លោក នេត្រ ភក្ត្រា លើកឡើងពីការខិតខំប្រឹងប្រែង របស់រាជរដ្ឋាភិបាល ក្នុងការរក្សាបាននូវគម្របព្រៃឈើ

មន្ត្រីជាន់ខ្ពស់ក្រសួងបរិស្ថាន បានលើកឡើងអំពីការខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការរក្សាបាននូវ​គម្របព្រៃឈើ ដោយចាប់តាំងពីឆ្នាំ២០១២មក ការបាត់បង់គម្របព្រៃឈើនៅកម្ពុជា មានក្នុងកម្រិត០,៦៤ភាគរយប៉ុណ្ណោះ ដែលជាកម្រិតទាបបំផុត បើប្រៀបធៀបកាលពីពេលមុន។ ការលើកឡើងនេះ គឺនៅក្នុងសន្និសីទសារ​ព័ត៌​មាន ក្រោយបញ្ចប់ពិធីប្រកាសដាក់ឲ្យប្រើប្រាស់ និងផ្សព្វផ្សាយ​ «របា​យ​ការណ៍ស្ថានភាពបរិស្ថានលើកទី៤ និងសៀវ​ភៅធនធានគម្របព្រៃឈើកម្ពុជា ឆ្នាំ២០១៨» នៅព្រឹកថ្ងៃទី២៣ ខែ​កញ្ញា ឆ្នាំ២០២១នេះ។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ​ក្រសួង​បរិស្ថាន បានឲ្យដឹងក្នុងសន្និសីទសារព័ត៌មានថា នៅ​ក្នុងឆ្នាំ១៩៦៥ ទិន្នន័យនៃគម្របព្រៃឈើមានចំនួន ៧៣ភាគរយ ខណៈដែលនៅឆ្នាំ២០១៨ គម្របព្រៃឈើនៅ​សល់​ប្រមាណ ៨.៥១០.​៨០​៧​​ហិក​តា ឬស្មើនឹង ៤៦,៨៦ភាគរយ បើធៀបនឹងផ្ទៃដីសរុបទូទាំងប្រទេស។ តាមរយៈ​ទិន្នន័យនេះ គឺ​មានកា​រធ្លាក់ចុះ​គម្របព្រៃឈើខ្លះ ក្នុងរ​យៈ​ពេល​ប៉ុន្មានឆ្នាំ​មក​នេះ។

ពាក់ព័ន្ធនឹងការធ្លាក់ចុះនេះលោក នេត្រ ភក្ត្រា បានលើកឡើងថា នៅឆ្នាំ១៩៦២ ប្រទេសកម្ពុជាមានប្រជាជន​សរុប​ត្រឹមតែ ៥លាន​ ៧សែននាក់ទេ។ ចំណែកនៅឆ្នាំ២០១៨ ប្រទេសកម្ពុជាមានប្រជាជនចំនួន ១៦លាននាក់ ដែល​មាន​កំ​ណើ​ន​​ប្រមាណជា ១០លាននាក់។ កំណើននេះ ធ្វើឲ្យពួកគាត់ត្រូវការផ្ទៃដីសម្រាប់សាងសង់ ជាផ្ទះសម្បែង និងត្រូវការផ្ទៃដី​សម្រាប់ធ្វើស្រែចម្ការចិញ្ចឹមជីវិត ដែលនេះជាបញ្ហាចម្បងធំបំផុត នៃការធ្លាក់ចុះគម្របព្រៃឈើ។

មន្ត្រីជាន់ខ្ពស់ក្រសួងបរិស្ថាន បានថ្លែងបន្តថា «ក៏ប៉ុន្តែទន្ទឹមនឹងនោះ យើងសួរថា តើបញ្ហានៃការបាត់បង់នេះ (គ​ម្រប​​ព្រៃឈើ) តែមួយផ្នែក ដោយសារតែកាប់បំផ្លាញព្រៃឈើ ឬក៏ការទន្រ្ទាន? ទាំងអស់នេះ គឺជាបញ្ហាជាកត្តាតូច​ៗ ដែលរួមផ្សំគ្នា ដែលធ្វើឲ្យមានការធ្លាក់ចុះនូវគម្របព្រៃឈើនេះ ក៏ប៉ុន្តែសួរថា តើនិន្នាការនៃការបាត់បង់គម្របព្រៃ​ឈើនេះ មានតែនៅប្រទេសកម្ពុជា? ថាមិនមែនទេ គឺនិន្នាការនៅលើពិភពលោក ដែលបាត់បង់ទៅក្នុងប្រទេស​នីមួយៗ ឧទាហរណ៍ដូចជាប្រទេសប្រេស៊ីល សូម្បីតែព្រៃអាម៉ាហ្សូន ក៏មានការធ្លាក់បាត់បង់កម្រិតមួយខ្ពស់»។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ​ក្រសួង​បរិស្ថាន បានឲ្យដឹងទៀតថា នៅក្នុងប្រទេសកម្ពុជា ក្រោម​ការធ្វើកំណែទម្រង់ចុងក្រោយ របស់រាជរដ្ឋាភិបាល ចាប់តាំងពីឆ្នាំ២០១២មក គឺបានរក្សានូវគម្របព្រៃឈើ ដែលនាំឲ្យការបាត់បង់គម្របព្រៃឈើ ក្នុងកម្រិត០,៦៤ភាគរយ ដែលជាកម្រិតកាត់បន្ថយបានយ៉ាងច្រើន បើ​ប្រៀប​ធៀបទៅនឹងប៉ុន្មានឆ្នាំកន្លងមកនេះ។

លោក នេត្រ ភក្ត្រា បានលើកឡើងទៀតថា «អញ្ចឹងចំពោះអ្វីដែលជាការចោទប្រកាន់ របស់ក្រុមសកម្មជនមួយ​ចំនួន ដែល​តែងតែផ្សព្វផ្សាយព័ត៌មានបែបកុហក់ថា កម្ពុជាអស់ឈើហើយ ប៉ុន្តែបើសិនជាកម្ពុជាអស់ឈើ សួរថា តើរបាយការណ៍របស់យើង ហេតុអ្វីក៏យើងចេញមានរហូតទៅដល់ ៤៦,៨៦ភាគរយ ហើយស្ថានភាពជាក់ស្ដែង ប្រជាពលរដ្ឋ គឺគាត់បានដឹងច្បាស់អំពីវត្តមាននៃព្រៃឈើ នៅក្នុងតំបន់ការពារធម្មជាតិ ហើយមួយទៀត បើសិនជា​ព្រៃ​ឈើនៅកម្ពុជាអស់ ដូចដែលគេឃោសនាបែបបោកបញ្ឆោតនោះ ប្រហែលជាកម្ពុជារបស់យើង មិនមាន​លទ្ធ​ភាព នៅក្នុងការលក់ឥណទានកាបូន ដែលបច្ចុប្បន្ននេះព្រៃឈើរបស់យើង បាននឹងកំពុងដើរតួនាទីមួយយ៉ាង​សំខា​ន់ នៅក្នុងការចូលរួមបន្សុតខ្យល់របស់ពិភពលោក ហើយដែលក្រុមហ៊ុនធំៗ ដែលមានតួនាទីភារកិច្ច ក្នុងការ​ទទួល​ខុស​ត្រូវលើផ្នែកបរិស្ថាន បានមកចែចូវ មកទាក់ទង មកទិញពីប្រទេសកម្ពុជារបស់យើង ដោយសារតែកម្ពុជារបស់​យើង រក្សាបាននូវព្រៃឈើឈរ ដែលជាតួនាទីសំខាន់មួយ នៅក្នុងប្រព័ន្ធអេកូឡូស៊ី»។

លោកបានបញ្ជាក់បន្ថែមទៀតថា អ្វីដែលលោកបានរៀបរាប់ខាងលើនេះ គឺជារបាយការណ៍​មួយបង្ហាញថា ប្រទេស​កម្ពុជា បានខិតខំប្រឹងប្រែងនៅក្នុងការថែរក្សា ការពារ អភិរក្សព្រៃឈើធម្មជាតិ រួមទាំង​គោល​នយោបាយ របស់រាជ​រដ្ឋាភិបាលកម្ពុជា នៅក្នុងការជំរុញចំការឈើដាំ ដើម្បីបង្កើននូវគម្របព្រៃឈើ នៅក្នុងប្រទេស​កម្ពុជារបស់យើង។

លោក នេត្រ ភក្ត្រា រដ្ឋលេខាធិការក្រសួង​បរិស្ថាន បានបញ្ជាក់ទៀតថា អ្វីដែលលោកបានរៀបរាប់ខាងលើនេះ ក៏ជារបាយការណ៍បង្ហាញទៀតថា គេមិនអាចបន្តភូកកុហក់ពិភពលោកបានទៀត និងគេមិនអាចនឹងបន្តឃោសនាបែប​អ​កុសលថា ប្រទេសកម្ពុជាអស់ព្រៃឈើទេ។ ក៏ប៉ុន្តែផ្ទុយទៅវិញ ពួកគេត្រូវតែទទួលស្គាល់ នូវអ្វីដែលជាការពិត ដែល​ជាការខិតខំប្រឹងប្រែង របស់រាជរដ្ឋាភិបាល គឺបានការពារនូវព្រៃឈើឈរ និងក៏បានលក់ឥណទានកាបូន ហើយ​នឹងបន្តការខិតខំប្រឹងប្រែងបន្តទៀត ទាំងការរៀបចំនូវគោលនយោបាយ ទាំងការធ្វើសកម្មភាព ទាំងការ​អភិវឌ្ឍសហគមន៍ការពារធម្មជាតិ ដើម្បីធ្វើយ៉ាងណាធនធានធម្មជាតិរបស់យើង៕

អត្ថបទ៖ ឃួន សុភ័ក្រ