ព័ត៌មានជាតិ

ក្មេងប្រុសអាយុជិត២ខួបរអិលជើងធ្លាក់ចូលប្រឡាយលង់ទឹកស្លាប់ ខណៈដើរមកពីទិញនំ

បានផុស

៤ years មុន

នៅ

ថ្ងៃសុក្រ ៥ វិច្ឆិកា ២០២១

ដោយ

ក្មេងប្រុសអាយុទើបជិត២ខួបម្នាក់ បានស្លាប់បាត់បង់ជីវិតដោយសារលង់ទឹកប្រឡាយបង្កអោយមានការភ្ញាក់ផ្អើលជាខ្លាំងនៅចំណុចប្រឡាយលូបង្ហូរទឹកបឹងទំពន់ ស្ថិតនៅខាងក្រោយស្ថាននីយ៍បូមទឹកបឹងទំពន់ ក្នុងភូមិត្នោតជ្រុំ៣ សង្កាត់បឹងទំពន់២ ខណ្ឌមានជ័យ កាលពីវេលាម៉ោង១៦និង១៥នាទីល្ងាច ថ្ងៃទី០៤ ខែវិច្ឆិកា ឆ្នាំ២០២១ ។

ក្មេងប្រុសរងគ្រោះមានឈ្មោះ យៀង សុខលាភ អាយុ១ឆ្នាំ៨ខែ ស្នាក់នៅជាមួយឪពុកម្តាយបង្កើត មានលំនៅឋានក្បែរកន្លែងកើតហេតុ។

យោងតាមប្រភពព័ត៌មានអោយដឹងថា នៅមុនកើតហេតុក្មេងប្រុសរងគ្រោះបានដើរតែម្នាក់ឯងទៅទិញនំក្បែរផ្ទះហូប លុះទិញរួចក៏ដើរត្រឡប់ទៅផ្ទះវិញ តែក៏បានដើរហួសផ្ទះទៅដល់មាត់ប្រឡាយ ហើយក៏រអិលជើងធ្លាក់ចូលទៅក្នុងប្រឡាយតែម្តង ។ កំឡុងពេលធ្លាក់នោះដែរមានស្ត្រីម្នាក់ឈ្មោះ ហង់ សេងថា អាយុ៥៨ឆ្នាំ ជាពលរដ្ឋជិតខាងបានឃើញក្មេងប្រុសខាងលើធ្លាក់ចូលទឹក ក៏បានស្រែកឆោរឡោរបង្កអោយមានការភ្ញាក់ផ្អើលតែម្តងទៅ ។ ភ្លាមៗបន្ទាប់ពីដឹងថាក្មេងប្រុសខាងលើត្រូវធ្លាក់ទឹកមកពលរដ្ឋនៅក្នុងតំបន់នោះ ដែលជាអ្នកចេះហែលទឹក បាននាំគ្នាចុះមុជទឹករាវរកក្មេងនោះដែរប៉ុន្តែរាវរកមិនឃើញសោះ ក៏បានរាយការណ៍បន្តជូនសមត្ថកិច្ចមូលដ្ឋានដើម្បីសុំកិច្ចអន្តរាគមន៍ ។

ក្រោយទទួលបានព័ត៌មានហើយនោះ កម្លាំងនគរបាលបានចុះដល់ទីតាំងខាងលើ និងបានសហការជាមួយក្រុមការងារបញ្ជាការដ្ឋានទ័ពពិសេសកងទ័ពជើងទឹកលេខ៩១១ ដែលមានជំនាញ និងឧបករណ៍គ្រប់គ្រាន់ ក្នុងការចុះមុជរាវរកសពក្នុងទឹក បានរាវរកប្រមាណ២០នាទី ពោលគឺចុះរាវតាំងពីវេលាម៉ោង១៩ និង៣០នាទី ដល់ម៉ោង២០យប់ថ្ងៃខែដដែលទើបរកឃើញសពក្មេងប្រុសរងគ្រោះឃើញ ហើយស្រង់ឡើងមកលើគោកតែម្តង ។ បន្ទាប់ពីរកឃើញសពហើយនោះ គេសង្កេតឃើញក្រុមគ្រួសារសាច់ញាតិបាននាំគ្នាឱបសពក្មេងប្រុសរងគ្រោះ ដោយសម្រែកស្រែកយំគ្រប់ៗគ្នា គួរអោយសង្វែកផងដែរ ។

យ៉ាងណាមិញ ជុំវិញករណីនេះ លោក ឃុន ឡេង នាយប៉ុស្តិ៍រដ្ឋបាលនគរបាលបឹងទំពន់ទី២ បានអោយដឹងថា ក្រោយការរកឃើញសពហើយនោះ ជំនាញបានចុះពិនិត្យលើសពឃើញថា សពពិតជាត្រូវស្លាប់ដោយសារការលង់ទឹកប្រាកដមែន ដោយពុំមែនជាករណីអ្វីផ្សេងឡើយ ម្យ៉ាងក៏មានសាក្សីគ្រប់គ្រាន់តែបានឃើញហេតុការណ៍ផងដែរ ។ ដូច្នោះហើយជុំវិញការស្លាប់របស់ក្មេងប្រុសរងគ្រោះ ឪពុកម្តាយរបស់គេពុំបានធ្វើការប្តឹងប្តល់អ្វីឡើយ ទើបសមត្ថកិច្ចសម្រេចធ្វើលិខិតប្រគល់ទទួលសព ជូនសាច់ញាតិ ដើម្បីយកទៅធ្វើបុណ្យទៅតាមប្រពៃណី ៕

អត្ថបទ៖ លីហេង