ព័ត៌មានជាតិ

ក្រសួងសាធារណការបើកយុទ្ធនាការអប់រំផ្សព្វផ្សាយចរាចរណ៍ផ្លូវគោកក្នុងខេត្តឧត្ដរមានជ័យ

បានផុស

៥ years មុន

នៅ

ថ្ងៃពុធ ២៤ វិច្ឆិកា ២០២១

ដោយ

នាព្រឹកថ្ងៃទី២៤ ខែវិច្ឆិកា ឆ្នាំ២០២១នេះ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិ សុវត្ថិភាពចរាចរណ៍ផ្លូវគោក ដោយមានការអញ្ជើញចូលរួមពីឯកឧត្ដម ស៊ី ប្រាសិទ្ធ ប្រធានក្រុមប្រឹក្សាខេត្តឧត្តរមានជ័យ និងលោក លឹម សុខតូ អភិបាលរងខេត្ត បានអញ្ជើញជាអធិបតីក្នុងពិធីយុទ្ធនាការអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោកដល់សិស្សនិសិត្ស លោកគ្រូ អ្នកគ្រូ និងប្រជាពលរដ្ឋ ក្នុងក្រុងសំរោង ខេត្តឧត្តរមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវ មឹន មាណវី បានមានប្រសាសន៍លើកឡើងថា ការរៀបចំយុទ្ធនាការអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោកនាពេលនេះ គឺដើម្បីជាការពញ្ញាក់ស្មារតីដល់បងប្អូនប្រជាពលរដ្ឋ សិស្សានុសិស្ស ក៏ដូចជាអ្នកប្រើប្រាស់ផ្លូវឲ្យយកចិត្តទុកដាក់ខ្ពស់ និងចូលរួមគោរពច្បាប់ ស្ដីពីចរាចរណ៍ផ្លូវគោក សំដៅចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ឲ្យស្ថិតមកនៅកម្រិតទាបផងដែរ។

លោកជំទាវ រដ្ឋលេខាធិការ ក៏បានអំពាវនាវដល់អ្នកបើកបរយានយន្តគ្រប់ប្រភេទ សូមចូលរួមអនុវត្តឲ្យបានខ្ជាប់ខ្ជួននូវវិធានការនានា ដែលបានចែងក្នុងច្បាប់ស្តីពីចរាចរណ៍ផ្លូវគោក ដូចជាមិនត្រូវបើកបរលើស ល្បឿនកំណត់ គោរពសិទ្ធិអាទិភាព ផ្លាកសញ្ញាចរាចរណ៍ ប្រកាន់ស្ដាំ មិនវ៉ាជែងក្នុងស្ថានភាពគ្រោះថ្នាក់ ហើយបើស្រវឹងសូមកុំបើកបរ ដើម្បីរួមគ្នាកាត់បន្ថយគ្រោះថ្នាក់ចរាចរ កាត់បន្ថយចំនួនអ្នកស្លាប់ អ្នករងរបួស អ្នកពិការ និងការខូចខាតនានាដែលបង្កដោយសារគ្រោះថ្នាក់ចរាចរណ៍។

បើតាមការបញ្ជាក់របស់លោក ឈឿង ផល្លៀង ប្រធានមន្ទីរសាធារណការនិងដឹកជញ្ជូនខេត្តឧត្តរមានជ័យ បានឲ្យដឹងថា គិតត្រឹមខែមករា រហូតដល់ខែវិច្ឆិកា ឆ្នាំ២០២១នេះ ក្រុមការងារត្រួតពិនិត្យលក្ខណៈបច្ចេកទេសយានយន្តខេត្តបានធ្វើការរឹតបន្តឹង ដោយចុះអនុវត្តជាប្រចាំនៅលើដងផ្លូវជាតិ៦៨ សម្រេចបាន លទ្ធផលដូចជា៖

-បានត្រួតពិនិត្យរថយន្តសរុប ចំនួន ៦៩ គ្រឿង

– រថយន្តត្រឹមត្រូវ ចំនួន ៣១ គ្រឿង

– រថយន្តដឹកទំនិញខុសលក្ខណៈបច្ចេកទេស ចំនួន ២៩ គ្រឿង

-ប្រើប័ណ្ណបើកបរខុសប្រភេទយានយន្ត ចំនួន ០២ គ្រឿង

-រថយន្តខ្វះឯកសារ ចំនួន០២គ្រឿងផងដែរ៕

អត្ថបទ៖ ចាន់ ធី