កីឡា

ក្រុមនារីកម្ពុជា ប៉ះ សិង្ហបុរី រសៀលថ្ងៃនេះដណ្តើមមេដាយសំរិទ្ធ ពាន AFF Women’s Cup

បានផុស

៤ នាទី មុន

នៅ

ថ្ងៃពុធ ២២ កក្កដា ២០២៦

ដោយ

ក្រុមបាល់ទាត់ជម្រើសជាតិនារី កម្ពុជា ត្រូវប្រកួតជាមួយ ក្រុមនារីសិង្ហបុរី វេលាម៉ោង ៣:៤៥នាទីរសៀលថ្ងៃនេះ (ម៉ោងនៅកម្ពុជា) ដើម្បីដណ្តើមចំណាត់ថ្នាក់លេខ ៣ (មេដាយសំរិទ្ធ) ក្នុងពានរង្វាន់ AFF Women’s Cup ឆ្នាំ ២០២៦ នៅប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់នារី កម្ពុជា ជាក្រុមលេខ ១ ក្នុងពូល B តាមរយៈជ័យជម្នះ ៣-១ លើក្រុមនារី ទីម័រខាងកើត និងស្មើជាមួយ ក្រុមនារី ឥណ្ឌូណេស៊ី ១-១ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ ជួប ក្រុមនារីឡាវ ដែលជាក្រុមលេខ ២ ក្នុងពូល A បន្ទាប់ពីស្មើ ១-១ ជាមួយ សិង្ហបុរី និងស្មើ ១-១ ជាមួយម្ចាស់ផ្ទះ ម៉ាឡេស៊ី។

ទោះបីជាយ៉ាងណា ក្រុមនារីកម្ពុជា ពិតជាសោកស្តាយខ្លាំងនៅវគ្គពាក់កណ្តាលផ្តាច់ព្រ័ត្រ ដោយបានចាញ់ នារីឡាវ ដោយលទ្ធផល ១-០ បើទោះបីជាពួកគេគ្រប់គ្រងការប្រកួតស្ទើរទាំងតាំងពីវគ្គទី១ រហូតដល់វគ្គទី២។ ដូច្នេះក្រុមនារី កម្ពុជា ត្រូវប្រកួតជាមួយ សិង្ហបុរី ដើម្បីដណ្តើមចំណាត់ថ្នាក់លេខ ៣។ ចំណែក ឡាវ ត្រូវប្រកួតជាមួយ ឥណ្ឌូណេស៊ី ដើម្បីដណ្តើមជើងឯក (មេដាយមាស)។

បើនិយាយពីប្រវត្តិជួបគ្នា ក្រុមនារីកម្ពុជា និង សិង្ហបុរី ធ្លាប់បានជួបគ្នា ២ លើក គឺកាលពីឆ្នាំ ២០២៣ ក្នុងព្រឹត្តិការណ៍កីឡាស៊ីហ្គេម លើកទី៣២ ដែលពេលនោះ កម្ពុជា បានឈ្នះ សិង្ហបុរី ដោយលទ្ធផល ១-០។ ចុងក្រោយកាលពីថ្ងៃទី៦ ខែមិថុនា ឆ្នាំ ២០២៦ ក្រុមនារីកម្ពុជា បានយកឈ្នះ សិង្ហបុរី ដោយលទ្ធផល ៥-០ ក្នុងជំនួបមិត្តភាពអន្តរជាតិ នៅប្រទេសឥណ្ឌូណេស៊ី។

សូមបញ្ជាក់ថា ក្រុមលេខ ១ លេខ ២ និង លេខ ៣ នៃពានរង្វាន់ AFF Women’s Cup ឆ្នាំ ២០២៦ នឹងទទួលបានកៅអី ឡើងទៅប្រកួតពានរង្វាន់កម្រិតទី១ប្រចាំតំបន់អាស៊ាន AFF Women’s Championship ដែលក្រុមខ្លាំងៗកំពុងរង់ចាំគឺ អូស្ត្រាលី ហ្វីលីពីន វៀតណាម សៀម និង មីយ៉ាន់ម៉ា៕