ព័ត៌មានជាតិ

អភិបាលខណ្ឌច្បារអំពៅដឹកនាំកម្លាំងចុះស្តាសំរាមតាមលូដើម្បីបញ្ចៀសការជន់លិច

បានផុស

៥ years មុន

នៅ

ថ្ងៃព្រហស្បតិ៍ ៩ កញ្ញា ២០២១

ដោយ

ដើម្បីដោះស្រាយបញ្ហាប្រឈមនៅចំពោះមុខបញ្ជៀសកុំអោយទឹកភ្លៀងជន់លិចតំបន់មួយចំនួនក្នុងភូមិសាស្ត្រខណ្ឌ លោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅ បានដឹកនាំកម្លាំងចុះកើបកាយប្រមូលសំរាមចេញពីប្រឡាយដើម្បីអោយទឹកហូរលឿន និងលើកទំនប់ទប់ទឹកបង្ការទុកជាមុនកុំអោយទឹកភ្លៀងជនលិចលំនៅដ្ឋានប្រជាពលរដ្ឋ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពចុះពិនិត្យតាមតំបន់ងាយរងគ្រោះដោយជំនន់ទឹកភ្លៀងនេះ បានធ្វើឡើងស្ទើរជារៀងរាល់ថ្ងៃ ដោយលោកអភិបាលខណ្ឌ ចុះផ្ទាលនៅតាមសង្កាត់ ដែលប្រឈមនឹងជំនន់ទឹកភ្លៀងរួមមានសង្កាត់ព្រែកប្រា សង្កាត់និរោធ និងសង្កាត់វាលស្បូវ ។

ជាក់ស្តែងនៅថ្ងៃទី៨-៩ ខែកញ្ញា ឆ្នាំ២០២១ លោកអភិបាលខណ្ឌបានបន្តចុះពិនិត្យសកម្មភាពក្រុមការងារសង្កាត់ព្រែកប្រា ចុះបូមទឹកចេញពីលូ និងកើបកាយយកកាកសំណល់ផ្សេងៗចេញពីលូ ដើម្បីរំដោះទឹកភ្លៀងដែលជនលិចតំបន់ផ្សារបឹងព្រលិត ក្នុងភូមិអូរអណ្តូង ។

សកម្មភាពបន្តទៀត លោកអភិបាលខណ្ឌបានចុះពិនិត្យក្រុមការងារសង្កាត់វាលស្បូវដែលកំពុងតែលើកទំនប់ព័ន្ធតំបន់ដែលប្រឈមនិងជំនន់ទឹកភ្លៀងក្នុងភូមិក្តីតាកុយ សង្កាត់វាលស្បូវ ។ ការលើកទំនប់នេះបានធ្វើឡើង២-៣ថ្ងៃមកហើយ ដើម្បីបង្កាទុកជាមុនកុំអោយទឹកភ្លៀងជន់លិចលំនៅដ្ឋានប្រជាពលរដ្ឋ ។

ជាមួយគ្នានេះដែរលោកអភិបាលខណ្ឌបានណែនាំអោយមន្ត្រីក្រុមការ ងារ ជំនាញពាក់ព័ន្ធខណ្ឌ សង្កាត់ ត្រូវយកចិត្តទុកដាក់លើការងារចុះពិនិត្យប្រព័ន្ធលូ ប្រឡាយរំដោះទឹក ដើម្បីសម្រួលដល់ចរន្តទឹកហូរព្រោះរដូវវស្សាចូលមកដល់ហើយឥញ្ចឹងយើងត្រូវបង្កាទុកជាមុនកុំអោយជនលិចលំនៅដ្ឋានរបស់បងប្អូនប្រជាពលរដ្ឋនៅតាមសង្កាត់មួយចំនួនក្នុងមូលដ្ឋានខណ្ឌ ។ លើសពីនេះទៀតត្រូវចលនាអោយបានទូលំទូលាយប្រាប់ដល់បងប្អូនប្រជាពលរដ្ឋចូលរួមសហការទុកដាក់ និងវេចខ្ចប់សំរាមឱ្យបានត្រឹមត្រូវកុំយកមកបោះចោលតាមមាត់លូរ តាមប្រឡាយរំដោះទឹកអញ្ចឹង គឺធ្វើអោយស្ទះដល់ចរន្តទឹកហូរ ប៉ះពាល់បរិស្ថានអនាម័យ និងសណ្តាប់ធ្នាប់សាធារណៈ ។

សូមអំពាវនាវដល់បងប្អូនប្រជាពលរដ្ឋដែលរស់នៅអមប្រឡាយនិងតំបន់ជុំវិញ សូមទុកដាក់សំរាមអោយបានត្រឹមត្រូវ បញ្ចេញសំរាមតាមពេលវេលាកំណត់របស់ក្រុមហ៊ុនស៊ីនទ្រី បញ្ឈប់ការចោលសំរាមចូលក្នុងប្រឡាយដែលបណ្តាលអោយស្ទះចរន្តទឹក និងបង្កអោយមានបរិស្ថានមិនល្អក្នុងតំបន់៕

អត្ថបទ៖ នរា