ព័ត៌មានអន្ដរជាតិ

លោក ត្រាំ បើកផ្លូវឲ្យអារ៉ាប៊ីសាអូឌីត ចម្រាញ់ធាតុអ៊ុយរ៉ាញ៉ូមសម្រាប់កម្មវិធីថាមពលនុយក្លេអ៊ែរ

បានផុស

៣ ម៉ោង មុន

នៅ

ថ្ងៃពុធ ២២ កក្កដា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឯកភាពចំពោះកិច្ចព្រមព្រៀងជាមួយប្រទេសអារ៉ាប៊ីសាអូឌីត ដែលអាចផ្តល់ឱ្យព្រះរាជាណាចក្រក្នុងតំបន់មជ្ឈិមបូព៌ា នូវសមត្ថភាពចម្រាញ់ធាតុអ៊ុយរ៉ាញ៉ូម សម្រាប់កម្មវិធីនុយក្លេអ៊ែរស៊ីវិល។ នេះបើយោងតាមទីភ្នាក់ងារសារព័ត៌មាន AP ផ្សាយនៅថ្ងៃទី២២ ខែកក្កដា ឆ្នាំ២០២៦ ។

ប្រភពសុំមិនបញ្ចេញឈ្មោះពីររូប បាននិយាយថា កិច្ចព្រមព្រៀងនេះត្រូវបានរំពឹងថា នឹងត្រូវប្រកាសជាសាធារណៈនៅថ្ងៃពុធ។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនតែប៉ុណ្ណោះកិច្ចព្រមព្រៀងនឹងមានរយៈពេល ៣០ឆ្នាំ ដែលក្រុមហ៊ុនអាមេរិកក៏ចូលរួមក្នុងការអភិវឌ្ឍកម្មវិធីនេះផងដែរ ថែមទាំងអនុញ្ញាតឱ្យមានការសាងសង់រោងចក្រចម្រាញ់អ៊ុយរ៉ាញ៉ូម នៅអារ៉ាប៊ីសាអូឌីត បន្ទាប់ពីការសិក្សារួមគ្នារវាងប្រទេសទាំងពីរ។

យ៉ាងណាកិច្ចព្រមព្រៀងនេះ នឹងត្រូវបានដាក់ជូនសភាសម្រាប់ការពិនិត្យឡើងវិញ អាចប្រឈមមុខនឹងឧបសគ្គក្នុងចំណោមអ្នកតាក់តែងច្បាប់ ដែលខ្លាចថាការជួយអារ៉ាប៊ីសាអូឌីតបំពេញបំណងប្រាថ្នាក្នុងការចម្រាញ់អ៊ុយរ៉ាញ៉ូមរបស់ពួកគេនឹងបើកការរីកសាយភាយ និងការប្រកួតប្រជែងនុយក្លេអ៊ែរជុំថ្មី។

មកទល់ពេលនេះ មន្ត្រីសេតវិមាន និងអារ៉ាប៊ីសាអូឌីតនៅទីក្រុងរីយ៉ាដ មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយលើបញ្ហានេះទេ។ នេះបើយោងតាមសារព័ត៌មាន The Wall Street Journal ។

គួរបញ្ចាក់ថា រដ្ឋមន្ត្រីក្រសួងថាមពល លោក Chris Wright ធ្លាប់បានធ្វើដំណើរទៅកាន់អារ៉ាប៊ីសាអូឌីតកាលពីឆ្នាំមុន មិនយូរប៉ុន្មានមុនពេល លោក ត្រាំ ទៅទស្សនកិច្ចប្រទេសនេះ ថែមទាំងពិភាក្សាអំពីផែនការកសាងឧស្សាហកម្មថាមពលនុយក្លេអ៊ែរពាណិជ្ជកម្មទៀតផង៕