ព័ត៌មានជាតិ

រដ្ឋមន្ត្រីកសិកម្មស្នើប្រធានធនាគារពិភពលោកថ្មីជួយគាំទ្រគម្រោងសំខាន់ៗចំនួន៣

បានផុស

៥ years មុន

នៅ

ថ្ងៃពុធ ១៥ កញ្ញា ២០២១

ដោយ

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើនាយកគ្រប់គ្រងធនាគារពិភពលោកថ្មី ប្រចាំកម្ពុជា ធ្វើការពិនិត្យពិចារណាគាំទ្រលើគម្រោងសំខាន់ៗចំនួន៣ដើម្បីដើរឲ្យទាន់ស្ថានការណ៍វិវត្តន៍ទាំងផ្នែកសេដ្ឋកិច្ច និងសង្គមជាពិសេសក្នុងនិងក្រោយបរិបទនៃការរីករាលដាលជំងឺឆ្លងកូវីដ-១៩។

ការស្នើសុំនេះបានធ្វើឡើងនៅថ្ងៃទី១៥ ខែកញ្ញា ឆ្នាំ២០២១ នៅក្នុងជំនួបពិភាក្សាការងារជាមួយលោកស្រី Maryam Salimបន្ទាប់ពីលោកស្រីត្រូវបានតែងតាំងជានាយកគ្រប់គ្រងធនាគារពិភពលោកថ្មី ប្រចាំនៅព្រះរាជាណាចក្រកម្ពុជា នៅទីស្តីការក្រសួង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា សំណើរគម្រោងចំនួន៣សំខាន់ៗនោះរួមមានទី១-ការគាំទ្រដល់ខ្សែច្រវាក់ផលិតកម្មបន្លែការពង្រឹងផលិតភាពផលិតកម្មបន្លែនៅទូទាំងប្រទេស និងដោយឡែកក្នុងតំបន់ជុំវិញរាជធានីភ្នំពេញ ដើម្បីធានាបរិមាណផ្គត់ផ្គង់ គុណភាព សុវត្ថិភាព និងតម្លៃ ដោយធ្វើការចងក្រងបណ្តុំផលិត តភ្ជាប់ជាមួយបណ្តាញទីផ្សារកន្លែងប្រមូលផ្តុំ រចនាសម្ព័ន្ធស្តុក និងការដឹកជញ្ជូន។

ទី២- បន្តធ្វើទំនើបកម្មវិស័យកសិកម្ម ដើម្បីលើកកម្ពស់ខ្សែច្រវាក់តម្លៃបន្ថែមកសាង និងកែលម្អហេដ្ឋារចនាសម្ព័ន្ធគាំទ្រដែលបម្រើដល់ផលិតកម្មដំណាំផ្លែឈើការកែច្នៃ និងការនាំចេញជាមួយនឹងការលើកកម្ពស់ការផ្តល់សេវាផ្សព្វផ្សាយបច្ចេកទេសកសិកម្មការសិក្សាស្រាវជ្រាវ និងផលិតពូជ សំដៅបង្កើនទិន្នផល ការគ្រប់គ្រង និងការប្រើប្រាស់ជី ថ្នាំកសិកម្ម ព្រមទាំងការកសាង និងពង្រឹងសមត្ថភាពធនធានមនុស្ស និងសមត្ថភាពមន្ទីរពិសោធន៍ជាតិ។

លោករដ្ឋមន្ត្រីបានបន្តថា កិច្ចការដ៏សំខាន់ និងចាំបាច់ទាំងអស់នេះ ទាមទារឲ្យក្រសួង និងភាគីពាក់ព័ន្ធខិតខំ និងពង្រឹងភារកិច្ចរបស់ខ្លួនឲ្យអស់លទ្ធភាព ដើម្បីឈានឆ្ពោះទៅសម្រេចឲ្យបាននូវចក្ខុវិស័យរបស់រាជរដ្ឋាភិបាលក្នុងការនាំចេញកសិផលកម្ពុជាទៅកាន់ទីផ្សារអន្តរជាតិ។

លោករដ្ឋមន្ត្រីបានបន្ថែមទៀតថា ទី៣- ការអភិវឌ្ឍវិស័យវារីវប្បកម្ម សំដៅលើកកម្ពស់ផលិតភាពផលិតកម្ម ធានាបានគុណភាព សុវតិ្តភាពពង្រឹង និងពង្រីកការងារស្រាវជ្រាវ បង្កាត់ និងផ្សព្វផ្សាយពូជត្រី និងចំណីឲ្យបានទូលំទូលាយរួមទាំងការបណ្តុះបណ្តាលធនធានមនុស្សផងដែរ។ ជាងនេះទៅទៀត ការកសាងខ្សែច្រវាក់ផលិតកម្មតម្លៃបន្ថែមទីផ្សារ និងហេដ្ឋារចនាសម្ព័ន្ធគាំទ្រសំខាន់ៗនៅតែជាអាទិភាព។

លោករដ្ឋមន្ត្រីជាថ្មីម្តងទៀតបានស្នើសុំឲ្យធនាគារពិភពលោកជួយពិនិត្យពិចារណា និងផ្តល់ការគាំទ្រតាមរយ:គម្រោងដែលក្រសួងចង់បានដើម្បីបង្កើនផលិតភាពផលិតកម្ម លើកកម្ពស់គុណភាព សុវត្ថិភាព ពង្រឹងខ្សែច្រវាក់ផលិតកម្មកែច្នៃឆ្លើយតបតាមតាមស្តង់ដារនាំចេញកសិផលកម្ពុជាទៅកាន់ទីផ្សារអន្តរជាតិ។

លោករដ្ឋមន្ត្រីសង្ឃឹមថា នឹងបន្តពង្រឹងកិច្ចសហការជាមួយធនាគារ ពិភពលោកដើម្បីអភិវឌ្ឍវិស័យកសិកម្មឲ្យមានការរីកចម្រើននាពេលអនាគត។

ក្នុងការឆ្លើយតប លោកស្រី Maryam Salim បានបញ្ជាក់ថា លោកស្រីនឹងយកសំណើនេះទៅពិនិត្យពិចារណាឲ្យបានលម្អិតជាមួយក្រុមជំនាញ និងដៃគូពាក់ព័ន្ធផ្សេងទៀត ហើយសង្ឃឹមថា ធនាគារពិភពលោកនឹងបន្តកិច្ចសហការឲ្យកាន់តែរឹងមាំជាមួយក្រសួងកសិកម្ម រុក្ខាប្រមាញ់ និងនេសាទ ឲ្យកាន់តែល្អប្រសើរថែមទៀត៕

អត្ថបទ៖ សំអឿន