ព័ត៌មានជាតិ

គណៈកម្មការចម្រុះ រកឃើញផ្ទៃដីសរុបចំនួន ៤៧០០ ហិកតា ដែលត្រូវឈ្មួញកាប់ទន្ទ្រានយក

បានផុស

៥ years មុន

នៅ

ថ្ងៃចន្ទ ៦ ធ្នូ ២០២១

ដោយ

បន្ទាយមានជ័យ ៖ នៅរសៀលថ្ងៃទី៦ ខែធ្នូ ឆ្នាំ២០២១ នេះគេបានទៅគេឃើញមានការប្រជុំទប់ស្កាត់ការទន្ទ្រានដីរដ្ឋនៅក្នុងបឹងទន្លេសាបក្នុងភូមិសាស្ត្រ ខេត្តបន្ទាយមានជ័យ ក្រោមអធិបតីភាពឯកឧត្តមជាសុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនិងនគររូបនីយកម្មនិងសំណង់ ក្នុងនោះក៏មានវត្តមានឯកឧត្តមវេង សាខុន រដ្ឋមន្ត្រីក្រសួងកសិកម្ម ឯកឧត្តមសាលសំអាល់ រដ្ឋមន្ត្រីក្រសួងបរិស្ថាន ឯកឧត្តមសៅ សុខា អគ្គមេបញ្ជាការរាជអាវុធហត្ថលើផ្ទៃប្រទេស និងឯកឧត្តមអ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និង អ្នកមុខអ្នកការជាច្រើនរូបទៀត ដែលបានចូលរួមប្រជុំស្ដាប់វិធានការទប់ស្កាត់ការទន្ទ្រានដីព្រៃលិចទឹកក្នុងបឹងទន្លេសាបកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីអភិបាលខេត្តបន្ទាយមានជ័យ អានរបាយការណ៍ទាក់ទិនទៅនឹងការលុបកាប់ទន្ទ្រានយកដីព្រៃលិចទឹកកន្លងទៅនៅក្នុងភូមិសាស្ត្រស្រុកព្រះនេត្រព្រះ និងស្រុកមង្គលបុរីក្នុងខេត្តបន្ទាយមានជ័យរួចមក ឯកឧត្តមជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនិងនគររូបនីយកម្មនិងសំណង់ បានដាក់វិធានការសំខាន់ៗដូចខាងក្រោម ៖

ទី១ គណៈកម្មការចម្រុះរបស់ខេត្តត្រូវរៀបចំដាក់ប៉ាណូនៅលើទីតាំងដីឲ្យបានត្រឹមត្រូវ ទី២ ដាំកូនឈើឡើងវិញឲ្យខាងតែបាន ទី៣អ្នកមានប័ណ្ណមុនអនុក្រឹត្យគឺទុកមួយអន្លើសិន ទិ៤ មិនអនុញ្ញាតឲ្យពលរដ្ឋទៅបង្កបង្កើនផលបន្តទៀតទេ ទី៥ អាជ្ញាធរខេត្តត្រូវធ្វើរបាយការណ៍ប្រចាំឆ្នាំជូនទៅរាជរដ្ឋាភិបាលឲ្យបានទៀតទាត់ចាប់ពីពេលនេះតទៅទាក់ទងទៅនឹងចំនួនដីរដ្ឋនៅក្នុងបឹងទន្លេសាបទាំងអស់ដែលក្នុងភូមិសាស្ត្ររបស់ខ្លួនគ្រប់គ្រង ទី៦ ត្រូវអនុញ្ញាតឲ្យពលរដ្ឋប្រមូលផលស្រូវដែលបានកំពុងតែប្រមូលហើយមិនអនុញ្ញាតឲ្យចូលទៅក្នុងតំបន់នោះវិញជាដាច់ខាត ចុងក្រោយឯកឧត្តមជាសុផារ៉ាបានរំលឹកទៀតថា ចំពោះដីដែលរកឃើញចំនួន ៤៧០០ហិតាដែលឈ្មួញកាប់ទន្ទ្រានកន្លងទៅនោះ គឺត្រូវតាមចាប់ខ្លួនឲ្យបានដោយមិនលើកលែងនោះទេ ពុំនោះទេវាដូចជាអន់ពេកហើយ ឯកឧត្តមបានបន្តទៀតថា លោកព្រះរាជអាជ្ញាលោកកងរាជអាវុធហត្ថនិងនិងមន្ត្រីប៉ូលិសត្រូវសហការជាមួយនឹងអាជ្ញាធរធ្វើយ៉ាងណាចាត់ការក្នុងរឿងនេះឲ្យបានជោគជ័យកុំបីខាន៕

ដោយ ៖ ពៅ រី