អាជ្ញាធរខេត្តកំពង់ស្ពឺ ប្ដូរទីតាំងព្យាបាលអ្នកជំងឺកូវីដ-១៩ កម្រិតស្រាល និងមធ្យម

រដ្ឋបាលខេត្តកំពង់ស្ពឺ បានរៀបចំ និងកំណត់យកមជ្ឈមណ្ឌលអភិវឌ្ឈន៍ជនបទ កម្ពុជា-កូរ៉េ សម្រាប់ព្យាបាលអ្នកជំងឺកូវីដ-១៩ កម្រិតស្រាល ដើម្បីគ្រប់គ្រងការរីករាលដាលនៃជំងឺកូវីដ-១៩ ក្នុងសហគមនឱ្យកាន់តែមានប្រសិទ្ធភាពខ្ពស់។ ការរៀបចំផែនការថ្មីដើម្បីប្រយុទ្ធប្រឆាំងជំងឺកូវីដ-១៩ របស់រដ្ឋបាលខេត្តកំពង់ស្ពឺនេះ ត្រូវបានធ្វើឡើងនៅថ្ងៃទី២០ ខែកញ្ញា ឆ្នាំ២០២១នេះ។

អ្នកជំងឺកូវីដ-១៩ កម្រិតស្រាល និងមធ្យម ត្រូវបានក្រុមគ្រូពេទ្យដឹកជញ្ជូនមកពីតាមមណ្ឌលផ្សេងៗទូរទាំងខេត្តកំពង់ស្ពឺយកមកដាក់ព្យាបាលនៅមជ្ឈមណ្ឌលអភិវឌ្ឃន៍ជនបទ កម្ពុជា-កូរ៉េ ស្ថិតសង្កាត់-ក្រុងច្បារមន ខេត្តកំពង់ស្ពឺ។

ដោយឡែកមណ្ឌលផ្សេងៗទៀត ត្រូវរៀបចំទៅជាកន្លែងសម្រាប់ធ្វើចត្តាឡីស័កប៉ុណ្ណោះ។ ចំពោះអ្នកជំកូវីដ-១៩ បំប្លែងថ្មី ប្រភេទ “ដែលតា” នឹងត្រូវបានព្យបាល និងគ្រប់គ្រងជាពិសេសដាច់ដោយឡែកនៅមណ្ឌលផ្សេង។

អាជ្ញាធរខេត្តកំពង់ស្ពឺ បានក្រើនរំលឹកដល់បងប្អូនប្រជាពលរដ្ឋគ្រប់ៗរូប មេត្តាកុំភ្លេចវិធានការសុខាភិបាលរបស់រាជរដ្ឋាភិបាល គឺ “៣កុំ ៣ការពារ” ដើម្បីការពារខ្លួនយើងម្នាក់ ក្រុមគ្រួសារ និងសហគមយើងគេចផុតពីជំងឺកូវីដ៕

អត្ថបទ៖ ភួង រដ្ឋា