ផ្សារធំៗ៣នៅក្រុងស្ទឹងសែននឹងបើកដំណើរការឡើងវិញនៅថ្ងៃស្អែក

ផ្សារធំៗចំនួន៣នៅក្រុងស្ទឹងសែន ខេត្តកំពង់ធំ នឹងបើកដំណើរការឡើងវិញនៅថ្ងៃទី០២ ខែកញ្ញាឆ្នាំ២០២១ស្អែកនេះ ក្រោយពីបានផ្អាកជាបណ្តោះអាសន្នជិត១ខែរួចមក។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសចុះពិនិត្យសកម្មភាពការបាញ់ថ្នាំសម្លាប់មេរោគកូវីដ-១៩ នៅផ្សារទាំង៣ នៅព្រឹកថ្ងៃទី១ ខែកញ្ញានេះ លោក សុខ លូ អភិបាលខេត្តកំពង់ធំ បាមានប្រសាសន៍ថា ផ្សារដែលត្រូវបើកដំណើរការឡើងវិញនៅថ្ងៃស្អែកនោះរួមមាន ផ្សារកំពង់ធំ ផ្សារស្ទឹងសែន និងផ្សារក្បាលថ្នល់ ក្រោយពីបានផ្អាកជាបណ្តោះអាសន្ន រយៈពេល ២៥ថ្ងៃកន្លងមកនេះ ពាក់ព័ន្ធនឹងជំងឺកូវីដ-១៩ និងបានយកសំណាកបងប្អូនអាជីវករ និងអ្នកពាក់ព័ន្ធ និងធ្វើតេស្តរកមេរោគកូវីដ-១៩ ចំនួន ០៣លើករួចមក។

លោក អភិបាលខេត្តបានបន្តថា៖ “យើងសង្កេតឃើញថា ស្ថានភាពនៃការរីករាលដាល ត្រូវបានគ្រប់គ្រងបានទាន់ពេលវេលា និងប្រកបដោយប្រសិទ្ធភាពខ្ពស់ ដែលនឹងឈានទៅដល់ការដាក់ឱ្យដំណើរការផ្សារទាំង០៣ឡើងវិញបានហើយ”។

ជាមួយគ្នានោះ លោកអភិបាលខេត្តសូមក្រើនរំលឹកដល់បងប្អូនអាជីវករលក់ដូរក្នុង និងជុំវិញផ្សារត្រូវរៀបចំឱ្យមានសណ្តាប់ធ្នាប់ និងរក្សាអនាម័យតូបរបស់ខ្លួនជាប្រចាំ ជាពិសេសត្រូវពាក់ម៉ាស រក្សាគម្លាតបុគ្គល ឱ្យបានត្រឹមត្រូវ និងលាងដៃនឹងអាកុល ឬជែលសម្លាប់មេរោគឱ្យបានញឹកញាប់ ជាពិសេស ចូលរួមអនុវត្តឱ្យបានខ្ជាប់ខ្ជួននូវវិធានការ “៣ការពារ ៣កុំ” របស់ប្រមុខរាជរដ្ឋាភិបាល និងគោរពតាមការណែនាំនូវវិធានសុខាភិបាល ដើម្បីការពារខ្លួនឯង ក្រុមគ្រួសារ និងសហគមន៍ពីជំងឺដ៏កាចសាហាវនេះ៕

អត្ថបទ៖ សំអឿន