ព័ត៌មានជាតិ

ចាប់អ្នកលេងមាន់ជល់តាមទូរទស្សន៍៣នាក់ ដកហូតម៉ូតូ៨គ្រឿង

បានផុស

៥ years មុន

នៅ

ថ្ងៃពុធ ៣ វិច្ឆិកា ២០២១

ដោយ

កម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី បានឃាត់ខ្លួនជនសង្ស័យប្រុសស្រីចំនួន៣នាក់ ពាក់ព័ន្ធករណីបើកទីតាំងលេងល្បែងជល់មាន់តាមប្រព័ន្ធអនឡាញ(ទូរទស្សន៍) ដោយខុសច្បាប់។

ការឃាត់ខ្លួននេះបានធ្វើឡើងកាលពីវេលាម៉ោង១២និង១០នាទីរសៀល ថ្ងៃទី២ ខែវិច្ឆិកា ឆ្នាំ២០២១ នៅចំណុចផ្ទះមួយកន្លែង ស្ថិតនៅក្នុងភូមិថ្មី សង្កាត់ឡាបានសៀក ក្រុងបានលុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ពីនគរបាលបានឲ្យដឹងថា ជនសង្ស័យដែលឃាត់ខ្លួនមាន ១-ឈ្មោះ ពិល រុំ (ម្ចាស់ទីតាំង)ភេទស្រី អាយុ៥៥ឆ្នាំ មុខរបរលក់ដូរ មានទីលំនៅភូមិ-ឃុំខាងលើ។ ២-ឈ្មោះ រុណ ប៊ុនលឹម ភេទប្រុស អាយុ៣៩ឆ្នាំ មុខរបរចិញ្ចឹមជ្រូក មានទីលំនៅភូមិអូរមៀត សង្កាត់ឡាបានសៀក ក្រុងបានលុង។ និង៣-ឈ្មោះ អិន រស្មី ភេទប្រុស អាយុ៤៤ឆ្នាំ មុខរបរលក់ដូរ មានទីលំនៅភូមិ៧មករា សង្កាត់ឡាបានសៀក ក្រុងបានលុង។

ក្រោយឃាត់ខ្លួនសមត្ថកិច្ចបានដកហូតម៉ូតូចំនួន៨គ្រឿង ទូរសព្ទដៃចំនួន២គ្រឿង (ចាស់ៗ) ទូរទស្សន៍១គ្រឿង។ បន្ទាប់មកសមត្ថកិច្ចបានអញ្ជើញលោកគ្រូពេទ្យមកធ្វើតេស្តរកមេរោគកូវីដ១៩ ជាលទ្ធផលអវិជ្ជមានទាំង៣នាក់។

បច្ចុប្បន្នជនសង្ស័យទាំង៣នាក់ខាងលើនេះ ត្រូវបានឃាត់ខ្លួនបណ្ដោះអាសន្ន នៅការិយាល័យព្រហ្មទណ្ឌកម្រិតស្រាល ដើម្បីបំពេញសំណុំរឿងចាត់ការទៅតាមនីតិវិធី៕

អត្ថបទ៖ វុទ្ធឦសាន

Related Topics:ល្បែងស៊ីសង