៧ខែ ឆ្នាំ២០២១ អគ្គនាយកដ្ឋាន ក.ប.ប. ដកហូតអាល់កុលក្លែងក្លាយ (មេតាណុល) ជាង ៩៦តោន

ក្នុងរយៈពេល ៧ខែ ឆ្នាំ២០២១ ជំនាញអគ្គនាយកដ្ឋាន ក.ប.ប. បានរកឃើញ និងដកហូតអាល់កុលក្លែងក្លាយ (មេតាណុល) ប្រមាណជាង ៩៦តោន ដែលបានចរាចរនៅលើទីផ្សារ ។

យោងតាមប្រភពព័ត៌មានប្រាប់អោយដឹងថា គិតត្រឹមរយៈពេល៧ខែ ឆ្នាំ២០២១ នេះ អគ្គនាយកដ្ឋាន ក.ប.ប. បានធ្វើការអង្កេត ស្រាវជ្រាវ និងបង្ក្រាបបានអាល់កុលក្លែងក្លាយ (មេតាណុល) ជាង៩៦តោន ដែលឈ្មួញបានដាក់ឱ្យចរាចរក្នុងទីផ្សារនានា តាមបណ្តារាជធានី- ខេត្ត ។

មន្ត្រីជំនាញលើកឡើងថា ការដាក់លក់អាល់កុលក្លែងក្លាយ (មេតាណុល) ជូនប្រជាពលរដ្ឋសម្រាប់បាញ់សម្លាប់មេរោគ គឺជាការបំពានទាំងស្រុងទៅលើច្បាប់ ស្ដីពីកិច្ចការពារអ្នកប្រើប្រាស់ ដែលធ្វើឱ្យខាតបង់ផលប្រយោជន៍សេដ្ឋកិច្ច និងជាពិសេសធ្វើឱ្យប៉ះពាល់យ៉ាងធ្ងន់ធ្ងរដល់សុខភាព សុវត្ថិភាព និងសុខុមាលភាពរបស់ប្រជាពលរដ្ឋដែលជាអ្នកប្រើប្រាស់ ។ មិនត្រឹមតែប៉ុណ្ណោះ ទង្វើនេះក៏បានរាំងស្ទះដល់វិធានការទប់ស្កាត់ការរីករាលដាល នៃជំងឺកូវីដ-១៩ ដែលដាក់ចេញដោយរាជរដ្ឋាភិបាលកម្ពុជាផងដែរ ព្រោះអាល់កុលមេតា​ណុលពុំមានប្រសិទ្ធភាពក្នុងការសម្លាប់មេរោគឡើយ។ វានឹងធ្វើឱ្យប៉ះពាល់សុខភាពអ្នកប្រើប្រាស់ថែមទៀតផង។

ជាមួយគ្នានេះ អគ្គនាយកដ្ឋាន ក.ប.ប. សូមសំណូមពរ អាជីវករទាំងអស់ ប្រកបអាជីវកម្មរបស់ខ្លួនដោយតម្លាភាព និងសមធម៌ ព្រមទាំងឈរលើស្មារតីសុចរិតភាពនិងការទទួលខុសត្រូវ ដើម្បីប្រទេសកម្ពុជាអាចរួចផុតពីការរីករាលដាលនៃជំងឺកូវីដ-១៩ ក្នុងពេលដ៏ខ្លីខាងមុខនេះ ៕

អត្ថបទ ៖ រ៉ាវុទ្ធ