សម្ដេច​តេជោ ហ៊ុន សែន​ នឹង​ចាក់​វ៉ាក់សាំង​ដូស​ទី ៤​ នៅ​សប្តាហ៍នេះ​ មុន​ទៅ​ប្រទេស​អារ៉ាប់​អេមី​រ៉ាត់

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នឹងចាក់វ៉ាក់សាំងការពារជំងឺកូវីដ១៩ Pfizer ដូសទី៤ ឬដូសជំរុញ នៅថ្ងៃសុក្រ ទី ១៤ ខែមករា ឆ្នាំ ២០២២ មុនពេលសម្ដេចអញ្ជើទៅប្រទេស អារ៉ាប់​អេមី​រ៉ាត់។

នៅក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ ៥ នៅព្រឹកថ្ងៃទី ១០ ខែមករា ឆ្នាំ ២០២២ នេះ សម្ដេចតេជោ ហ៊ុន សែន មានប្រសាសន៍ថា ” ថ្ងៃ ១៤ ខ្ញុំចាក់ហើយ មូលហេតុដែលខ្ញុំប្រញាប់ព្រោះខ្ញុំទៅអារ៉ាប់អេមីរាត់ អញ្ចឹងខ្ញុំចង់ឱ្យមានស្បែកក្រាស់បន្តិច ព្រោះពេទ្យឱ្យខ្ញុំជ្រើសរើស ថ្ងៃ ១៤ ខែមករា ឬ១៤ ខែកុម្ភៈ ខ្ញុំថាយក ១៤ ខែមករា ចាក់ដូសជំរុញឱ្យខ្ញុំ ព្រោះនៅពេលដែលខ្ញុំធ្វើសំណាក មុនពេលខ្ញុំទៅមីយ៉ាន់ម៉ា និងបូបឈាមផង ដើម្បីពិនិត្យអង់ទិគ័រ នៅសល់ជាង ៧០០ ឯប្រពន្ធរបស់ខ្ញុំនៅសល់ជាង ៤០០ អញ្ចឹងត្រូវថែម Pfizer ដែលអូស្ត្រាលីផ្ដល់ឱ្យមកនេះ”។

សូមរំឭកផងដែរថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន បានចាក់វ៉ាក់សាំងការពារជំងឺកូវីដ១៩ ដូសទី៣ ឬដូសជំរុញ នៅថ្ងៃទី ១៤ ខែកញ្ញា ឆ្នាំ ២០២១៕

អត្ថបទ៖ ឡេង ដេត