Connect with us

ព័ត៌មានជាតិ

ឆ្នាំ ២០២១ មានកុមារ និងមនុស្សពេញវ័យ កើតជំងឺគ្រុនឈាមជិត ២ពាន់ករណី ថយចុះជាង ៦ដង

បានផុស

នៅ

ប្រធានមជ្ឈមណ្ឌលជាតិ ប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍ថា ឆ្នាំ២០២១ មានកុមារ និងមនុស្សពេញវ័យ កើតជំងឺគ្រុនឈាមចំនួន ១៨១១ករណី និងស្លាប់ ៨ករណី មានការថយចុះប្រហែលជាង ៦ដង បើធៀបនឹងឆ្នាំ ២០២០កន្លងទៅ មានចំនួនរហូតដល់ទៅ ១១៦៩៩ករណី និងស្លាប់ចំនួន ១៦ករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិ ប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រនិងបាណកសាស្ត្រ បានបន្តថា ការថយចុះនៃករណីជំងឺគ្រុនឈាមនេះ បណ្តាលមកពីមានការកើនឡើងនូវចំនួនប្រជាជន មានការយល់ដឹងច្រើន បានមកទទួលសេវាព្យាបាល នៅមន្ទីរពេទ្យរដ្ឋ ដោយសារគុណភាពសេវា និងសមត្ថភាពផ្តល់សេវា របស់គ្រូពេទ្យព្យាបាល នៅមន្ទីរពេទ្យទូទាំងប្រទេស មានការកើនឡើងជាលំដាប់ពីមួយឆ្នាំ ទៅមួយឆ្នាំ។

លោកវេជ្ជបណ្ឌិត បានឲ្យដឹងទៀតថា លើសពីនេះទៀត ដោយសារតែក្រសួងសុខាភិបាល បានត្រៀមថ្នាំអាបែតបានគ្រប់គ្រាន់ និងបានធ្វើការចែកចាយ ដល់មន្ទីរសុខាភិបាល នៅទូទាំងប្រទេសបានទាន់ពេលវេលា សម្រាប់ដាក់នៅក្នុងពាង ឬអាងទឹកតាមខ្នងផ្ទះប្រជាពលរដ្ឋ ដើម្បីសម្លាប់ដង្កូវទឹក ដែលជាភ្នាក់ងារចម្លងជំងឺគ្រុនឈាម។

ជាងនេះទៅទៀត ប្រជាពលរដ្ឋមានការយល់ដឹងខ្ពស់ ពីវិធានការអនាម័យ និងបរិស្ថាន នៅតាមសហគមន៍បានល្អប្រសើរ ដូចជាសំអាតលំនៅដ្ឋាន បានស្អាតលប់បំបាត់ ឬដុតកំទេចចោល ឬទុកដាក់ឲ្យមានរបៀបរាល់វត្ថុ ដែលអាចដក់ទឹកបានដូចជា សំបកកង់ឡានសំបកដប កំប៉ុង ត្រឡោកដូង ចានបាយ កំប៉ុងជ័រ ដែលជាជម្រកនៃការកកើតដង្កូវទឹក ជាភ្នាក់ងារចម្លងជំងឺគ្រុនឈាម។

ប្រធានមជ្ឈមណ្ឌលជាតិ ប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានបន្ថែមថា ការអនាម័យខ្លួនប្រាណ លាងសំអាតដៃញឹកញាប់ជាមួយសាប៊ូ អាកុល ឬជែលក្នុងការការពារការឆ្លងជំងឺកូវីដ-១៩ ក៏ជាកក្តាមួយនាំឱ្យជំងឺគ្រុនឈាម មានការថយចុះ ផងដែរ។

លោកវេជ្ជបណ្ឌិត បានអំពាវនាវដល់អាណាព្យាបាល មាតាបិតា កុមារាកុមារីគ្រប់រូប រួមទាំងអាជ្ញាធរមូលដ្ឋាន ត្រូវចូលរួមកំចាត់ដង្កូវទឹក នៅតាមទីកន្លែង ដែលមានទឹកដក់ ដូចជា ពាង អាងទឹក ថូផ្កា ចានទ្រជើង ក្រឡខាប់ជាដើម និងអាជីវករ និងម្ចាស់ជីវកម្មទាំងឡាយ ដែលប្រកបរបរពាក់ព័ន្ធនឹងសំបកកង់ឡានម៉ូតូ សូមធ្វើការគ្រប់គ្រងសំបកកង់ទាំងនេះ ឲ្យមានសុវត្ថិភាព ជៀសផុតពីការដក់ទឹកដោយមិនត្រូវទុកចោលពា សវាលពាសកាល បង្កើតបានជាប្រភពកកើត និងជំរកមូសខ្លាដ៏គ្រោះថ្នាក់បំផុត ដែលអំណោយដល់ការចម្ល ងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា។

ជាមួយគ្នានេះដែរ លោកវេជ្ជបណ្ឌិត បានណែនាំឲ្យកុមារស្លៀកពាក់ ខោអាវដៃវែងជើងវែង និងសម្រាន្ត ក្នុងមុងជាប្រចាំទាំងថ្ងៃទាំងយប់ មិនត្រូវអង្គុយលេង នៅជិតទីកន្លែងងងឹតនោះទេ និងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញ៉ាប់នាំអ្នកជំងឺទៅរកសេវាពិនិត្យ និងព្យាបាល របស់រដ្ឋ (សេវាសាធារណៈ) ដូចជាមណ្ឌលសុខភាព និងមន្ទីរពេទ្យ ដែលនៅជិតបំផុតនិងកុំសាកល្បងព្យាបាលជំងឺ ដោយខ្លួនឯង ឬពន្យារពេលតាមដានព្យបាលអ្នកជំងឺ នៅសេវាឯកជន ដែលគ្មានសមត្ថភាពផ្នែកជំងឺគ្រុនឈាមនេះ ឱ្យសោះព្រោះអាចធ្វើឱ្យកុមារស្លាប់បាត់បង់ជំងឺបាន។

លោកវេជ្ជបណ្ឌិត ហ៊ុយ រ៉េកុល បានបញ្ជាក់ថាកុមារដែលស្លាប់បាត់ បង់ជីវិតដោយសារជំងឺគ្រុនឈាមភាគច្រើនបណ្តាលមក ពីមាតាបិតា ឬអាណាព្យាបាលបញ្ជួនអ្នកជំងឺ ទៅមន្ទីរពេទ្យរដ្ឋមានការយឺតយ៉ាវ៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម