ព័ត៌មានជាតិ

រឹបអូស អាល់កុលក្លែងក្លាយ បានជិត១ម៉ឺន៦ពាន់លីត្រ ក្នុងខណ្ឌ២ នៅរាជធានីភ្នំពេញ

បានផុស

៥ years មុន

នៅ

ថ្ងៃពុធ ២៧ តុលា ២០២១

ដោយ

មន្ត្រីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំហៅកាត់ថា«ក.ប.ប.» បានឱ្យដឹងថា រយៈពេលពីរថ្ងៃនេះបានបង្ក្រាបនិងរឹបអូសអាល់កុលក្លែងក្លាយ(មេតាណុល) ចំនួន៥៣២ ប៊ីដុងស្មើនឹង១៥ ៩៦០លីត្រ នៅក្នុងខណ្ឌចំនួន២ ក្នុងរាជធានីភ្នំពេញ។

តាមមន្ត្រី ក.ប.ប បានបន្តថា ក្នុងចំណោមចំនួនអាល់កុលដែលបង្ក្រាបខាងលើ គឺក្នុងនោះ នៅថ្ងៃទី២៥ ខែតុលា ឆ្នាំ២០២១ មន្ត្រីស៊ើបអង្កេតរបស់អគ្គនាយកដ្ឋាន ក.ប.ប. បានចុះប្រតិបត្តិការត្រួតពិនិត្យគុណភាពអាល់កុល នៅទីតាំងមួយកន្លែងក្នុងភូមិសាស្ត្រខណ្ឌពោធិ៍សែនជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះបានធ្វើឡើងបន្ទាប់ពីមន្ត្រីជំនាញបានធ្វើការស្រាវជ្រាវរកឃើញថា ទីតាំងនេះមានស្តុកទុកដើម្បីចែកចាយលក់អាល់កុលនៅតាមបណ្តាទីផ្សារនៅទូទាំងប្រទេស។

បន្ទាប់ពីបានត្រួតពិនិត្យ មន្ត្រីជំនាញបានរកឃើញអាល់កុលក្លែងក្លាយ(មេតាណុល) ចំនួន ១៥៧ប៊ីដុង ស្មើនឹង៤ ៧១០លីត្រ នៅទីតាំងផ្ទះមួយកន្លែងស្ថិតនៅក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

បន្ទាប់មក មន្ត្រីជំនាញបានធ្វើការស៊ើបអង្កេតបន្ត និងបានកំណត់ទីតាំងឃ្លាំងស្តុកអាល់កុលមួយកន្លែងទៀត ហើយនៅថ្ងៃទី២៦ ខែតុលា ឆ្នាំ២០២១ ដោយទទួលបានការអនុញ្ញាតពីព្រះរាជអាជ្ញាអមសាលាដំបូងរាជធានីភ្នំពេញ និងទទួលបានការចូលរួមពីមន្ត្រីនគរបានប្រឆាំងបទល្មើសសេដ្ឋកិច្ចរាជធានីភ្នំពេញ

អាជ្ញាធរខណ្ឌ និងសង្កាត់ មន្ត្រីអគ្គនាយកដ្ឋាន ក.ប.ប.បានចុះត្រួតពិនិត្យទីតាំងឃ្លាំងស្តុកទំនិញមួយកន្លែងស្ថិតនៅក្នុងសង្កាត់ដង្កោ ខណ្ឌដង្កោ រាជធានីភ្នំពេញ ដោយបានរកឃើញអាល់កុលក្លែងក្លាយ ឬមេតាណុលចំនួន៣៧៥ប៊ីដុង ស្មើនឹង ១១ ២៥០លីត្រ។

មន្ត្រីក.ប.បបានបញ្ជាក់ថា លទ្ធផលសរុបក្នុងប្រតិបត្តិការបង្ក្រាបទាំង២ថ្ងៃនេះមន្ត្រីជំនាញបានរកឃើញ និងរឹបអូលអាល់កុលក្លែងក្លាយចំនួន ១៥ ៩៦០លីត្រដើម្បីអនុវត្តនីតិវិធីបន្ត៕

អត្ថបទ៖ សំអឿន