ព័ត៌មានជាតិ

ខេត្តព្រះសីហនុបើកបន្ទប់ទឹកសាធារណៈ៦ទីតាំងទទួលភ្ញៀវទេសចរក្នុងឱកាសបុណ្យភ្ជុំបិណ្ឌ

បានផុស

៣ years មុន

នៅ

ថ្ងៃអាទិត្យ ៣ តុលា ២០២១

ដោយ

រដ្ឋបាលខេត្តព្រះសីហនុបានបើកឱ្យដំណើរការជាផ្លូវការនូវបន្ទប់ទឹកសាធារណៈ៦ទីតាំង ចាប់ពីថ្ងៃទី០៣ ខែតុលា ឆ្នាំ២០២១នេះតទៅ ដើម្បីទទួលភ្ញៀវទេសចរជាតិ និងភ្ញៀវបរទេសក្នុងឱកាសថ្ងៃឈប់សម្រាកបុណ្យកាន់បិណ្ឌនិងភ្ជុំបិណ្ឌខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គួច ចំរើន អភិបាលខេត្តព្រះសីហនុ ដែលបានដឹកនាំមន្ត្រីជំនាញចុះត្រួតពិនិត្យបន្ទប់ទឹកសាធារណៈចាប់ពីឆ្នេរអូរឈើទាល២ រហូតដល់ចំណុចដើមឈើចាំស្នេហ៍កាលពីរសៀលថ្ងៃទី២ ខែតុលា បានមានប្រសាសន៍ថា « ចាប់ពីថ្ងៃទី៣ ខែតុលា ឆ្នាំ២០២១នេះតទៅយើងនឹងបើកឱ្យដំណើរការជាផ្លូវការនូវបន្ទប់ទឹកសាធារណៈចំនួន៦ទីតាំងសិន ក្នុងចំណោម៩ទីតាំង ដោយសារតែបន្ទប់ទឹក៣ទីតាំងទៀត ក្នុងនោះ២ទីតាំងមិនទាន់បំពាក់សម្ភារ:រួចរាល់ និង១ទាក់ទងទៅនឹងបច្ចេកទេសទឹកនាំមកអត់ទាន់ដល់ ដូច្នេះយើងបើកបន្ទប់ទឹកសាធារណៈចំនួន៦ទីតាំងឱ្យដំណើរការសម្រាប់ទទួលភ្ញៀវទេសចរជាតិ និងភ្ញៀវបរទេសក្នុងឱកាសថ្ងៃឈប់សម្រាកបុណ្យកាន់បិណ្ឌភ្ជុំបិណ្ឌប្រពៃណីខ្មែរនាពេលខាងមុខនេះ»។

លោកអភិបាលខេត្ត ក៏បានណែនាំឱ្យមន្ទីរទេសចរណ៍ខេត្តត្រូវរៀបចំឯកសណ្ឋានអ្នកអនាម័យឱ្យត្រឹមត្រូវដើម្បីឱ្យភ្ញៀវទេសចរជាតិ និងអន្តរជាតិដែលមកប្រើប្រាស់បន្ទប់ទឹកសាធារណៈរបស់យើងបានដឹង។

ទន្ទឹមនោះ លោកអភិបាលខេត្តក៏បានធ្វើការណែនាំឱ្យអាជីវករត្រូវរៀបចំដាក់លក់ម្ហូបអាហារប្រចាំតំបន់ព្រោះខេត្តយើងជាតំបន់សមុទ្រ ដូច្នេះយើងចង់ផ្សព្វផ្សាយម្ហូបសមុទ្ររបស់យើងដែលមានគុណភាព និងរស់ជាតិឆ្ងាញ់ពិសារសម្រាប់ទាក់ទាញភ្ញៀវមកលេងកម្សាន្តខេត្តរបស់យើងឱ្យបានកាន់តែច្រើននាពេលខាងមុខ៕

អត្ថបទ៖ សំអឿន