សម្តេចតេជោ ហ៊ុន សែន ប្រកាសបើកដំណើរការប្រទេសពេញលេញឡើងវិញ នៅថ្ងៃនេះ

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រកាសបើកដំណើរការប្រទេសពេញលេញឡើងវិញ នៅថ្ងៃនេះ។ សម្ដេចលើកឡើងបែបនេះ នៅពិធីប្រកាសបិទយុទ្ធនាការចាក់វ៉ាក់សាំងដល់កុមារអាយុចាប់ពី ០៦ឆ្នាំ និងបើកយុទ្ធនាការចាក់វ៉ាក់សាំងដល់កុមារអាយុ ៥ឆ្នាំ នាព្រឹកថ្ងៃទី០១ ខែវិច្ឆិកា ឆ្នាំ២០២១ នេះ។ 

សម្ដេចតេជោ ហ៊ុន សែន បានមានប្រសាសន៍ថា៖ “ដំណាក់កាលទី៤ គឺការបើកដំណើរការប្រទេសពេញលេញឡើងវិញលើគ្រប់វិស័យ និងការរស់នៅជាមួយកូវីដ-១៩ តាមគន្លងប្រក្រតីភាពថ្មី ចាប់ពីថ្ងៃទី០១ ខែវិច្ឆិកា ឆ្នាំ២០២១ នេះតទៅ។ ថ្ងៃហ្នឹងយើងចាប់បើកអ្វីដែលមិនទាន់ពេញលេញ គឺវាស្ថិតនៅត្រង់ទេសចរបរទេសមិនទាន់មាន។ ទៅទេសចរណ៍ផ្ទៃក្នុងបើក នាំគ្នាដើរលេងទៅ”។

សម្ដេចតេជោអះអាងបន្តថា៖ “នៅលើសកលលោក ក៏ចាប់ផ្ដើមធ្វើដែរ គេដើរលេងទៅប្រទេសបារាំង ទៅអង់គ្លេស គេអត់មានធ្វើចត្តាឡឺស័កទេ។ ចូលហាងបានមួយសេរី ប៉ុន្តែយើង ហេតុអ្វីខ្លាចម៉្លេះ តែយើងកុំហ៊ានជ្រុល”។ 

ជាមួយនឹងការលើកឡើងខាងលើនេះ សម្ដេចតេជោ ហ៊ុន សែន បានអះអាងថា ឧស្សាហកម្មកម្ពុជា បានដំណើរការធម្មតានៅក្នុងឱកាស នៃការរីករាលដាលនៃជំងឺកូវីដ-១៩ នៅប្រទេសកម្ពុជា ហើយក៏មិនត្រឹមតែដំណើរការរោងចក្រចាស់ដែរ រោងចក្រថ្មីក៏ចូលមកផងដែរ។ វិស័យកសិកម្មក៏នៅដំណើរការធម្មតា ហើយធ្វើបានលើសផែនការទៀតផង ប៉ុន្តែអ្វីដែលបាត់ គឺបញ្ហាសេវាកម្ម។ ការលក់ដុំការលក់រាយ ហើយអ្វីដែលបាត់បង់ធំជាងគេ គឺទេសចរណ៍៕

អត្ថបទ៖ កោះកែវ