២៦ថ្ងៃ មានប្រជាពលរដ្ឋ បានទៅចុះឈ្មោះបោះឆ្នោតថ្មីជាង ២៩ម៉ឺននាក់

គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា លទ្ធផលបណ្ដោះអាសន្នរយៈពេល ២៦ថ្ងៃ នៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២១ មានប្រជាពលរដ្ឋបានអញ្ជើញទៅចុះឈ្មោះបោះឆ្នោតថ្មីសរុបចំនួន ២៩៤.០២៣នាក់។

បើតាម គ.ជ.ប របាយការណ៍ពីឃុំ-សង្កាត់ ចំនួន ១.៤១២ សម្រាប់ថ្ងៃទី ៧ ខែវិច្ឆិកា ឆ្នាំ ២០២១ ដែលត្រូវជាថ្ងៃទី២៦ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២១ មានប្រជាពលរដ្ឋបានអញ្ជើញមកចុះឈ្មោះបោះឆ្នោតថ្មី មានចំនួន ១៣.៣៦៨នាក់ ហើយអ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ២.១៨១នាក់។ ចំណែកអ្នកដែលបានកែតម្រូវទិន្នន័យ មានចំនួន ៤.៥៧៦នាក់ និងអ្នកដែលបានផ្ទេរទីលំនៅចូលក្នុងឃុំ-សង្កាត់ថ្មី មានចំនួន ៣.៥០៥នាក់។

សរុបរយៈពេល ២៦ថ្ងៃ នៃការពិនិត្យបញ្ជីឈ្មោះ និងចុះឈ្មោះបោះឆ្នោត មានប្រជាពលរដ្ឋ បានអញ្ជើញទៅចុះឈ្មោះបោះឆ្នោតថ្មីសរុប មានចំនួន ២៩៤.០២៣នាក់។ អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុប មានចំនួន ១៣៨.៥៤១នាក់។ អ្នកដែលបានកែតម្រូវទិន្នន័យសរុប មានចំនួន ១០៤.៨៦២នាក់ និងអ្នកដែលបានផ្ទេរទីលំនៅចូលក្នុងឃុំ-សង្កាត់ថ្មីសរុប មានចំនួន ៨៧.៣៨៣នាក់។

សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២១ ប្រព្រឹត្តទៅចាប់ពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា ឆ្នាំ ២០២១ គិតទាំងថ្ងៃសៅរ៍ និងថ្ងៃអាទិត្យផងដែរ៕

អត្ថបទ៖ កោះកែវ