លោក ជិន ម៉ាលីន៖ ពលរដ្ឋត្រូវគោរពច្បាប់ចរាចរណ៍ ឲ្យបានខ្ជាប់ខ្ជួន រីឯសមត្ថកិច្ចត្រូវអនុវត្តច្បាប់ ឲ្យបានត្រឹមត្រូវ

មន្ត្រីជាន់ខ្ពស់ ក្រសួងយុត្តិធម៌ បានអំពាវនាវដល់ប្រជាពលរដ្ឋ ចូលរួមគោរពអនុវត្ត ច្បាប់ចរាចរណ៍ឲ្យបានខ្ជាប់ខ្ជួន ដើ​ម្បី​សុវត្ថិភាពផ្ទាល់ផង និងសុវត្ថិភាពរបស់អ្នកដទៃផងដែរ។ រីឯសមត្ថកិច្ច ដែលជាអនុវត្តច្បាប់ ក៏ត្រូវអនុវត្តច្បា​ប់​ឲ្យបានត្រឹមត្រូវផងដែរ ចៀសវាងប្រើកម្លាំងលើសលប់ ដែលនាំឲ្យបំពាននូវសិទ្ធិ របស់ប្រជាពលរដ្ឋ ហើយអាច​នឹងទទួលខុសត្រូវ ចំពោះមុខច្បាប់ ជាយថាហេតុណាមួយ។

ការអំពាវនាវយ៉ាងដូច្នេះ បន្ទាប់ពីមានការណីអនុវត្តច្បាប់ ស្ដីពី ចរាចរណ៍ផ្លូវគោក កាលពីយប់ថ្ងៃទី៨ ខែកញ្ញា ឆ្នាំ​២​០​​២១ តែបានបង្កឲ្យមានអំពើហិង្សា ដែលបានបណ្ដាលឲ្យនារីម្នាក់ រងរបួសបែកក្បាល។ ក្នុងនោះ នារី រងគ្រោះ រួមជាមួយអ្នកបើកបរម៉ូតូម្នាក់ បានជិះម៉ូតូ ដោយមិនពាក់មួកសុវត្ថិភាព ហើយបើកគេចសមត្ថកិច្ច ដែលកំពុងអនុវត្តច្បាប់ចរាចរណ៍។ នារីរងគ្រោះ បាននិយាយថា មន្រ្ដីនគរបាលម្នាក់ បានប្រើវិទ្យុទាក់ទង វាយចំក្បាលរបស់ខ្លួន ឲ្យរងរបួស។ រីឯមន្រ្ដីនគរបាលរូបនោះ បាននិយាយថា ខ្លួនគ្រាន់តែរារាំង អ្នកមិនអនុវត្តច្បាប់ចរាចរណ៍ប៉ុណ្ណោះ។

លោក ជិន ម៉ាលីន រដ្ឋលេខាធិការ និងជាអ្នកនាំពាក្យ ក្រសួងយុត្តិធម៌ មានប្រសាសន៍ប្រាប់អ្នកសារព័ត៌មានកម្ពុជា​ថ្មី នៅរសៀលថ្ងៃទី១០ ខែកញ្ញានេះថា ករណីខាងលើនេះ កើតឡើងដោយសារ ការបំពានច្បាប់ចរា ចរណ៍ របស់​ប្រជា​ពលរដ្ឋ។ រីឯសមត្ថកិច្ច ដែលអនុវត្តច្បាប់ បានប្រើនូវកម្លាំងលើសលប់ ដែលនាំឲ្យមានការរំលោភបំពាន ទៅ​លើសិទ្ធិ របស់ប្រជាពលរដ្ឋ។ លោកថា ក្នុងករណីនេះ ប្រជាពលរដ្ឋ ដែលជាជនរងគ្រោះ អាចមានសិទ្ធិប្ដឹង ដើម្បី​ទាមទារសំណងជំងឺចិត្ត ការខូចខាត ឬក៏ការទទួលខុសត្រូវ ពីសំណាក់សមត្ថកិច្ច ដែលប្រើប្រាស់នូវកម្លាំងលើស​លប់នេះ។

មន្ត្រីជាន់ខ្ពស់ ក្រសួងយុត្តិធម៌ បានមានប្រសាសន៍ថា «អញ្ចឹងការទទួលខុសត្រូវនេះ អាចមានការទទួលខុសត្រូវ តាមផ្លូវច្បាប់ រួមទាំងការទទួលខុសត្រូវ ផ្នែករដ្ឋបាល ប្រសិនបើរកឃើញថា សមត្ថកិច្ចហ្នឹង បានប្រព្រឹត្តកំហុស ក្នុងការអនុវត្តច្បាប់ ដោយប្រើប្រាស់នូវ កម្លាំងលើសលប់មែន ហើយចំណែកប្រជាពលរដ្ឋ ដែលបំពានច្បាប់ចរា​ចរណ៍ ក៏ត្រូវទទួលខុសត្រូវ តាមប្បញ្ញត្តិនៃច្បាប់ចរាចរណ៍ ដែលមានជាធរមានផងដែរ»។

ជាមួយគ្នានេះលោក ជិន ម៉ាលីន បានអំពាវនាវឲ្យប្រជាពលរដ្ឋ ចូលរួមគោរពអនុវត្តច្បាប់ចរាចរណ៍ ហើយសមត្ថ​កិច្ច ក៏​ត្រូវ​អនុវត្តច្បាប់ឲ្យបានត្រឹមត្រូវផងដែរ។ លោក មានប្រសាសន៍បន្ថែមថា «ហើយជាដំណោះស្រាយ ដើម្បីកុំ​ឲ្យមាន​បញ្ហានេះ ទៅថ្ងៃខាងមុខទៀត គឺមានតែការចូលរួមអនុវត្តច្បាប់ ឲ្យបានខ្ជាប់ខ្ជួន ពីសំណាក់ប្រជាពលរដ្ឋ​យើងទេ ពាក់ព័ន្ធទៅនឹងច្បាប់ចរាចរណ៍នេះ ដើម្បីសុវត្ថិភាពទាំងអស់គ្នា ហើយសុវត្ថិ ភាពរបស់ខ្លួនគាត់ផង ហើយ​សមត្ថកិច្ច​ហ្នឹង គឺថា ត្រូវអនុវត្តច្បាប់ឲ្យបានត្រឹមត្រូវផងដែរ ចៀសវាងការប្រើនូវកម្លាំងលើសលប់ ក្នុងការអនុវត្តច្បាប់ ដែល​អាចឈានទៅការបំពាន នូវសិទ្ធិរបស់ប្រជាពលរដ្ឋ​ ហើយនាំឲ្យមានការទទួលខុសត្រូវ ជាយថាហេតុណាមួយ»៕

អត្ថបទ៖ ឃួន សុភ័ក្រ