុងដឹកជញ្ជូនឡើងវិញ។លោកបញ្ជាក់ថា ក្នុងករណីនេះបើម្ចាស់រថយន្តមិនរាងចាលដោយបំពាននឹងច្បាប់បន្តទៀតលើកក្រោយបើរកឃើញល្មើសបែបនេះអាចឃាត់រថយន្តទាំងនោះទុកហើយបញ្ឍប់មិនឱ្យធ្វើអាជីវកម្មបន្តទៀតឡើយចៀសវាងមានបញ្ហាគ្រោះថ្នាក់កើតឡើងនិងប៉ះពាល់ដល់ផ្លូវថ្នល់យ៉ាងធ្ងន់ធ្ងរផងដែរ៕

សៅ សារិទ្ធ